Info sport

Amauri:Këtë sezon fitojmë ne



Është ende shpejt për të theksuar se Juventusi ka afruar një fenomen në skuadër, por nga ana tjetër është e sigurt se "senatorët e Zonjës së Vjetër" si, Del Piero, Nedved, Trezege e Bufon do të kenë një shok të denjë për sezonin e ardhshëm. Pas përgatitjeve të para, sulmuesi brazilian ka magjepsur teknikun Klaudio Ranieri në miqësoren kundër Brondbit, në të cilën, Amauri shënoi golin e parë të sfidës. Ashtu siç ka treguar edhe gjatë tri viteve të fundit në Palermo, numri 8 bardhezi është një përbindësh në zonën e rreptësisë, aq sa në dy ndeshjet e fundit, Ranieri ka preferuar pikërisht Amaurin në rolin e sulmuesit titullar kundrejt David Trezegesë. "Milani dhe Inerti janë përforcuar shumë, por jam i bindur se Juventusi alë , madje kam përshtypjen se ky do të jetë sezopni ynë", ka thënë Amauri.

Muntari: Interi, mundësi unike


Sule Muntari është zyrtarisht një lojtar i Interit. Mesfushori ganez ka mbërritur mëngjesin e djeshëm në Milano ku ka zhvilluar vizitat mjekësore në qendrën stërvitore të zikaltërve, "Apiano Xhentile". Pas një sezoni në Premier Ligë me skuadrën e Portsmuthit, Muntari rikthehet përsëri në Itali, pas aventurës së kaluar me formacionin e Udinezes. Lojtari është shprehur shumë i kënaqur nga një marrëveshje e tillë, duke e quajtur të rrallë mundësinë për të veshur fanellën e Interit: "Është shumë e vështirë të refuzosh një ofertë të skuadrës së Interit. Jam shumë i lumtur për një marrëveshje të tillë, sepse është e rralllë të gjesh dikë që i thotë jo Inerit. Përveç Interit që më ofroi një mundësi të tillë, dua të falënderoj edhe Portsmuthin, mbi të gjitha trajnerin Rednap i cili më ka ndihmuar shumë gjatë sezonit të kaluar në zhvillimin e lojës sime".

Zlatko Daliç: Vij që të qëndroj gjatë


Ka qenë një prezantim i shkurtër, por intensiv ai i trajnerit kroat Zlatko Daliç me skuadrën dinamovite.

Edhe pse ende nuk është prezantuar si trajneri i Dinamos, Daliç ka dashur të takohet me skuadrën për t'iu paraqitur atyre metodologjinë e tij të punës. Takimi i parë, i cili nuk ka zgjatur më shumë se 30 minuta. Në hotelin ku blutë qëndronin në qytetin e Zeniçës, trajneri kroat ka pasur rastin të prezantohet me stafin teknik dinamovit dhe me lojtarët, duke i shpjeguar atyre filozofinë e tij. Ndër pikat më të rëndësishme që Daliç kërkon që të respektohen nga Dinamo, është edhe korrektësia. "Jam shumë kërkues përsa i përket orareve, nuk toleroj asnjë vonesë dhe çdo shkelje do të dënohet. Kërkoj rigorozitet maksimal gjatë stërvitjeve dhe në këtë pikë do jem shumë i rreptë. Vij te Dinamo për të qëndruar gjatë dhe prandaj kërkoj një punë serioze nga të gjitha palët për të mundësuar një sezon të suksesshëm", mësohet të ketë thënë trajneri kroat.

“Dinjo” gjen golin me Brazilin


Brazili, falë lojtarëve kuqezi si Pato dhe Ronaldinjo, shpërthen në Azi, para startit të Lojrave Olimpike. Kombëtarja braziliane ka fituar ndaj asaj të Singaporit me rezultatin 3-0. Brazilit i kanë mjaftuar disa pasime të sakta ndërmjet milanistëve Ronaldinjo-Pato, për të shpartalluar skuadrën aziatike. Në këtë takim ka ardhur edhe goli i parë për Ronaldinjon, i cili kishte pothuajse tetë muaj që nuk aktivizohej me Kombëtares braziliane. Ka qenë një iniciativë e Patos, e cila e ka çuar drejt shënimit të golit Ronaldinjon, i cili tashmë pa më të voglin dyshim është rikthyer lojtari që bëri për vete të gjithë Evropën.

Pasardhësi i Skelës luan te Ravena


Mesfushori i ri shqiptar, Brian Filipi, po shkëlqen te skuadra e Ravenës, e cila militon në Serinë B. Ai ka tërhequr vëmendjen e shtypit italian, që e krahason 19-vjeçarin me fantazistin e përfaqësueses shqiptare, Ervin Skela.

E përditshmja italiane “La Voce”, shkruan se “për të riun Filipi, sezoni i ri premton shumë”. Mesfushori i talentuar, së bashku edhe me futbollistin tjetër Xherbino Polo, ishin edhe autorët e dy golave të parë të Ravenës për këtë sezon, në një ndeshje të zhvilluar para disa ditësh. Filipi realizoi gol në minutën e 11-të dhe shkëlqeu në ndeshjen miqësore. “Shqiptari Filipi, prodhim i shkollës së të rinjve të Miljaços, është lojtari që tekniku i ri i Ravenës ka grumbulluar në grupin e 28 lojtarëve të thirrur në grumbullimin e përgatitor në Riolo Terme”, shkruan “La Voce”. Ndërkohë, specialistët e kombëtareve shqiptare të moshave nuk u ka shpëtuar pa rënë në sy progresi i Brian Filipit, i thirrur fillimisht me ekipin U-19 e më pas me atë, U-21. “Pritet të debutojë me kombëtaren U-21 Greqisë, më 20 gusht, në një takim të vlefshëm për eliminatoret e Euro 2009. Është e panevojshme të tregoj emocionet që ndjej për të përfaqësuar vendin tim, dhe duke ditur se çfarë vëmendje do të ketë, do të shërbejë si një stimul për të bërë më të mirën time”, ka thënë Filipi për gazetën italiane.

Klubet duan ndryshimin e rregullit të kartonëve


Klubet e kampionatit shqiptar duan të ndryshohet rregulli i ndëshkimit për numrin e kartonëve të verdhë që merr një futbollist gjatë një sezoni futbollistik.
Rregulli aktual parashikon ndëshkim progresiv, ku thuhet se për çdo tre kartonë të verdhë lojtari mungon një ndeshje, por nëse ai merr edhe tre kartonë të tjerë të verdhë mungon dy ndeshje dhe dënimi vazhdon të rritet për çdo tre kartonë të marrë. Klubet kanë kërkuar që të rishikohet kjo pjesë e rregullores, sepse kështu penalizohen së tepërmi. “Ne jemi kundër këtij rregulli – ka thënë Artim Kovaçi, drejtori sportiv i klubit të Elbasanit. – Mendoj se do të ishte më mirë që lojtarët për çdo tre kartonë të verdhë të dënohen vetëm një ndeshje dhe të mos ketë dënim progresiv, duke u bazuar te numri total i kartonëve të marrë që nga fillimi i sezonit. Kjo është vërtetë penalizuese, madje në fund të sezonit shndërrohet në një problem serioz, sepse ky rregull mund të të privojë nga lojtarë të rëndësishëm”. Ky ka qenë argumenti i kërkesës për të ndryshuar rregullin e kartonëve edhe për drejtues të tjerë klubesh, të cilët ishin të pranishëm në mbledhjen që u zhvillua paradite në ambientet e FSHF-së. Propozimi i tyre do t’i kalojë për shqyrtim Komitetit Ekzekutiv, i cili më pas do të vendosë nëse do e marrë parasysh kërkesën, ose jo.
Shulku
Shefi i sektorit të garave në FSHF, Ilir Shulku, nuk e ka pritur mirë kërkesën e klubeve për të ndryshuar rregullin e kartonëve, pasi ai e cilëson këtë masë të ashpër dënimi si një mënyrë për të frenuar sjelljet antisportive në fushën e futbollit. “Unë mendoj se rregulli aktual duhet të mbetet në fuqi dhe këtë ua argumentoj me shifra. Sezonin e kaluar rreth 60% e kartonëve të verdhë janë akorduar nga gjyqtarët për motive disiplinore, pra për shfaqje antisportive, apo për veprime anti-futboll në fushë, ndërsa pjesa tjetër janë dhënë për shkak të ndërhyrjeve të gabuara, apo gabimeve të tjera sportive. Me këtë dua të them se futbolli shqiptar ka nevojë për masa rrepta që të eliminojë sa më shumë fenomenet negative që kanë të bëjnë me sjelljen e padisiplinuar, apo me anti-sportivitetin në fushën e lojës”, ka thënë Shulku.

Trajneri mahnitet nga Berisha: Është fenomenal


Ka shënuar një eurogol të shtunën teksa ka dribluar tre mbrojtës në minutën e 84-ët dhe më pas e ka dërguar topin në rrjetë.

Besart Berisha është rikthyer si më parë dhe trajneri i Bërnleit, Ouen Koil, është shumë i kënaqur me golin dhe me paraqitjen e sulmuesit të Kombëtares shqiptare, Besart Berisha. 23-vjeçari ka shënuar golin e tij të parë me fanellën e skuadrës angleze Burnlei. Berisha ka shënuar golin e tretë në fitoren, 3-0 ndaj Akringtonit të shtunën. “Goli do t’i bëjë mirë Berishës dhe do ta ndihmojë që t’i shtohet vetëbesimi. Jam shumë i kënaqur nga paraqitja, tifozët u treguan të mrekullueshëm me të dhe ai ua shpërbleu me një gol të shkëlqyer. Berisha ka qenë jashtë fushe për një vit dhe të gjithë ishim dyshues për rikthimin e tij, por dje na ka bindur se është kthyer ai i mëparshmi, plot grinte dhe entuziazëm në fushë. Ai ka shënuar një gol fenomenal dhe shpresoj që ky gol ta ndihmojë të rikthehet në nivelin ku ishte”, ka deklaruar trajneri Koil. Kosovari 23-vjeçar e ka nisur si rezervë ndeshjen dhe është aktivizuar në pjesën e dytë, por kaq ka mjaftuar që ai të realizonte gol në minutën e 84-ët, pasi kaloi tre mbrojtës. “Jam shumë i lumtur për golin që shënova. Ky ishte goli im i parë me fanellën e Bërnleit dhe më duket sikur jam në ëndërr pas atij viti të tmerrshëm që m’u desh të kaloja. Falënderoj tifozët për përkrahjen e tyre dhe shpresoj që të shënoj sa më shumë gola sezonin e ardhshëm”, ka thënë i emocionuar sulmuesi i përfaqësueses kuqezi. Berisha mungoi gjithë sezonin e kaluar për shkak të një dëmtimi të rëndë. Ai këputi ligamentet e gjurit të djathtë në miqësoren Shqipëri-Maltë 3-0 më 20 gusht të vitit të kaluar. Te Bërnlei që militon në Ligën e Dytë angleze (Championship) u transferua sezonin e kaluar nga Hamburgu për një shumë prej 500 mijë euro. Berisha cilësohet si një nga lojtarët me të ardhme të madhe të përfaqësueses shqiptare. Ai shquhet për teknikën dhe shpejtësinë e tij. Shpesh herë me përfaqësuesen ka luajtur si mesfushor krahu (si në të majtë ashtu edhe në të djathtë) dhe ka arritur të përshtatet mjaft mirë në këtë rol. Pritet që edicionin e ardhshëm të jetë një nga titullarët e përfaqësueses shqiptare.

E përditshmja italiane “La Voce”, shkruan se “për të riun Filipi, sezoni i ri premton shumë”. Mesfushori i talentuar, së bashku edhe me futbollistin tjetër Xherbino Polo, ishin edhe autorët e dy golave të parë të Ravenës për këtë sezon, në një ndeshje të zhvilluar para disa ditësh. Filipi realizoi gol në minutën e 11-të dhe shkëlqeu në ndeshjen miqësore. “Shqiptari Filipi, prodhim i shkollës së të rinjve të Miljaços, është lojtari që tekniku i ri i Ravenës ka grumbulluar në grupin e 28 lojtarëve të thirrur në grumbullimin e përgatitor në Riolo Terme”, shkruan “La Voce”. Ndërkohë, specialistët e kombëtareve shqiptare të moshave nuk u ka shpëtuar pa rënë në sy progresi i Brian Filipit, i thirrur fillimisht me ekipin U-19 e më pas me atë, U-21. “Pritet të debutojë me kombëtaren U-21 Greqisë, më 20 gusht, në një takim të vlefshëm për eliminatoret e Euro 2009. Është e panevojshme të tregoj emocionet që ndjej për të përfaqësuar vendin tim, dhe duke ditur se çfarë vëmendje do të ketë, do të shërbejë si një stimul për të bërë më të mirën time”, ka thënë Filipi për gazetën italiane

“Ronaldo budalla po iku”


Legjenda e klubit të Mançester Junaitid, Erik Kantona, ka komentuar situatën e Kristiano Ronaldos në merkato, duke e këshilluar portugezin që të mos largohet. “Për mendimin tim do të ishte një budalla, nëse vendos që të largohet. Për momentin është lojtari më i mirë në botë. Cilësitë e tij përshtaten shkëlqyeshëm me lojën e Mançesterit dhe pikërisht aty arrin të bjerë në sy ashtu si duhet, duke arritur të fitojë shumë çmime personale. Tifozët e trajtojnë si hero dhe në ekip është i pazëvendësueshëm. Nuk e kuptoj se çfarë kërkon më shumë një futbollist, gjithsesi unë e këshilloj që të mos largohet”, ka thënë Kantona, i cili kaloi shumë vite me fanellën e Mançester Junaitid.

Franca, 120 mln euro shpenzime

Në Francë nuk kontrollohen për portofolet. Kur ka mbetur edhe një muaj nga përfundimi i merkatos, klubet franceze kanë shpenzuar deri tani plot 120 milionë euro për të përforcuar ekipet e tyre dhe për të investuar te talentet e reja. Lioni si gjithmonë është protagonist. Në pak javë ekipet e Ligës 1 kanë shpenzuar afërisht dy herë më shumë se vitin e kaluar. Ndërkohë që një verë më parë ishin shpenzuar në total 68 milionë euro gjithsej. Gjithsesi, klubet franceze tashmë janë shumë më të pasur dhe kjo për shkak të të drejtave televizive, pasi anë përfituar plot 668 milionë euro. Klubet tashmë po bëjnë investime te lojtarë shumë cilësorë, duke i rritur edhe çmimet e ofertave të tyre.

PSG, jashtë nga Kupa e Ligës


Federata Franceze e Futbollit ka vendosur të përjashtojë ekipin e PSG-së nga Kupa e Ligës që do të zhvillohet në sezonin e ri. Kjo për shkak se gjatë finales së Kupës në vitin që shkoi, ku PSG-ja u përball me Lenin, tifozët vendës kishin ofenduar me thirrje dhe parulla tifozët kundërshtarë me shprehjet “pedofilë dhe fëmijë të incestit”, duke bërë që drejtuesit e Lensit të paraqesin menjëherë ankesë në Federatë. Edhe pse ekipi nga Parisi vendosi të apelojë vendimin e marrë, një gjë e tillë nuk u mor parasysh, duke mbetur kështu jashtë Kupës së Ligës. Federata e ka cilësuar këtë vendim si mjaft të drejtë, përsa i përket luftës kundër akteve të dhunshme dhe jo sportive nga ana e tifozëve

“Për mua nis një jetë e re”


Megjithëse ka zhveshur kostumin e futbollistit vazhdon të stërvitet me shokët e Lacios. Igli Tare ndihet për mrekulli në rolin e tij si drejtues:
“Për mua ka nisur një jetë e re. Do të jetë një përvojë e rëndësishme. Eshtë një sfidë që e kam pranuar me entuziazëm të madh – ka deklaruar për shtypin italian -, sepse është një rast unik të punosh te Lacio. Synojmë të dërgojmë Lacion, aty ku e meriton, domethënë në Evropë. Janë bërë investime të rëndësishme, që tregojnë sesi Lotito po punon fort. Edhe tifozët po afrohen pranë skuadrës, gjë të cilën e tregojnë abonimet e nënshkruara deri tani. Këtu ekziston gjithçka për realizimin e një sezoni të madh”. Duke folur për rolin e tij të ri, Igli thotë: “Do të mbetem pjesë e skuadrës, sepse kam qenë pjesë e grupit dhe gjërat nuk ndryshojnë nga një ditë në tjetrën. Dua të jem afër ekipit, sepse duhet të zgjidh problemet e mundshme. Ky është një rol i rëndësishëm gjatë sezonit, kur mund të ketë momente vështirësie, që duhet të dimë t’i përballojmë. Tekniku Rosi? I ndershëm, profesionist dhe korrekt. Jam në dispozicionin e tij. Lotito? E falënderoj shumë, sepse më ka dhënë vërtet një mundësi të madhe”.

Bogdani i bën gol ekipit të Briatores


Erjon Bogdani ka ndëshkuar dje skuadrën e Flavio Briatores teksa i ka shënuar gol në minutën e 30-të.
Kievo fitoi ndeshjen kundër anglezëve të QPR-së me rezultatin 2-1, falë golit të shënuar nga bomberi kuqezi. Klubi anglez në pronësi të menaxherit të përgjithshëm të skuderisë “Renault” në Formula 1, Flavio Briatore u interesua në janar për shërbimet e shtatlartit shqiptar. Bogdani zhbllokoi rezultatin në minutën e 30-të, megjithatë kjo nuk ka mjaftuar që ai të luante gjatë gjithë takimit, sepse në fillim të pjesës së dytë është zëvendësuar. Ndërkohë media italiane bën të ditur se dje ka pasur një takim mes drejtorit sportiv të Kievos Xhovani Sartori dhe përfaqësuesve të klubit Ipsuiç, që interesohet për sulmuesin e Kombëtares shqiptare.
I papërmbajtshmi Hyka
Mesfushori i talentuar i përfaqësueses shqiptare, Jahmir Hyka ka shkëlqyer të premten në ndeshjen miqësore që skuadra e tij Mainc fitoi me rezultatin 4-0 kundër skuadrës së Bahlingerit, e cila militon në Oberligë. Mesfushori shqiptar ka dhënë asistin e golit të tretë të shënuar nga Amri në minutën e 83-të, ndërsa në minutën e 87-të ka qenë Hyka ai që ka vulosur pokerin e Maincit duke realizuar një eurogol, nga një distancë prej 25 metrash. “Hyka ishte fantastik në këtë ndeshje. Driblimet dhe asistent e tij të jepnin përshtypjen e një futbollisti që luan në Bundesligë prej tre ose katër sezonesh”, shkruhej në komentin uebsajtit zyrtar të Mainc 05.
Kapllani & Salihi
Edmond Kapllani ka luajtur 45 minutat e dyta të ndeshjes që skuadra e tij barazoi 1-1 kundër Soshosë. Sulmuesi i përfaqësueses shqiptare është aktivizuar në vend të Kendeit, autorit të golit të Kalrsuhes në këtë takim. Kapllani është paraqitur mjaft mirë në këtë takim dhe ka pasur raste të mira për të shënuar. Ndërkohë, Hamdi Salihi, sulmuesi i përfaqësues që aktivizohet te austriakët e Riedit konsiderohet si titullar i pazëevdëndësueshëm nga trajneri i ri Paul Gludovatz. “Salihi është lojtari ynë kryesor në repartin e sulmit dhe kundër SV Pashingut do të jetë titullar nesër (sot)”, ka thënë tekniku Gludovatz.

Ikën Osmani,gati Beqiri dhe Dhëmbi


Vijnë pasojat e para të çështjes së ngritur nga presidenti i Partizanit, Albert Xhani, për shitje të ndeshjes së Kupës UEFA nga lojtarët.
Kështu, Tefik Osmani është lënë i lirë të kalojë te Tirana, kurse Beqirit e Dhëmbit u është kërkuar të shkojnë të marrin letrat të hënën në klub. Ndërsa për Muzakën duket se presidenti dëshiron të nxjerrë “inatin”, duke mos e lënë të shkojë te Tirana, të paktën për momentin. Ndërkohë, presidenti Xhani, megjithëse e ka përjashtuar prej kohësh, ka akuzuar edhe Bledi Shkëmbin se ka gisht në shitjen e ndeshjes kundër Shiroki Brijeg. Vetë mesfushori konfirmon: “Xhani më ka akuzuar se unë i kam shitur ndeshjen, por kjo është një gjë absurde, sepse ndeshjen nuk mund ta shesin ata që janë në tribunë dhe për më tepër që unë nuk jam më lojtar i Partizanit. Xhani po kalon një situatë të vështirë ku gjithçka i ka rrëshqitur nga duart dhe tani nuk di ç’flet”, ka thënë mesfushori i Kombëtares

Shulku: Xhani do të merret në pyetje


Presidenti i Partizanit, Albert Xhani do të merret në pyetje për deklaratat që ka bërë pak ditë më parë se lojtarët e skuadrës së tij, i shitën ndeshjen kundër Shiroki Brijeg, e vlefshme për turin e parë paraeliminator të Kupës UEFA.
Përgjegjësi i sektorit të garave, Ilir Shulku, ka pohuar se dy prokurorët sportivë do të hetojnë Partizanin, por do të merret në pyetje edhe presidenti i të kuqve. “Lojtarët e Partizanit nuk luajtën futboll, ata e kishin shitur ndeshjen”, ishte deklarata e kreut të të kuqve, pas humbjes 1-3 kundër Shirokit të enjten në stadiumin “Qemal Stafa”, çka solli edhe eliminimin e kryeqytetasve nga Kupa UEFA. Nuk është hera e parë që një drejtues i lartë i një klubi deklaron para mediave se lojtarët e tij i shitën ndeshjen, por ndryshe nga herët e tjera, këtë radhë kjo nuk do të kalojë pa u marrë në konsideratë nga Federata. “Janë ngarkuar dy inspektorët e Komisionit të Disiplinës (prokurorët sportivë) që të hetojnë për ndeshjen Partizani-Shiroki Brijeg. A do të merret Xhani në pyetje? Deklaratat e tij janë vërtet të rënda dhe padyshim që edhe ai do të pyetet në këtë rast, ndonëse unë nuk dua të hyj në kompetencat e dy inspektorëve. Unë mund të them se do të bëjmë maksimumin për të zbardhur të vërtetën në këtë situatë akuzash dhe kundërakuzash dhe çdo informacion i drejtuesve të Partizanit mund të shërbejë për të zbardhur të vërtetën”.

Del Piero:Tërhiqem pas 7 vitesh


Pas dy vitesh, në të cilat ndeshjet e Ligës së Kampioneve i ka ndjekur vetëm nëpërmjet televizorit, Alesandro Del Piero dhe Juventusi janë gati të rinisin aventurën evropiane. “E rëndësishme është që skuadra të arrijë të konkretizojë objektivat e caktuar. Objektivat personalë? Është herët për të folur për to. Liga e Kampioneve më ka munguar shumë, ndërkohë që kemi rastin më të mirë për t’u rikthyer bindshëm në këtë kompeticion. Kam ende forcë e dëshirë për të luftuar, kështu që nuk kam aspak ndërmend të dorëzohem. Dua të jap kontributin tim për këtë skuadër deri sa fiziku të ma lejojë. Jam 33-vjeç, por kam ende dy vite kontratë me Juven. Gjithsesi, besoj se do të tërhiqem pas shtatë vjetësh”.

Van Der Vart, jo sa milionat e Realit


Hamburgu ka humbur ndeshjen e parë të turneut “Emirates Cup”, me rezultatin 2-1, ndaj skuadrës së Realit të Madridit. Trajneri holandez i Hamburgut, Martin Jol, përpara këtij takimi kishte përjashtuar kapitenin Rafael van der Vart: “Nuk është mirë në aspektin psikologjik”. Teksa konfirmoi edhe një herë se skuadra e Hamburgut nuk do të pranonte asnjë ofertë për më pak se 13 milionë euro për yllin holandez. “Reali duhet të paguajë atë shumë, për të cilën kemi diskutuar. Përndryshe çdo shifër tjetër do të ishte tepër qesharake për të. Edhe vetë Reali e di mjaft mirë që Van der Vart ka më shumë vlera se dyfishi i shumës së lartpërmendur”, theksoi tekniku holandez.

F1, McLaren niset para Ferrarit


Nëse koha e mirë shihet që në mëngjes, atëherë për McLaren-in e diela e sotme në Çmimin e Madh të Hungarisë do të jetë ditë feste. Luis Hamilton ka arritur të fitojë në “pole-position”, ndërkohë që menjëherë pas tij do të niset një tjetër McLaren, ajo e finlandezit Heiki Kovalainen. Hamilton ka siguruar në këtë mënyrë “pole”-in e dhjetë të karrierës së tij si pilot i Formula 1. Ndërsa Felipe Masa, piloti brazilian i Ferrarit, është renditur në vend të tretë. Nga ana tjetër, shokut të tij të skuadrës, finlandezit Kimi Raikonen, i është dashur të kënaqet me vendin e gjashtë, në të cilin është renditur pasi ka bërë një gabim në manovrimin e makinës.

Trukimet, Duka: Xhani si bariu që thërret ‘Ujku!’


Aventura e skuadrave shqiptare në Evropë u shoqërua edhe këtë verë me akuza për shitje ndeshjesh dhe me përjashtime lojtarësh.
Një situatë si kjo padyshim nuk i pëlqen presidentit të Federatës Shqiptare të Futbollit, i cili gjithsesi nuk pranon të hidhet baltë në çdo ndeshje. “Duket sikur na pëlqen që këto gjëra t’i fryjmë maksimalisht edhe vetë ne, por nuk duhet të pranojmë që të imunizohemi nga ideja e shit-blerjeve, sepse jo gjithçka është kaq e errët sa përshkruhet”, shprehet Duka. Në një intervistë për “Panorama” presidenti i Federatës komenton ecurinë e skuadrave shqiptare në Evropë, ku nuk harron të shigjetojë edhe presidentin e Partizanit, Albert Xhani, i cili pak ditë më parë akuzoi lojtarët e tij se e kishin shitur ndeshjen kundër Shiroki Brijeg.
Cili është komenti juaj për ecurinë e skuadrave shqiptare në arenën evropiane?
Bardh e zi. Në planin personal jam paksa i zhgënjyer, sepse kur pashë shortin mendova se të gjitha ekipet që përfaqësonin Shqipërinë në arenën ndërkombëtare kishin mundësi të shkonin larg, madje mund të bënin edhe hapin e madh, pra ndonjëra prej tyre edhe të kualifikohej. Jam i bindur se kundërshtaret e tyre nuk ishin më superiorë, madje i kishin mundësitë që të bënin paraqitje më dinjitoze. Nuk mund ta fsheh se prisja më tepër nga Dinamo, sepse kishte një ekip të mirë dhe nuk kishte asgjë më pak se Modrica. Besa gjithashtu pati një start të mirë, por në turin e dytë bëri një paraqitje të shëmtuar, ndaj një kundërshtari me nivel, por jo të pakalueshëm. E njëjta gjë mund të thuhet edhe për Partizanin, që u skualifikua nga një kundërshtar me të cilin nuk kishte shumë diferenca.
Presidenti i Partizanit akuzoi lojtarët e tij se i shitën ndeshjen...
Federata Shqiptare e Futbollit, ndryshe nga vitet e kaluara ka nisur një hetim, jo vetëm për Partizanin, por edhe për Dinamon, e cila gjithashtu u përfol se ka trukuar ndeshjen. Madje për këtë po heton edhe UEFA. Megjithatë, për sa i përket rastit të Partizanit, ndonjëherë më duket se presidenti i kësaj skuadre del dhe kërkon ndihmë kur sillet në atë mënyrë, sepse kjo nuk është hera e parë që deklaron se lojtarët i shitën ndeshjen dhe pastaj nuk ndodh më asgjë. Më duket si ajo fabula e bariut me delet që dilte dhe thërriste “Ujku! Ujku!” dhe kur ujku shkoi vërtet askush nuk e ndihmoi. Nëse ai ka diçka për të bërë dhe për të treguar është i lirë të veprojë si ta shohë të arsyeshme, sepse të gjithëve na intereson futbolli i pastër.
President, por kjo nuk është hera e parë që skuadrat shqiptare përfliten për trukime dhe afera të pista?
Nuk mund të them se gjërat funksionojnë shkëlqyeshëm në futbollin tonë, madje nuk e përjashtoj mundësinë që afera edhe mund të ketë pasur. Megjithatë, deri sa nuk ka përfundime konkrete dhe të vërtetohet se cili është fajtor dhe cili jo, nuk mund të hidhet baltë mbi këdo dhe mbi çdo gjë. Kam vënë re se këtu na pëlqen t’i fryjmë dhe ti ekzagjerojmë të vërtetat apo thashethemet për shit-blerje ndeshjesh dhe në këtë mënyrë nxijmë gjithçka dhe hedhim poshtë punën e shumë njerëzve. Ndoshta jo gjithçka është për faj të tifozëve apo të medias, sepse kështu ndodh edhe në politikë. Kur dikush humbet zgjedhjet apo humbet postin e ka më të thjeshtë të thotë se e vodhën apo se i blenë votat në vend që të pranojë humbjen. Kjo sindromë ka prekur edhe futbollin shqiptar, ku shumë gjëra ekzagjerohen. Unë shpresoj që sportdashësit shqiptar të mos imunizohen me idenë se gjithçka është e zezë dhe se gjithçka është e trukuar, sepse në të vërtetë nuk është kështu.
A mendoni se nëse një ekip shqiptar do të kishte arritur të kualifikohej në Ligën e Kampioneve ose në UEFA, klima do të ishte më e butë dhe besimi do të ishte më i madh rreth skuadrave shqiptare?
Besoj se po. Sinqerisht më vjen keq që skuadrat shqiptare ende nuk po arrijnë të bëjnë hapin vendimtar në këtë aspekt, pra të kalojnë turet paraeliminatore. Më vjen keq për faktin se kundërshtaret e tyre në shumicën e rasteve nuk kanë qenë të pakalueshme dhe jo të një niveli më të mirë se ato. Megjithatë nuk duhet të harrojmë se për të bërë një kalim të tillë, ndikojnë disa faktorë të rëndësishëm si vetëbesimi, tradita në arenën ndërkombëtare dhe organizimi i skuadrave sidomos për ndeshje të këtyre niveleve, gjë që shpesh neglizhohet.

Curri

Debatik Curri ka qenë protagonist në fitoren 1-3 që skuadra e tij Vorskla Poltava arriti dje në transfertë kundër Tavria Simferopol. Mbrojtësi i përfaqësueses shqiptare ka shënuar gol në minutën e 31-të duke kaluar në avantazh ekipin e tij, pasi ndeshja deri në atë moment ishte në barazim 1-1. Asistin e golit e ka dhënë mbrojtësi tjetër i përfaqësueses shqiptare, Armend Dallku, i cili aktivizohet në të njëjtin ekip.

Salihi


Hamdi Salihi ka luajtur si titullar në ndeshjen e djeshme kundër SV Pashingut, ku Riedi i tij nuk arriti të merrte më tepër se sa një barazim pa gola. Sulmuesi shqiptar ka bërë një paraqitje të mirë dhe ka pasur raste të mirë për të shënuar, pro nuk ka mundur ta dërgojë topin në rrjetë. Në minutën e 82-të ai është penguar brenda zonës, por gjyqtari nuk ka pranuar të akordojë 11-metërsh në favor të skuadrës së Riedit.

Çelsi/ Skolari, i mahnitur nga Nikolas Anelka


Trajneri i Çelsit, Luiz Felipe Skolari, beson se katër golat e Nikolas Anelkas ndaj Milanit do t’i dhurojnë skuadrës një besim në vetvete përpara fillimit të sezonit të ri. Sulmuesi francez ishte njeriu i ndeshjes ditën e djeshme, teksa realizoi katër nga pesë golat që blutë e Londrës shënuan ndaj skuadrës italiane. Skolari e ndjen se Anelka, i cili kaloi në “Stamford Bridge” në janar për vlerën e 15 milionë sterlinave, ka përfituar shumë nga stërvitja e mirë parasezonale. “Kjo ndeshje (kundër Milanit) ishte e rëndësishme për Anelkën, por akoma më e rëndësishme për ne, tifozët, trajnerin dhe njerëzit që do të kenë më tepër besim tek skuadra, - u shpreh Skolari në faqen zyrtare të Çelsit. - Dita e sotme ishte e mirë për të jo vetëm për faktin se shënoi katër gola, por sepse luajti më i lirë dhe me më tepër cilësi se në ndeshjet e tjera. Po luante përballë një klubi të madh, kështu që katër golat do t’ia rritin në maksimum besimin në vetvete”, vlerësoi Skolari, i cili luajti ndaj Milanit pa Didier Drogba, i dëmtuar gjatë stërvitjeve. Braziliani është i mendimit se Anelka shkëlqeu në mes të sulmit, ndaj planifikon dhe ndryshimin e pozicionit të francezit, i cili nën drejtimin e Avram Grantit luante në krah.

Arsenal/ Adebajor merr mbështetjen e Vengerit



Trajneri i Arsenalit beson se sulmuesi do të rifitojë mbështetjen e fansave të klubit, për t’u rikthyer edhe njëherë ndër lojtarët më te preferuar të skuadrës së tij. Pas arritjes së marrëveshjes për qëndrimin e tij, Venger kërkon të ulë nervat e tifozëve të “Topçinjve”, të cilët u ndjenë të zhgënjyer nga togolezi që kërkonte të largohej nga “Emirates”. “E ndjej se fansat tanë e mbështesin përsëri atë.
Mua, ballë për ballë, gjithmonë më thoshte se do të qëndronte tek Arsenali dhe në fakt kështu përfundoi. Ndaj, e besoj plotësisht tek ato që më thotë. Ai nuk shkon asgjëkund, madje edhe sikur t’ia shtrojnë rrugën me flori”, tha Venger, i cili në humbjen ndaj Juventusit, pranon se aktivizoi lojtarë të rinj, ndërkohë që u kënaq nga paraqitja e mesfushës. Francezi i stolit të Arsenalit hodhi poshtë edhe zërat për një ofertë të tij në drejtim të kapitenit të Aston Vilës, Geret Berr. “Për momentin nuk kemi ndërmend të blejmë asnjë lojtar dhe do të jemi të fokusuar vetëm tek lojtarët që kemi tani në dispozicion. Nëse më vonë gjejmë dikë që na intereson dhe mendojmë se i shërben skuadrës, atëherë do të hidhemi në sulm. Nëse jo, jemi të lumtur edhe me grupin që kemi”, nënvizoi kreu i pankinës së Arsenalit.

Liverpul/ Rafa Benitez: Xherrard duhet të përshtatet



Rafael Benitez ka raportuar se do të vazhdojë ta vendosë kapitenin e skuadrës, Stiven Xherrard, në disa pozicione deri në fillim të sezonit të ri. Pozicioni i kapitenit të Liverpulit është një nga debatet më të nxehta në kampin e kuq. Vetë tekniku Benitez thotë se metoda e ndjekur prej tij deri tani ka si qëllim, përshtatjen e kapitenit në pozicione të ndryshme në fushën e lojës. “Mendoj se Stiveni është mjaft i zgjuar për t’u përshtatur në çdo pozicion. Nëse do t’i duhet ta bëjë këtë, ai e bën, pasi është lojtar me të tilla cilësi që mund të luajë kudo. Nuk mendoj se Stiveni do të mërzitet nga këto eksperimente që po bëj me të”, u shpreh Benitez.

diten e shtun ,,,,kampionati FR fillon sezonin 2008-2009