Info sport

Canaj dhe Lika, fituesit e Europës

Nuk ka miliona si një president, nuk është orator i lindur, nuk bie në sy të kamerave. Por është një trajner për së mbari. Agim Canaj ka atë që i duhet në profesionin e tij, ndonëse shumë nga pronarët e sotëm jo të ligjshëm të futbollit shqiptar as nuk ia cek dot mendja rëndësinë e kësaj. Fitorja 2-1 e Vllaznisë në fushën e Koperit, urojmë me gjithë shpirt, të jetë një fitore e vërtetë futbolli, jo sukses “1x2” dhe, nëse është kështu, i pari njeri që duhet të marrë një “të lumtë” të madhe është pikërisht Gimi.

Punoi mirë tek Besa, tek Lushnja, tek Dinamo nga e cila e larguan në vend të parë. Gimi është nga ata që të mbush zemrën me shpresë se në këtë vend me deficit vlerash njerëzore, ekzistojnë edhe njerëzit e duhur. Të urojmë që presidenti i Vllaznisë, Fushaj, ta kuptojë këtë dhe ta lejojë trajnerin të punojë qetë më shumë se një vit, sepse kështu do të mundë të kalojë në të ardhmen më shumë se një turn në kupat e Europës.

Hasan Lika nuk fitoi, porse barazoi, ndonëse një 0-0 jashtë fushe në Europë gjithnjë është rezultat i mirë. Pasi presidenti Albert Xhani nuk bën më akrobaci si dikur, qendrueshmëria e grupit dha fryte dhe largimet e disa emrave nuk u ndjenë. Të paktën për ndeshjen e parë.

Një e vërtetë e madhe e futbollit u vërtetua: Më shumë vlerë ka skuadra sesa individi. Pavarësisht se për ç’shkak ikën lojtarët nga Partizani, sërish prania e trajnerit me përvojë Hasan Lika dhe përmbajtja gjithnjë e më e madhe e Xhanit janë një garanci për sukses.

Baxhim i zhgënjyer: Donim fitoren me Vllaznine

Mediat sllovene nuk ia vënë aq shumë fajin Koperit për humbjen ndaj Vllaznisë sesa skuadrës shqiptare. “Koperi nuk është se luajti dobët, por fituesi i Kupës së Shqipërisë u tregua një skuadër e fortë, - shkruante “sport1.si”, - mbrojtësit e Koperit u vunë shumë në vështirësi nga kundërsulmet e shqiptarëve”. Në të vërtetë, Koperi e nisi ndeshjen në sulm dhe Rastovac (5’) gjuajti me kokë pas krosit të Vilerit, por pa rezultat. Dy minuta më pas, Sukaj mori një top nga Lika, kaloi Handanagiçin dhe tundi rrjetën. Sukaj pati një tjetër rast në 28’, ndërsa në 45’ tundi rrjetën pasi kaloi Shmonin. Në pjesën e dytë “Kopriçanët” ushtruan presion dhe patën disa mundësi, por goli u shënua vetëm me gjuajtje nga 20 metra prej më të mirit lojtar të tyrit, Vilerit. Trajneri Baxhim, i zhgënjyer, u shpreh pas ndeshjes se nuk e kishte menduar humbjen. “Ishim stërvitur mirë dhe donim vetëm fitoren, - tha ai, - do të më pëlqente një 1-0 apo 2-0, por jo vetëm pësuam gol, në fund edhe humbëm”.

Partizani, shtatë lojtarë debutues ndërkombëtarë

Skuadra që Partizani paraqiti në takimin kundër Shiroki Brijeg në barazimin 0-0 në ndeshjen e parë të turit të parë të Kupës UEFA, njëherësh edhe barazimi i parë në 11 ndeshje të Kupës UEFA, kishte brenda saj shtatë debutues që do ta fusin përjetësisht në statistikat e tyre këtë ndeshje, pasi për ta ishte edhe ndeshja e parë e tyre ndërkombëtare.

CAPO- Përveç portierit debutues Edvan Bakaj, i cili me paraqitjen e realizuar në Bosnjë, duket se ka zënë një vend titullari te 15-herë kampionët e Shqipërisë, një tjetër lojtar duket se do të ketë të ardhme të madhe. Sulmuesi i ri i Partizanit, Arbër Capo, (luajti gati 35 minuta) bëri një paraqitje pozitive në debutimin e tij të parë ndërkombëtar. “Jam i lumtur që munda të luaj në një ndeshje ndërkombëtare. Kjo është një ngjarje e madhe në karrierën time të re sportive, pasi dhe në kampionat minutat i kam pasur të paktë, duke luajtur vetëm në dy ndeshje”, - tha sulmuesi i talentuar Arbër Capo (në foto) për “Albania-Sport”. “Dua të falënderoj trajnerin Lika, por dhe presidentin Xhani, i cili ka bërë të pamundurën që unë të jem pjesë e Partizanit”, - shtoi 20-vjeçari.

PËRLLESHI- Talenti më i ri i futbollit shqiptar, lezhjani 17-vjeçar Teodor Përlleshi (i ka mbushur më 23 maj, pra luajti 17 vjeç e 54 ditë) pati minutat e tij (27 minuta), por pa mundur të thyejë rekordin e Elis Bakajt, i cili është aktivizuar ende pa mbushur 17 vjeç, më saktë 16 vjeç e 10 ditë. Përlleshi shënoi dy gola sezonin e kaluar me Besëlidhjen.

NGJELA- Sulmuesi korçar i Skëndërbeut e Besëlidhjes gjatë sezonit të kaluar, Maruis Ngjela ishte edhe një nga gjashtë blerjet e Partizanit për sezonin 2008-2009, së bashku edhe me Rajmond Shalën, Ylli Shametin, Teodor Përlleshin, Edi Çajkun e Klejdi Lartin. Edhe Ngjela, autor i 12 golave sezonin e kaluar, ishte një ndër debutuesit e Partizanit, në të parën ndeshje ndërkombëtare të tyre. Përveç Ngjelës edhe mesfushori Edi Çajku e Artan Karapici zhvilluan të parin takim ndërkombëtar.

Lojtarët që debutuan

Edvan Bakaj (portier), Viktor Gjyla (mesfushor), Teodor Përlleshi (mesfushor), Edi Çajku (mesfushor), Marius Ngjela (sulmues), Artan Karapici (sulmues), Arbër Capo (sulmues).

Vllaznia, surprizë me Koperin: 2-1


Vllaznia regjistroi një fitore të çmuar 2-1 kundër sllovenëve të Koperit, në stadiumin “Sportni Park” të Nova Goricës.

Heroi i takimit ishte sulmuesi i talentuar Xhevair Sukaj, i cili realizoi dy golat për formacionin e teknikut Agim Canaj, që e nis në mënyrën më të mirë aventurën me kuqebliut.

Sukaj, i cili kërkohet nga Kaiserslauterni në Gjermani, realizoi golin e parë në minutën e 7-të, ndërsa dyfishoi rezultatin në minutën e 43-të, duke i dhënë një avantazh të qartë fituesve të Kupës së Shipërisë.

Në pjesën e dytë ekipi vendas shkurtoi diferencën me anë të Viler në minurtën e 71-të. Vllanznia i ka të gjitha shanset për të kaluar në turin e dytë eliminator të Kupës UEFA.

Duro, asist në fitoren e Omonias


Klodian Duro ka qenë i mbarë për Omonian në ndeshjen e parë të Kupës UEFA kundër ekipit shqiptar të Milanos së Kumanovës në takimin e zhvilluar në Nikosia, përballë 15 mijë tifozëve të etur për fitore.

Ekipi qipriot fitoi me rezultatin e pastër 2-0, me nga një gol në çdo pjesë, ndërkohë që Duro dha asistin e golit të dytë. Mesfushori i Kombëtares shqiptare ishte ndër më të mirët në fushë.

Duro në minutën e 19-të realizoi një gjuajtje spektakolare, dhe një minutë më pas Leonard Kukaj realizoi në minutën e 20-të një autogol në favor të Omonias, në përjekje për të devijuar topin.

Në pjesën e dytë, Duro pati një mundësi të artë në minutën e 60-të, ndërkohë që në minutën e 64-t, krosoi për Anton Zoglarin, i cili me kokjë realizoi edhe golin e dytë. Duro pati një mundësi tjetër për të shënuar golin e tretë të Omonias në minutën e 69-të. Klodi luajti gjatë gjithë takimit.

Kjo ishte edhe takimi i parë ndërkombëtar në kompeticionet evropiane i skuadrës shqiptaro-maqedonase. Ndeshja e kthimit do të luhet, më 31 korrik në Shkup.

Kapllani, i bindur: Ky do të jetë sezoni im


Nuk doni të përsëritet sezoni i kaluar...
Vjet gjërat rodhën çuditshëm. E nisa shumë mirë, ashtu si edhe tani, por më pas për shkak të disa episodeve, situata më doli nga kontrolli dhe sa më shumë kohë kaloja në stol, aq më tepër mërzitesha dhe humbisja besimin në vetvete. Ishte një periudhë e vështirë, të cilën ndoshta nuk arrij as vetë t'i jap një shpjegim të saktë, por jam i bindur se nuk do të përsëritet më.
Trajneri është i njëjti, rivalët tuaj në ekip gjithashtu, nuk kanë ndryshuar, çfarë ju bën të ndiheni kaq i sigurt në vetvete?
Sezoni i kaluar, me-gjithëse i vështirë, ishte edhe një mësim i mirë për mua. Arrita të kuptoj se nuk duhet të neglizhoj për asnjë moment dhe duhet të jap gjithnjë maksimumin. Duhet të shfrytëzoj maksimalisht mundësitë e mia në çdo moment. Përveç kësaj, ndihem shumë më i sigurt në vetvete, sepse e di mirë se si duhet të veproj. Trajneri gjithashtu, më vlerëson shumë dhe më ka lënë të kuptoj se nëse vazhdoj kështu, do të jem i pari në listën e zgjedhjeve të sulmit. Nuk mund të shpjegoj gjithçka me fjalë, por e ndjej se ky do të jetë sezoni im. Kam të njëjtën ndjesi me atë që kisha para se të ngjiteshim në Bundesligën 1, ku unë shënova 17 gola. Përveç kësaj, jam edhe në një formë të shkëlqyer fizike dhe kjo është shumë e rëndësishme.
Edhe vjet ishit shumë mirë fizikisht....
Po, por vitin e kaluar u krijuan ca situata, të cilat ndoshta edhe unë vetë i nënvlerësova. Kishte ndeshje kur nuk isha në ditë të mirë dhe duke menduar se mund të rikuperoja gjithçka në ndeshjen tjetër, nuk sakrifikoja. Në këtë periudhë mjaftoi që shokët e mi të sulmit të shënonin disa gola dhe më pas të humbisja vendin e titullarit. Kjo nuk ka për të ndodhur më, sepse tani jam gati të jap gjithçka në fushë.
Gjatë kësaj kohe a keni pasur oferta nga ekipe të tjera?
Po, ka pasur disa klube, që kanë hyrë në bisedime me skuadrën, madje edhe jashtë Gjermanisë. Krerët e klubit më pyetën nëse doja të qëndroja dhe unë ua bëra të qartë se nuk kam ndërmend të largohem. E përsëris edhe njëherë: dua të tregoj te Karlsruhe se mund të shënoj shumë gola edhe në Bundesligën 1. Dikush nga pjesëtarët e stafit më tha se sezoni i dytë në Bundesligën 1 është më i vështirë se i pari, por mua më pëlqejnë sfidat. Për më tepër që më duket se këtë radhë ka edhe diçka personale, në kuptimin që dua patjetër të tregoj se kush jam. Ka edhe diçka tjetër përsa i përket merkatos, edhe trajneri Beker i kërkoi klubit me ngulm që unë të mos largohesha dhe kjo është një shenjë vlerësimi nga ana e tij.

Ligji për sportin, debate të ashpra në kuvend


"Nëse bëni një propozim të tillë, - iu drejtua deputeti Pandeli Majko kryeministrit, - a dilni garant se nuk do të ketë ndryshim të destinacionit të këtyre fushave sportive?" I menjëhershëm ka qenë reagimi i kryeministrit Sali Berisha. "Qeveria ka zero tagër në Tiranë, sepse qeveria e Tiranës jeni ju. Se çfarë do të bëjnë pronarët me territoret e tyre, këtë e ka për kompetencë Bashkia e Tiranës dhe jo qeveria. Ju keni shënjestër tjetërkund dhe jo mua", iu drejtua kryeministri Berisha deputetëve të opozitës. Nuk ka qenë në të njëjtën linjë me kryeministrin edhe deputeti, Dashnor Sula. "Zgjidhja është vetëm privatizimi i klubeve sportive. Për terrenet sportive sigurisht t'u kthehen ish-pronarëve, ndërsa për stadiumet jam kundër. Nëse nuk do të privatizojmë futbollin, nuk do të kemi zhvillim të tij. Ne duhet të bëjmë të pamundurën për një ligj të mirë për sportin. Nëse një stadium e merr ish- pronari, do të kemi konflikt me të gjithë qytetarët", shtoi deputeti demokrat. Deputetët e opozitës i kërkuan kryeministrit që të rishikojë edhe një herë çështjen e terreneve sportive në këtë ligj, dhe bashkë me deputetët e PS, kësaj nisme iu bashkua edhe LSI.

Vllaznia, të gjithë besojnë te kualifikimi i sigurt


Megjithatë ai kërkon kujdes për ndeshjen e kthimit. "Ishte një ndeshje e vështirë, pasi luanin përballë skuadrave më mirë të organizuara në infrastrukturë dhe në shumë drejtime të tjera, - vazhdon më tej trajneri. - Duke e ditur se ata e kanë filluar shumë më shpejt fazën përgatitore dhe kampionatin dhe duke pasur një kontingjent të stabilizuar. Ne kishim besim te forcat tona dhe e nisëm me shumë besim edhe lojën. Kishim mundësi edhe të trefishonim në rastet e shumta që krijuam. Ata na vunë nën presion për gjatë gjithë pjesë së dytë, megjithatë ne ia dolëm. Nëse në ndeshjen e kthimit do të jemi të përqendruar si në ndeshjen e parë, me siguri do të mund të arrijmë kualifikimin".

Shala bronz ne Ballkaniade




Per Klodianen, arritja e kohes kualifikuese per ne Olimpiade nuk ishte aspak e veshtire, por konkurrenca ne disiplinen e saj te gares se 400 metrave eshte shume e madhe. Sidoqofte, fakti qe Shala la dje pas disa nga pretendentet per te fituar medalje ne Ballkaniade eshte nje domethenie e madhe dhe tani nga Klodiana Shala pritet nje prezantim dinjitoz ne Olimpiade. Atletja do t'i bashkohet gjate ketyre diteve kampit olimpik kuqezi, ne te cilin bejne pjese plot 11 sportiste te disiplinave te ndryshme.

Altin Lala për rekord, 10 vjet me Hanoverin



Këtë punë ai nuk e dëshiron. "Kam kohë deri në moshën 34-vjeçare, pastaj do të jem diku në stafin drejtues të klubit. Trajner nuk besoj se do të bëhem ndonjëherë, sepse nuk më pëlqen. Arsyeja është e thjeshtë: ke në dispozicion 25 lojtarë, por vetëm 11 prej tyre do të luajnë, të tjerët më pas fillojnë dhe të urrejnë", ka thënë Lala për gazetën lokale të Hanoverit, "Hannoversche Allgemeine". Megjithëse nuk është më një djalosh i ri, shtatshkurtri shqiptar cilësohet ndër më të mirët në rolin e tij prej mesfushori shkatërrues në Bundesligën 1. "Në pozitat që jam, përvoja është tepër e rëndësishme. Edhe pse luaj prej dhjetë vjetësh te Hanoveri, mendoj se kam ende për të mësuar - është shprehur ai. - Gjithmonë dëgjoj me vëmendje kërkesat e trajnerit dhe mundohem t'i realizoj detyrat e mia me përpikmëri". Ai shquhet për lojë të ashpër, por vetë ai asnjëherë nuk e ka pësuar nga dueli me të tjerët. Edhe në këtë element të lojës është perfekt. "Peshoj vetëm 60 kilogramë dhe deri më tani askush nuk ka arritur të më dëmtojë në dyluftime. Është e pabesueshme", tha ai. Me sa duket mesfushori nuk e merr në konsideratë dëmtimin që i shkaktoi holandezi De Jong në ndeshjen me Kombëtaren më 11 tetor të vitit 2006, ku më pas Lalës iu desh të qëndronte jashtë fushave për gjashtë javë. Ai te Hanoveri është transferuar në korrik të vitit 1998 nga skuadra e rangut të ulët Borusia Fulda. Me Hanoverin ka kontratë deri në qershorin e vitit të ardhshëm. Deri tani është aktivizuar në 264 ndeshje dhe ka shënuar dhjetë gola. Me Kombëtaren e Shqipërisë ka realizuar 63 ndeshje dhe ka shënuar tre gola. Disa ditë më parë, para ndeshjes miqësore me Porton (1-1), bosi i Hanoverit, Martin Kind, i dhuroi Lalës një buqetë me lule për dhjetëvjetorin e tij në klub. Padyshim që një buqetë edhe më të madhe, Lala do ta marrë kur të varë këpucët në gozhdë pas dy vjetëve. Për këtë janë të sigurt të gjithë. Edhe vetë Lala.

Sukaj, më 2 gusht firma në kontratën 2-vjeçare



I gjendur në Turqi për të përfunduar bisedimet me ekipin vendas të Gençlebirligi, futbollisti shkodran dhe ekipit tonë kombëtar Xhevahir Sukaj shprehet se ka përfunduar gjithçka përsa i përket një kalimi të tij me këtë skuadër. Ai ka rënë dakord me drejtuesit e ekipit turk me të gjithë pika e parashtruara prej tij dhe me datë 2 gusht për Sukajn do të jetë vetëm formaliteti i firmës mbi kontratë. Bëhet fjalë për një kontratë dyvjeçare me të drejtë rinovimi për një vit tjetër (pra 2+1), me këtë ekip. Pavarësisht, se prej vetë lojtarit nuk jepet një shifër ajo që mësohet nga burime pranë tij është se kjo shifër është tepër e kënaqshme për vetë atë.

Ujkani, rikthehet interesi i Leçes për portierin


Samir Ujkani, portieri i përfaqësueses shqiptare, U-21 ka shkëlqyer në ndeshjen miqësore që Palermo ka fituar 9-0 kundër austriakëve të Nokberg. Ujkani është aktivizuar në pjesën e dytë, kur rezultati ishte 3-0 dhe megjithëse rivalët ishin dukshëm më të dobët, kanë rrezikuar disa herë portën e Palermos. Sipas uebsajtit "055news.it", talenti shqiptar si dhe dy futbollistë të rinj të skuadrës së Palermos janë vëzhguar nga disa menaxherë të Leçes. Kjo e fundit është në kërkim të një portieri dhe ka filluar bisedimet me klubin sicilian për të marrë shërbimet e gardianit shqiptar

Diego, në Pekin pa leje klubi



Pas diskutimesh me ditë të tëra, mesfushori i skuadrës së Verder Bremen, Diego, është nisur ditën e martë për në Lojërat Oli-mpike që do të zhvillohen në Pekin. Diego vendosi të marrë pjesë në Lojërat Olimpike me Brazilin, edhe pse skuadra e Verder Bremen s'e ka lejuar. "Unë do të shkoj në fillim në Paris ku është bërë grumbullimi i kombëtares braziliane", ka thënë mesfushori 23-vjeçar Diego pas një diskutimi të gjatë me drejtorin sportiv të Verder Bremen, Klaus Alofs. Ky i fundit bëri të ditur se do të ankohet në Gjykatën Ndërkombëtare sportive. "Kjo është zgjidhja më e mirë për të gjitha palët për të pasur qartësi. Një debat i tillë nuk dua që të përsëritet më te skuadra jonë", tha Alofs.

Pekin 2008, burg për ata që abuzojnë me biletat



Si në çdo kompeticion të rëndësishëm, edhe në Lojërat Olimpike të Pekinit tifozët po e vuajnë shumë çmimin e biletave, pasi shiten në të zezë me shifra stratosferike. Për të parandaluar një gjë të tillë, organizatorët e kompeticionit, në bashkëpunim me policinë kineze kanë bërë të ditur se personat që do të shesin bileta me çmime shumë më të larta se ato që janë vendosur nga organizatorët do të rrezikojnë gjoba të mëdha, madje edhe deri në 15 ditë burg. Një masë që pritet të ndikojë në këtë problem, ndërkohë që është kërkuar edhe bashkëpunimi i qytetarëve për të denoncuar çdo rast të tillë. Biletat që shiteshin nga organizatorët me 5 mijë jen, në të zezë kishin arritur deri në 210 mijë jen.

Hënes qetëson të gjithë: Riberi kthehet pas 6 javësh



Menaxheri i skuadrës së Bajernit të Mynihut, Uli Hënes, beson se mesfushori francez, Frank Riberi, do të kthehet te skuadra bavareze vetëm pas gjashtë javësh. "Riberi do të jetë i gatshëm për të luajtur pas vetëm gjashtë javësh. Ai do të rikthehet me fillimin e Ligës së Kampioneve", është shprehur menaxheri bavarez, Uli Hënes. Mesfushori i Kombëtares franceze është dëmtuar gjatë kampionatit evropian në ndeshjen në grup kundër Italisë. Hënes nuk e sheh si nja handikap të madh mungesën e Frank Riberisë për fillimin e sezonit. "Kemi mjaft lojtarë të mirë që mund ta kompensojnë mungesën e Riberisë", theksoi më tej Hënes.

Që nga shtegëtimet e para drejt Europës të korifenjve të futbollit shqiptar, Demollari, Musta, Minga, Kola, Millo, Lekbello, Abazi etj, në vitet e para të demokracisë e deri tek ai më i fundit, i Jahmir Hykës drejt Bundesligës të gjitha mbeten lajme që tërheqin vëmendjen e opinionit futbolldashës. Nëse dikur emrat që provonin një eksperiencë të tillë numëroheshin me gishtat e dorës, sot numri i tyre është rritur ndjeshëm, e për çdo ditë dëgjon konfirmimin për shtegëtimin e radhës. Madje mund të thuhet me plot gojë që tashmë ky është synimi kryesor i çdo futbollisti për të mos e çuar dëm talentin e tij në amatorizmin që mban peng futbollin tonë. Për shumë transferimet janë të vështira, jo vetëm për gjetjen e mundësive të kontaktit apo për shumat që do të përfitohen, por kur në mes shfaqet edhe talenti ata bëhen mëse të realizueshme. Kampionatet më të preferuara nga të gjithë mbeten Bundesliga e Serie A, por në pamundësi për t’u realizuar nga të gjithë, eksperiencat në kampionatet fqinjë apo edhe në ato lindore janë bërë trampolinë për afirmimin e tyre. Sa më shumë talente provojnë eksperiencat europiane aq më shumë rritet niveli i lojës i ekipit kombëtar, ndaj misioni i “pushimit” të Europës është kthyer në një synim për të gjithë futbollistët shqiptarë.

Një nga vendet ku më së shumti futbollistët shqiptarë kanë filluar të emigrojnë është pikërisht ishulli i Qipros, një vend ku futbolli në vitet e fundit është në rritje të vazhdueshme. Investimet në këtë sport dhe shpërblimet financiare për sportistët e trajnerët janë nga më të lartat, ç’ka bën që të jetë një vend i lakmuar. Dy emrat e fundit që kanë vendosur të militojnë në kampionatin qipriot janë Klodian Duro e Isli Hidi, dy futbollistë të ekipit kombëtar, i pari pas një ekperience zhgënjyese me Tiranën dhe i dyti pas një viti të mirë në Ukrainë. Sigurisht që qëllimi kryesor i transferimit të këtyre futbollistëve drejt Qipros është financiar, por ndër të tjera edhe për të patur mundësinë e një aktivizimi konstant me skuadrat respektive. Emri i Shqipërisë në këtë kampionat nuk është krejt i panjohur, pasi shumë prej futbollistëve të kombëtares kanë luajtur për shumë sezone me radhë në këtë kampionat dhe dy të fundit janë portiere Arjan Beqaj dhe mbrojtësi Altin Haxhi, që në kampionatet e fundit janë ndër futbollistët më të mirë të aktiviteteve vendase. Kur flitet për shifrat e përfitimit në këtë kampionat nuk mund të klasifikohen si modeste, pasi futbollistë si Duro apo Hidi kanë përfituar 4 ose 5 fishin e asaj që do të përfitonin nga aktivizimi në kampionat Shqiptar. Për momentin shihet si një nga pistat më të lehta për t’u realizuar edhe nga menaxherët

Futja në treg e skuadrave lindore natyrshëm përfshiu shumë prej futbollistëve shqiptarë dhe Ukraina ishte një ndër pistat më të preferuara edhe nga menaxherët, që u bënë “shkjesë” për të realizuar këto transferime. Dallku, Curri, Hidi, Bylykbashi, Bulku, Ndreka e ishin ndër të parët që “shkelën” në tokën e Shevçenkos, duke u bërë shumë shpejt protagonistë në këto kampionate. Edhe pse aktivizimi i tyre ka qenë me skuadra të nivelit mesatar, të cilat luftojnë për mbijetesën, këto mund të klasifikohen ndër transferimet më të rëndësishme të futbollistëve shqiptare. Kjo zgjedhje është e rëndësishme jo vetëm për nivelin profesional, ku futbolli ukrainas ka një rritje cilësore në vitet e fundit, por edhe në aspektin financiar, pasi kontratat e futbollistëve janë ndër më të mirat. Vlerat e tregut variojnë nga 150 mijë deri në 300 mijë euro në sezon në raste të veçanta, duke bërë që ky kampionat të jetë ndër më të preferuarit. Ndër të tjera për shumë futbollistë është shfrytëzuar edhe një si trampolinë e mirë për të tentuar perëndimin, siç është edhe rasti i dy futbollistëve kosovarë, Armend Dallku dhe Debatik Curri, të cilët janë përfolur për një kalim të mundshëm në kampionatin anglez. Gjithsesi për sezonin që vjen numri i futbollistëve shqiptarë në kampionat pritet të redukohet, pasi shumë prej futbollistëve kanë prishur kontratat për të të provuar eksperienca të tjera.

Debutim me fitore i Mourinjos


Debutimi i Muorinjos në pankinën e Interit festohet me një fitore nga ana e zikaltërve, edhe pse vetëm një miqësosre ndaj kampionëve të Arabisë Saudite. Golin e Interit e shënoi Burdiso me kokë mbas një goditje këndi, ndërkohë që për tu vecuar nga ky takim janë lëvizshmëria e Balotelit, Adriano shumë i çoroditur në fushë dhe Zaneti, gjithnjë i palodhshëm. Lojë e bukur nga Mansini e Himenez karakterizojnë pjesën e dytë, por ritmet janë të ulëta, nga ato të një miqësore të verës.

Barça presing për Trezegenë


Juventusi duket sikur nuk dëshiron t'i japë fund merkatos së përforcimeve, ndonëse në të njëjtën kohë i duhet të mbrohet nga sulmet e Barcelonës për sulmuesin francez, David Trezege. Aktualisht tifozeria bardhezi ndihet e zhgënjyer nga fushata e merkatos që kanë zhvilluar drejtuesit kuqezi. Faktikisht drejtuesit e "Zonjës së Vjetër" po punojnë akoma për tre objektiva, i pari që dëshirohet është Ksabi Alonson, i dyti Stankoviç dhe i treti Akuilani

Flamini "magjeps" Ançelotin


Ish-mesfushori i Arsenalit, Matjë Flamini, e ka paguar shumë faktin që ka mbërritur në Milano pa shumë shpenzime, pasi nuk kishte marrë përkrahjen e duhur nga publiku kuqezi. Por ka mjaftuar të luajë vetëm 90 minuta me fanellën e re, për t'i dhuruar sinjale pozitive klubit kuqezi. Tepër entuziast për paraqitjen e mesfushorit francez është shprehur edhe Karlo Ançeloti. "Flamini nuk është vetëm një lojtar interesant, por një kampion i vërtetë, - ka theksuar tekniku kuqezi. - Ka arritur të luajë shumë mirë si në fazën ofensive, ashtu edhe në atë difensive".

Dunga: Milani rigjeneroi Dinjon


Fjalët e trajnerit të Kombëtares braziliane Karlos Dunga, padyshim që do t'i gëzojnë në maksimum tifozët kuqezi, në të njëjtën kohë edhe drejtuesit e Milanit. Dunga, nga grumbullimi i Kombëtares braziliane në Pekin, ka bërë të ditur se transferimi i Ronaldinjos te Milani do ta rikthejë atë në lojtarin e dikurshëm, i cili magjepsi botën: "Ronaldinjo është një lojtar i rëndësishëm i skuadrës tonë, tashmë është përsëri i lumtur dhe kjo gjë është një faktor tepër i rëndësishëm për karrierën e një lojtari. Jam i bindur që duke shkuar te Milani ka bërë zgjedhjen e duhur për karrierën e tij. Tani që i është kthyer buzëqeshja, jam i sigurt se Ronaldinjo do kthehet ai i disa kohëve më parë".

Skela: Në Itali mendova largimin nga futbolli



Tani është idhull i tifozëve të Energi Kotbusit dhe trajneri i skuadrës e cilëson atë si një nga shtyllat e ekipit.

E megjithatë ka pasur një moment kur Ervin Skela ka vënë në pikëpyetje të ardhmen e tij si futbollist. "Ishte periudha kur unë luaja te Askoli, - ka rrëfyer Skela për "Bild". - Atëherë gjërat më ecën shumë keq, pasi nuk po arrija të luaja dhe përveç kësaj nuk isha në formë të mirë. Nëse menaxheri i Energi Kotbusit, Stefan Hidrih nuk do të më kishte marrë në telefon dhe nëse nuk do të isha transferuar te Kotbusi në muajin janar, sot ndoshta nuk do të luaja më futboll". Mesfushori është besimtar i rregullt dhe ndonëse nuk shkon përditë në kishë. "Unë nuk shkoj çdo ditë në kishë, por nëpërmjet prindërve të mi jam bërë shumë besimtar dhe jam rritur si një katolik i mirë. Ata kanë punuar shumë për mua, për të më dhënë mundësinë që të bëhesha një futbollist profesionist - ka thënë Skela. - Besoj te Zoti, sepse më ka ndihmuar në momentet më të vështira të karrierës. Edhe pasi u largova nga Askoli gjërat nuk shkuan siç duhet sepse unë u sëmura dhe nuk arrita të jepja kontributin e duhur për ekipin, por Zoti na ndihmoi dhe nuk zbritëm në Bundesligën 2".
Detyrimi
Karriera e mesfushorit të Kombëtares shqiptare ishte drejt përfundimit një vit më parë, por presidenti i klubit, Ulrih Leps dhe ish-trajneri Petrik Sander më mbështetën maksimalisht. Ata asnjëherë nuk u mërzitën edhe pse unë nuk po jepja atë që duhej. Nuk kam për t'ua harruar kurrë atyre ndihmën që më dhanë në ato momente të vështira. Për fat të mirë sezonin që shkoi isha në formë të mirë dhe mendoj se isha në lartësinë e duhur. Shënova gola dhe ndihmova ekipin të qëndronte në Bundesligën 1. Kjo ishte një tjetër shenjë që më bindi plotësisht se ka një Zot. Unë besoj shumë te ai dhe mendoj se është ai që më udhëheq", ka thënë fantazisti i përfaqësueses shqiptare. Skela u transferua te Askoli në verën e vitit 2006, por aty nuk gjeti hapësira dhe thuajse gjithë fazën e parë qëndroi në stol. Në janar të vitit 2007 ai kaloi te skuadra gjermane e Kotbusit, por aty u sëmur me verdhëz dhe iu deshën rreth dy muaj që të rikuperohej plotësisht duke mos arritur të jepte kontributin e duhur te skuadra e tij e re. Ai s’u dorëzua për asnjë moment, sepse një sezon më pas ai shkëlqeu në Bundesligën 1 gjermane, madje në fund u cilësua si një nga mesfushorët me rendimentin më të lartë.

Disiplina mblidhet për Shkëmbin

Të hënën Komisioni i Disiplinës do të mblidhet për të diskutuar në lidhje me ankesën e futbollistit Bledi Shkëmbi. Ky i fundit ka paraqitur një ankesë për përjashtimin nga drejtuesit e Partizanit, klub me të cilin ai ka një kontratë tre-vjeçare. "të hënën do të zhvillohet një mbledhje e Komisionit të Disiplinës enkas për çështjen e Blendi Shkëmbit, - pohoi shefi i sektorit të garave, ilir Shulku. - Lojtari ka paraqitur një ankesë, e cila do të shqyrtohet nga anëtarët e Komisionit dhe më pas do të merret një vendim". Mesfushori i Kombëtares shqiptare u përjashtua disa javë më parë nga Partizani, pas debatit që pati me presidentin e të kuqve, Albert Xhani. Ky i fundit i kishte kërkuar rinovim të kontratës, por lojtari i është përgjigjur duke i thënë se më parë duhet t'i japim paratë e rrogës së tre muajve të fundit, të cilat lojtari pretendon se nuk i janë shlyer. "Unë kam një kontratë të rregullt me Partizanin dhe dua ta respektoj atë. Nëse drejtuesit e Partizanit dëshirojnë t'i zgjidhin gjërat në këtë mënyrë, atëherë unë jam i gatshëm që t'iu shkoj gjërave deri në fund. Do të kërkoj të drejtat e mia edhe te organizmat ndërkombëtarë të futbollit, nëse do të jetë nevoja", tha lojtari.

Dejvid Xhill: Glejzërs s'e shet Ronaldon



Drejtori ekzekutiv i klubit të Mançester Junaitid, zbuloi ditën e djeshme bisedën me pronarët e klubit, familjen Glazers, të cilët vendosën të mos e shesin yllin portugez, kundrejt cilësdo oferte. Sipas Xhill, gjithçka u vendos në finalen e Moskës, kur spekulimet për kalimin e tij te Reali i Madridit kishin filluar. "Me ta u takuam në finalen e Ligës së Kampioneve dhe që aty morëm mbështetjen për të mbajtur në "Old Treford", Kristiano Ronaldon. Ishte vetëm një bisedë e shkurtër dhe e shpejtë, ajo që mori vendimin për të plotësuar kushtet financiare të Ronaldos, duke e detyruar të mos kërkojë më tepër. Kjo nuk do të thotë se shitja e Ronaldos nuk do të ndodhë më vonë, por tani", the Deivid Xhill.