Info sport

informacione te pergjitheshme ne ledhje me te gjitha sportet

Fantazisti i Milanit e ka parë skuadrën e tij duke humbur nga dy gola të vonshëm, derisa ai dhe bashkëlojtarët ishin të tërhequr thellë në mbrojtje nga sulmet e skuadrës së re dhe energjike të Arsenalit, që fitoi nëpërmjet golave të Cesc Fabregas dhe Manuel Adebayorit.
Braziliani nuk ka pasur hapësirë që të manovrojë dhe ta bëjë lojën e tij, derisa ka kërkuar ndryshime rrënjësore në skuadër dhe largimin e futbollistëve në moshë te Milani.
"Në fund të stinorit, disa lojtarëve u skadon kontrata dhe klubi duhet të vendosë se si t'i zëvendësojë ata. Arsenali ka luajtur shumë mirë në të dyja ndeshjet. Nuk ishim shumë efektivë sa duhet. Kjo skuadër aktuale ka bërë shumë në të kaluarën për klubin dhe tifozët. Fatkeqësisht, jo edhe kësaj radhe", tha Kaka.
Ai ka insistuar se do t'i mbetet besnik skuadrës sikur kapiteni Paolo Maldini, i cili, me gjithë moshën 40-vjeçare, dukej se ishte i vetmi që dëshironte ta kualifikonte Milanin në ndeshjen e së martës mbrëma.
"Do të jetë shumë vështirë për ne këto ditë. Liga e Kampionëve ka qenë synimi ynë dhe tani duhet vetëm të luftojmë për vendin e katërt në Itali", tha Kaka.
"Është koha të falënderohen veteranët dhe të përshëndeten nga Milani", ka pohuar Kaka. Derisa mediat italiane kanë spekuluar për të ardhmen e Milanit, që mendohet të projektohet nga ish-selektori që e bëri Italinë kampione të botës, Marcello Lippi.

Sulmuesi kosovar Shefki Kuqi, i cili në pjesën e dytë të sezonit është kthyer tek skuadra angleze e ligës së dytë Crystal Palace, pas pjesës së parë të kaluar në Premierligë tek Fulham, ka thënë se ka gjasa që në fund të sezonit të largohet tërësisht nga futbolli anglez.
“Kam biseduar me menaxherin tim dhe ai më ka treguar se ka disa skuadra të interesuara për mua jashtë Anglisë. Ka shumë mundësi që gjatë verës të largohem nga futbolli anglez”, ka thënë Kuqi për të përditshmen kosovare “Express”.
Sulmuesi, i cili mbron ngjyrat e kombëtares së Finlandës, ka pohuar po ashtu se ka pasur edhe shumë skuadra të ligës së dytë që janë interesuar për shërbimet e tij, porse dëshira për të kaluar në një ekip ku mund të ketë sukses e ka shtyrë të qëndrojë tek Crystal Palace, deri në fund të sezonit.
Në Crystal Palace, Kuqi erdhi në vitin 2006 për një shume prej 2.5 milionë euro, pas një sezoni të shkëlqyeshëm tek Blackburn Rovers. Pjesën e parë të këtij sezoni sezonit ai e kaloi si huazim tek ekipi i Premierligës, Fulham, ku dështoi të jetë pjesë e formacionit startues

Mesfushori i Milanit, Andrea Pirlo, ka thënë se ka ekzistuar mundësia që ai të kishte kaluar tek Reali i Madridit gjatë verës së kaluar, pas krizës së montimit të ndeshjeve, që kaploi edhe rosonerët.
Milani në fillim ishte dënuar me 15 pikë dhe një vit përjashtim nga Liga e Kampionëve. Megjithatë, pas apelit, ishte lejuar të marrë pjesë në garën evropiane të klubeve më të mira dhe zbritja e pikëve ishte zvogëluar nga 15 në tetë.
Sidoqoftë në mes ndëshkimit fillestar dhe atij final, e ardhmja e Pirlos ishte shumë e dyshimtë dhe nëse apeli do të kishte dështuar, klubi do të ishte detyruar, si edhe Juventusi, të shesë shumicën e top yjeve.
“Gjatë verës 2006 qarkullonin fjalë për një kalim të mundshëm në Real Madrid”, ka thënë Pirlo. “Ishte e pazakonshme për shkak se skandali Calciopoli sapo kishte shpërthyer, por në fund zgjodha të mbetem këtu”.
Pirlo ka komentuar edhe ndeshjen e fundit të luajtur në Ukrainë kundër Shakhtarit në garat e Ligës së Kampionëve, duke thënë se ishte një ndeshje e rëndësishme dhe se tri pikët e fituara janë garanci për kualifikimin e Milanit në fazën e ardhshme

Presidenti i kampionit evropian Milan, Silvio Berlusconi, ka thënë se klubi do të ishte i interesuar të nënshkruajë me sulmuesin Adriano, nëse ai dëshiron ta lëshojë klubin rival të qytetit, kampionin aktual të Italisë, Interin.
Braziliani ka pasur një kohë tmerrësisht të keqe, si brenda edhe jashtë fushe, gjatë 18 muajve të kaluar. Ai ka luajtur vetëm katër herë gjatë këtij sezoni dhe nuk ka dalë në fushë as edhe një minutë të vetme në tri ndeshjet e fundit të Interit në Serie A, kundër Palermos, Genoas dhe Juventusit.
“Adriano dëshiron të largohet nga Inter? A do ta marrim? Mund të them se nuk ka asnjë ekip në botë që nuk do ta dëshironte Adrianon”, ka thënë Berlusconi.
Braziliani ka thënë dje se ende po vuan nga depresioni pas vdekjes së babait të tij, ndërsa ish kryemistri italian ka komentuar problemet e fundit personale të Adrianos. “Gjithçka varet nga atmosfera rreth tij”, ka thënë 71 vjeçari.

Nevil Dede nuk është përfshirë në listën e futbollistëve të grumbulluar nga trajneri Ari Han për ndeshjen që kombëtarja do të zhvillojë kundër Polonisë. Por vetë futbollisti e ka cilësuar këtë si normale, për vetë faktin se trajneri holandez nuk i dinte cilësitë e tij. Në një prononcim për "albaniasoccer.com", Dede ka treguar mendimet e tij rreth kësaj liste dhe faktit që ai nuk ishte përfshirë në planet e trajnerit. "Mosthirrja me skuadrën kombëtare nuk më ka mërzitur. Por mund të them se më ka habitur, thjesht nga pikëpamja personale.

E kam thënë edhe më parë, Han është një trajner i sapoardhur në drejtimin e skuadrës dhe si çdo trajner i ri ka mendimet e veta se çfarë do të bëjë me skuadrën. Për këtë arsye, ai ndoshta ka menduar që unë nuk mund t‘i përshtatem lojës dhe ideve që ai ka, ndonëse nuk kemi biseduar. Ndoshta, pas një vështrimi të mëtejshëm të skuadrës dhe lojtarëve që i duhen ai edhe mund të ndryshojë mendje. Ai është trajneri i skuadrës dhe unë i respektoj vendimet e tij, pa asnjë ndikim personal, më pëlqejnë apo jo ato. Nuk besoj se është mosha arsyeja, sepse trajneri holandez ka aq eksperiencë dhe e di se mosha që kam unë nuk është aspak faktor ndikues nëse unë jam në gjendje fizike apo teknike. E njëjta situatë ka ndodhur me Brigel dhe ndryshoi me Bariç. Ndoshta ndryshon edhe me Han në të ardhmen. Ndonëse unë nuk jam në përbërje të saj, dëshiroj për të gjithë lojtarët e thirrur dhe stafin drejtues që të arrijnë sa më shumë rezultate pozitive që ta nderojnë vendin tonë dhe pse jo të zëmë një vend sa më të lartë në kualifikimet e radhës", deklaroi mbrojtësi që është aktivizuar si titullar gjatë të gjithë edicionit të kaluar të përfaqësueses kuqezi. Futbollisti, aktualisht, aktivizohet në kampionatin kinez, ku po luan rregullisht, pavarësisht disa dëmtimeve që ka pasur në fillimin e sezonit. Futbollisti ka treguar edhe eksperiencën e deritanishme në kampionatin kinez, si edhe formën që po kalon. "Rëndësi ka që dëmtimet nuk kanë qenë serioze dhe më kanë lejuar që të luaj dhe të stërvitem sistematikisht në seancat disaorëshe çdo ditë. Kemi skuadër të mirë, po na duhen 2-3 përforcime. Por edhe ndeshjet e para kanë qenë shumë të forta, pasi kemi luajtur me skuadra të cilat ose kanë qenë të renditura shumë lart në edicionin e kaluar, ose kanë qenë midis 4-5 më të fortave këtë sezon", tregoi Dede.

Polonia konfirmon miqësoren me Shqipërinë në muajin maj. Pasi janë tërhequr në një moment të parë, për shkak të pezullimit që kishte futbolli ynë nga FIFA dhe UEFA, Federata Polake vendosi që ndeshja të luhet sipas axhendës. Shkak është bërë firmosja dhe regjistrimi i statutit të FSHF-së, që i ka hapur rrugë rikthimit të Shqipërisë në arenën ndërkombëtare. Gjatë paradites së të premtes, drejtuesi më i lartë i futbollit në Poloni, Mikail Listieuicz, ka konfirmuar zyrtarisht miqësoren në Reutlingen të Gjermanisë, sipas marrëveshjes që dy federatat kishin arritur më 1 shkurt 2008.

"I dashur zoti sekretar i përgjithshëm (i FSHF-së), së pari ju falënderoj për faksin e datës 23 prill. Duke marrë në konsideratë kërkesën tuaj, por edhe informacionet e FIFA-s rreth faktit se pezullimi i vendit tuaj do të hiqet shumë shpejt, dëshirojmë të rikonfirmojmë miqësoren Shqipëri-Poloni, e planifikuar për t‘u luajtur më 27 maj 2008 në Reutlingen të Gjermanisë", citohej në faksin e mbërritur dje në zyrat e Federatës Shqiptare. "Në të njëjtën kohë, ne dëshirojmë të ndihmojmë federatën tuaj në këtë situatë të vështirë, që të kthehet aktive në familjen e futbollit botëror. Kushtet për ndeshjen miqësore janë të njëjtat me ato që janë përmendur në faksin e datës 1 shkurt 2008". Në këtë mënyrë, Polonia e drejtuar nga Leo Benhaker do të luajë përballë kuqezinjve, në atë që do të jetë edhe prova e parë e parë zyrtare e Ari Han në krye të përfaqësueses. Sipas zyrës për shtyp në FSHF, miqësorja është përshëndetur edhe nga tekniku holandez, i cili më në fund do të ketë shansin që të njohë futbollistët. Shefi i kësaj zyre, Tritan Kokona, ka saktësuar se për miqësoren me polakët ka ndikuar shumë edhe FIFA: "Menjëherë pas regjistrimit të statutit në gjykatë, FIFA dhe UEFA janë lajmëruar me një relacion dhe ato premtuan se do të mblidhej menjëherë Komiteti i Emergjencës, në mënyrë që Shqipërisë t‘i hiqej pezullimi. Megjithatë, problemi qëndronte se sot (dje) është e premte dhe duke pasur parasysh se përpara është fundjava, vendimi mund të zgjasë deri në fillim të javës së ardhshme. Kjo vonesë mund të ndikonte negativisht për zhvillimin e ndeshjes miqësore, e FIFA ka vendosur që t‘i qetësojë drejtuesit e Federatës Polake, edhe sepse për shkak të pezullimit kombëtarja ka humbur dy miqësore, me Arabinë Saudite dhe Moldavinë. Gjithsesi, për konfirmimin e ndeshjes vlen të përmenden edhe qëllimet e mira të polakëve, që rikonfirmuan miqësoren e 27 majit në Reutlingen".

Kokona ka saktësuar gjithashtu se më 21 maj, vetëm 24 orë pas fillimit të grumbullimit në Gjermani, kombëtarja do të zhvillojë një miqësore me ekipin zviceran të Shafhauzenit. "Do të jetë një takim i lehtë testues, edhe për faktin se skuadra do të mblidhet vetëm një ditë më parë. Ata janë skuadra e një qyteti zviceran në kufi me Gjermaninë dhe do të udhëtojnë drejt vendit ku do të jetë e grumbulluar përfaqësuesja". Shafhauzen militon në kategorinë e dytë zvicerane, Challenge League, dhe aty militojnë katër lojtarë me origjinë shqiptare (Shkëlzen Gashi, Genc Mehmeti, Gëzim Sadiku e Allmir Ademi). Ndërkohë, sot në Tiranë do të mbërrijë trajneri Han, që do të jetë i pranishëm në derbin Partizani-Tirana. Ai do të kontaktojë edhe me zyrtarë të FSHF-së, për të rakorduar hollësitë e fundit të grumbullimit në Gjermani, ndërsa të dielën do të largohet nga vendi ynë.

Drejtuesit e Tiranës kanë vendosur të ndëshkojnë skuadrën pas dështimit në finalen e Kupës së Shqipërisë. Në mbledhjen e zhvilluar dje, ndërmjet donatorëve, shefit të klubit, stafit teknik dhe futbollistëve në ambientet e "Hotel Tirana" janë marrë dy vendime: pezullimi pa afat i tre futbollistëve, (Klodian Duro, Endri Vrapi dhe Ervis Sina) si edhe masën me gjobë për të gjithë kontingjentin. Lojtarëve do t‘u mbahet 35 për qind e shumës së kontratës, e cila parashikohej në një klauzolë të veçantë për mosplotësimin e objektivave në kampionat dhe Kupë.
Ndërkohë, arsyeja e pezullimit të tre lojtarëve, të zëvendësuar në pjesën e dytë të ndeshjes së humbur 2-0 me Vllazninë, të cilët janë përfshirë edhe në një debat të ashpër me donatorin e dorëhequr Refik Halili, ishte mungesa e impenjimit. "Mbledhja ka sjellë dy vendime të rëndësishme: tre lojtarët e përjashtuar të mërkurën kanë marrë masën e pezullimit pa afat me motivin për mosimpenjim në ndeshjet e Tiranës", tha shefi i klubit, Edi Gjini. "Ky ishte vendimi i të gjithë donatorëve së bashku. Gjithashtu, e gjithë skuadra do të ndëshkohet me një gjobë prej 35 për qind të kontratës. Çdo lojtar ka në kontratën e tij një klauzolë ku theksohet qartë se do t‘u mbahet 30 për qind e pagës në rast se nuk fitojnë titullin kampion dhe 5 për qind në rast se nuk fitojnë Kupën e Shqipërisë". Drejtuesi i klubit, i emëruar vetëm pak muaj më parë në vend të Shkëlqim Muçës shkoi edhe më tej. Sipas tij, 35 për qindëshi bën që futbollistët të jenë debitorë ndaj klubit, pasi shuma është më e lartë se rrogat e tre muajve të fundit që bardheblutë duhet të marrin. "Duke qenë se Tirana ka dështuar në të dy trofetë, detyrimi i lojtarëve kundrejt klubit shkon në 35 për qind të pagës vjetore. Aktualisht, skuadra ka marrë pagat e nëntë muajve, por shuma prej 35 për qind të kontratës së secilit, është diçka më tepër sesa 3 muajt e fundit që lojtarët kanë për të marrë, shpjegoi ai. Në një farë mënyre, të gjithë futbollistët e Tiranës janë debitorë ndaj skuadrës, dhe duhet të kthejnë paratë që të plotësohet shuma e barasvlefshme me gjobën, që duhet të paguajnë për dështimet e këtij sezoni".
Një tjetër çështje e prekur në mbledhjen e djeshme, e cila është zhvilluar pa praninë e mediave, është folur edhe për fatin e trajnerit. Pas humbjes në finale, Sulejman Mema ishte shprehur i gatshëm për t‘u larguar nga detyra. Por, duke qenë se ai është tekniku i tretë i ulur në stolin bardheblu gjatë këtij sezoni dhe se nga mbyllja e kampionatit mungojë vetëm tri javë, u vendos që Mema të mos largohet. "Për trajnerin Mema do të diskutohet pas përfundimit të kampionatit", saktësoi Gjini

Në vitin e katërt nën drejtimin e donatorëve, Tirana ka kaluar një prej periudhave më të këqija në historinë 88-vjeçare të klubit. Rezultatet më të këqija të regjistruara ndonjëherë dhe pasiguri absolute. Askush në skuadër nuk është ndier për një moment i qetë: sezoni ka filluar me largimin e trajnerit Starova vetëm pas tri javëve të para të Superiores. Pak kohë më vonë u pezullua pa afat të mbrojtësi Nevil Dede, i cili më pas është rikthyer në skuadër, ndërsa gjatë merkatos së janarit ka preferuar të transferohet në kampionatin kinez. Përpara mbylljes së vitit 2007 nga skuadra u përjashtuan Oriand Abazaj dhe Eldorado Merkoçi. Me pezullimet e Duros, Vrapit e Sinës, numri i lojtarëve ndaj të cilëve janë marrë masa shkon në gjashtë. Ndërkohë, në sezonin e turbulluar të 23 herë kampionëve regjistrohen edhe largimi i shefit të klubit, Shkëlqim Muça dhe qëndrimi për 14 javë në krye të ekipit, i teknikut Astrit Hafizi.

Kristiano Ronaldo ka lënë të kuptohet se nuk do të largohet nga Mançester Junajtid për sa kohë që Aleks Ferguson do të drejtojë këtë skuadër. Ai ka treguar për gazetën "News of the World" se trajneri skocez është arsyeja kryesore pse ai nuk ka pranuar ende ofertat marramendëse që i kanë ardhur nga Reali i Madridit. "Shefi është arsyeja kryesore pse unë jam në këtë klub. Ai më ka ndihmuar shumë, jo vetëm në këtë sezon, por edhe në ata paraardhës. Ndjehem shumë mirë në këtë klub dhe dua të vazhdoj në këtë mënyrë, pasi kam shumë miq këtu.
Kam pesë vjet në këtë klub dhe më duket vetja si në shtëpi", deklaroi Kristiano Ronaldo.

Ka shënuar një tjetër gol me kombëtaren, të mërkurën, në ndeshjen e parë stërvitore të “erës Han”, ndaj Shafhauzenit zvicerian, teksa ky është goli i tretë i sulmuesit Edmond Kapllani në tre ndeshjet e fundit të zhvilluara me përfaqësuesen. Ka shënuar ndaj Bjellorusisë dhe Rumanisë, edhe pse kombëtarja e drejtuar nga Bariç i ka humbur këto ndeshje, teksa vjen përsëri dhe shënon në ndeshjen e parë të trajnerit Han si kryepankina e Shqipërisë. Mos ndoshta fati që ai ka patur tek Karlsruhe dy sezone më parë është kthyer tek kombëtarja shqiptare. “Edhe kjo mund të jetë”, të sqaron Kapllani, i cili, megjithatë nuk është shumë entuziast për golin ndaj Shafhauzenit, pasi, sipas tij, ai nuk ka për qëllim të tregojë asgjë. ”Ajo ishte një ndeshje stërvitore dhe nuk kam dëshirë të kapem atje, por me duhet ta pranoj se është një fakt që golat me kombëtaren tashmë po vijnë më lirshëm sesa ato me skuadrën time, Karlsruhen. Ndoshta, sepse, ashtu si dy vjet më parë tek Karlsruhe, tashmë unë ndihem më i fortë tek kombëtarja. Pastaj edhe impakti i kalimit në Bundesligën 1, siç e kam thënë, ishte i fortë për mua”. Dikur ai ka thënë: “Të gjitha golat me Karlsruhen i ndërroj për një të rëndësishëm me kombëtaren”. i përmbahet ende kësaj llogjike? “Tani do them të kundërtën. Jo, në të vërtetë më bëhet qejfi që po shënoj me kombëtaren, edhe pse unë them se golat e rëndësishëm nuk kanë ardhur ende me fanellën kuqezi”. A e kënaq ky grup Kapllanin? “Unë mendoj se ishim mirë. Ka lojtarë shumë të mirë nga kampionat shqiptar, të cilët janë të denjë të luajnë me fanellën e përfaqësueses. Megjithatë, prova jonë e vërtetë do të jetë ndeshja ndaj Polonisë”, ka përfunduar ai. Dhe një gol atje, do të ishte “oguri” më i mirë për një sezon “goleadori” për të. Në fund të fundit pesë gola në një edicion me fanellën e përfaqësueses nuk janë pak.

Bogdani do të rifillojë stërvitjen me skuadrën e Kievos pas pushimeve e megjithatë kjo nuk do të thotë se përfundimisht do të qëndrojë te ky ekip. “Kievo e ka grumbulluar për fazën përgatitore, megjithatë deri në datën 31 gusht shumë gjëra mund të ndodhin”, thanë mediat italiane në lidhj me shqiptarin

Talenti brazilian Ronaldinjo është larguar me pushime në Brazil me lejen e drejtuesve të Barcelonës, edhe pse nuk është bërë e ditur data e kthimit. Në këtë mënyrë, Ronaldinjo i shtohet mungesave të lojtarëve të tjerë për ndeshjen miqësore që Barça do të luajë në Arabinë Saudite të hënën e ardhshme. Një takim që nuk dihet ende nëse do të zhvillohet sepse Barcelona ka 16 lojtarë të padisponueshëm, midis tyre tetë do të jenë me kombëtaret në Europiamn, pesë janë të dëmtuar, ndërsa Samuel Eto’o dhe Leo Mesi janë të grumbulluar me kombëtaret e tyre. Edhe pse Ronaldinjo i ka dhënë lamtumirën shumë shpejt këtij sezoni, përsëri në kampin katalanas janë shumë të shqetësuar për atë që po ndodh me talentin brazilian, i cili ende nuk ka vendosur për të ardhmen e tij. Barcelona dhe Milani duket se janë në bisedime e sipër, por ende nuk është gjetur një marrëveshje përfundimtare. Duket se do të jetë shumë e vështirë, duke patur parasysh që braziliani ka vendosur të shkojë me pushime dhe të mos bëjë të ditur se kur do të kthehet. Megjithatë, bisedimet për të ardhmen e tij janë në dorë të Barcelonës dhe menaxherit Roberto de Asis, i cili ka shumë kohë që nuk prononcohet për të ardhmen e vëllait të tij. Gjërat nuk aq të lehta sa duken, edhe pse te Barcelona kanë frikë se Ronaldinjo nuk do të kthehet më, por do të vendosë të ardhmen e tij që nga Brazili. Mos ndoshta largimi i brazilianit me pushime ishte një lamtumirë e heshtur me Barcelonën? Frika në kampin katalanas ekziston, edhe pse një ndër asryet e shumta që Dinjo ka shkuar në Brazil është edhe rikuperimi sa më i shpejt nga dëmtimi.

Dyshime edhe për baste në ndeshje të kampionatit 2006-‘07, të fituar nga zikaltrit.

Interi e sheh veten në qendër të skandalit të radhës në Serinë A. Pas pikëve të humbura gjatë rrugës dhe titullit të vënë në pikëpyetje, rreziku kryesor vjen nga një hetim i mundshëm për zikaltrit.
Disa nga pjesëtarët e skuadrës, zyrtarë të klubit, por edhe ish-futbollistë të famshëm, shfaqen në dosjet e një hetimi për trafikun e drogës, prostitucionit dhe mallrave luksozë. Të gjitha materialet e mbledhura nga prokurorët italianë janë siguruar nëpërmjet përgjimeve telefonike.
Pra, në një farë mënyre, celularët janë shndërruar në ankthin më të madh të Serisë A, pasi pas skandalit "calciopoli", ku vetëm Interi doli i fituar, tashmë janë arkivuar përgjime të reja, që këtë radhë tronditën klubin e Masimo Moratit. Madje, ka edhe më keq, pasi disa futbollistë dhe trajneri Roberto Mançini akuzohen për baste në ndeshjet e kampionatit të kaluar, i cili është fituar nga Interi, por edhe për ndere nga gjyqtarët. Megjithatë, për momentin, asnjëri prej tyre nuk figuron në listën e të hetuarve.
Çështja fillon nga një rrobaqepësi në Sarono dhe nga pronari i saj, Domeniko Breshia, një personazh që në të kaluarën frekuentonte rregullisht Pinetinan. Ai është mes personave të hetuar nga Prokuroria Antimafie e Milanos, për organizatë keqbërëse të llojit mafioz.
Nga përgjimet e telefonatave që i janë bërë Breshias është konstatuar se ai kishte marrëdhënie të afërta me zikaltrit. Emrat që qarkullojnë janë të teknikut Mançini, ndihmësit të tij, Sinisha Mihajloviç, futbollistëve Zlatan Ibrahimoviç, Havier Zaneti e Marko Materaci. Përveç tyre, lidhje me të dyshuarin kishin edhe ish-lojtari zikaltër Alesandro "Spilo" Altobeli, asistent/trajneri Fausto Salsano, një punonjës i Interit, i quajtur Roko Di Stasi, drejtuesi i qendrës së koordinimit të tifozëve, Fausto Sala, dhe një gazetar i paidentifikuar, për të cilin dihet vetëm se drejton një dyqan me impiante elektrike. Përgjimet e telefonatave kanë zbuluar edhe një xhiro autoveturash luksoze, orësh të shtrenjta dhe femra që mafiozi Breshia ia gjente interistëve nëpërmjet një shokut të tij.
Por, akuzat bëhen edhe më të forta, pas përgjimeve të policëve të Trentos: duket se ata kanë regjistruar telefonata, të cilat u referohen basteve sportive të vendosura nga vetë zikaltrit gjatë ndeshjeve të sezonit 2006/2007, që në fund është fituar nga Interi.
Sipas mediave italiane, tashmë telefonatat e përgjuara kanë kaluar në dorën e hetuesve, që duhet të studiojnë një pjesë të bisedave, përbërësit e të cilave cilësohen të dyshimta. Në fakt, ekzistojnë dyshimet se disa terma të përdorur shërbenin për të fshehur kuptimin e vërtetë të disa frazave.

Humbja në shtëpi me Palermon ka bërë që tifozët e Lacios të pozicionohen kundër skuadrës. Mes lojtarëve të kontestuar është edhe Igli Tare, që të dielën u aktivizua përgjatë gjithë 90 minutëshit.


Mediat italiane e kanë vlerësuar me nota pozitive lojën e shqiptarit, i cili ka nxjerrë në pozicion shënimi shokët e skuadrës, madje është paraqitur edhe dy herë i vetëm me portierin (pa shënuar), por të të njëjtit mendim nuk janë mbështetësit bardhekaltër.
"Tifozët janë të hidhëruar për sjelljen e lojtarëve: pa shpirt dhe pa zemër! Nuk ka fjalë për ta përshkruar paraqitjen kundër Palermos", citohej në forumet e tifozëve. "Faji? Është i të gjithëve. Skuadra ka futbollistë që mund të luajnë vetëm në Serinë B, që djersinë në fushë vetëm se ka diell".
Tifozët lacialë nuk janë kursyer as për ish-kapitenin e kombëtares shqiptare, që në periudhën kur qëndronte pafundësisht në stol e vlerësonin, sepse nuk krijonte polemika. "Tare të largohet, nuk është i denjë për këtë fanellë", shkruanin tifozët.

Lajmi i publikuar disa ditë më parë në gazetën "L‘Equipe" rreth interesimit të Realit të Madridit për Lorik Canën, ka hapur një debat mes tifozëve të kampionëve të Spanjës.


Në faqet e ndryshme të internetit komentohen paraqitjet e futbollistit kuqezi, si dhe fakti nëse ai duhet të blihet apo jo nga presidenti Kalderon gjatë merkatos verore. Në forumin e "mercafutbol.com", tifozët janë të ndarë mes atyre që mendojnë se futbollisti shqiptar i shërben skuadrës dhe atyre që mendojnë se Cana nuk është i vlefshëm për madrilenët.
"Ka karakter, forcë, agresivitet", shkruan një nga tifozët. "Shihni videot e tij në internet, është një mur i vërtetë dhe ka kurajo. Do të jetë një blerje e goditur", shkruan përdoruesi me nofkën Alber.
"Është një makinë dhe do të jetë Redondo i ardhshëm", shkruan një tjetër përdorues, me pseudonimin madrilista. Por ka edhe prej atyre që mendojnë se blerja e Canës do të ishte e kotë, pasi Realit nuk i shërbejnë lojtarë të tillë.
"Ia vlen si lojtar, por shkakton faulle çdo minutë", shkruan Ejjs.
"Cana është një shkatërrues i mirë, por nuk di ta pasojë topin. Madridit i duhet një lojtar i ekuilibruar", ishte komenti i përdoruesit Barracuda.

Valon Behrami ka refuzuar ofertën e bërë nga drejtuesit e Lacios, për të rinovuar kontratën që e lidh me klubin roman deri në vitin 2010.

Mesfushori kosovar me pasaportë zvicerane nuk ka pranuar ofertën që i është bërë nga presidenti Lotito: edhe 5 vjet të tjera me bardhekaltërit dhe rrogë 600 mijë euro në sezon.
Tashmë, 23-vjeçari duket shumë pranë largimit nga kryeqyteti italian dhe destinacioni më i mundshëm është Primera Division spanjolle, ndërkohë që nuk mund të "injorohen" kërkesat nga Bajerni i Mynihut në Gjermani dhe Totenhem në Angli.
Lacio e vlerëson 15 milionë euro kartonin e Behramit, por mesfushori mund të shfrytëzojë nenin 17 të FIFA-s, për largim dy vjet përpara fundit të kontratës.
Në këtë rast, vlera e tij do të binte ndjeshëm, pasi klubet e interesuara duhet t‘u paguajnë bardhekaltërve vetëm shumën e dy viteve rrogë, plus disa para më shumë dhe në total shifra shkon në afro 2 milionë euro.

Çelsi po përgatitet të ofrojë 80 milionë sterlina (rreth 102 milionë euro) për talentin e Barcelonës, Lionel Mesi. Lajmi për shumën më të lartë të paguar ndonjëherë në histori për një futbollist është bërë i ditur nga "News of the World".
Superoferta është dukshëm më e lartë se rekordi i transferimeve, kur në vitin 2001 Reali i Madridit i pagoi Juventusit 46,5 milionë sterlina (76 milionë euro) për Zinedin Zidan. Drejtuesit e Barçës këmbëngulin se Mesi nuk është në shitje, por shuma marramendëse mund t‘i joshë që të rishikojnë qëndrimin e tyre. Të paktën, kjo është ajo që blutë shpresojnë. Interesimi për talentin argjentinas dihej, por 102 milionë eurot e përgatitura për ta blerë janë zhvillimi më i fundit në klubin e zotëruar nga Roman Abramoviç. Manjati rus synon të bëjë ndryshime rrënjësore në skuadër dhe gjatë merkatos së verës shpreson të afrojë lojtarë që do t‘i siguronin Çelsit futbollin spektakolar.
Miliarderi është lodhur me lojën pa fantazi të londinezëve dhe trajneri Avram Grant duket se e ka bindur të bëjë një investim të madh. Kjo do ta ndihmonte skuadrën të ngrihej në nivelin e rivalëve të Premiershipit, Mançester Junajted dhe Arsenal, të cilat vlerësohen për lojën plot fantazi. Sipas gazetës tjetër angleze, "The Sun", Abramoviç ka mbetur i mahnitur nga mënyra sesi Lionel Mesi u paraqit në gjysmëfinalen e kthimit ku në "Olld Traford" Barça u eliminua nga Liga e Kampioneve prej Junajted. 20-vjeçari ishte protagonisti kryesor në lojën ofensive të katalanëve dhe Abramoviç është i bindur se edhe Çelsi duhet të luajë në mënyrë aq spektakolare. Në këtë mënyrë shpjegohet edhe arsyeja e afrimit të Henk Ten Kejt, në postin e zv/trajnerit të bluve. Holandezi është mjaft i lidhur me Mesin dhe e ka aprovuar interesimin e klubit për argjentinasin. Një burim pranë Çelsit pohoi për tabloidin se: "Roman (Abramoviç) është i bindur se Mesi mund të ndryshojë tërësisht pamjen e Çelsit dhe është i gatshëm të shpenzojë gjithçka që nevojitet për ta afruar argjentinasin në skuadër. Ai e ka dëshiruar gjithmonë llojin e futbollistit që Mesi përfaqëson.
Kur trajner ishte Hoze Murinjo, Abramoviç e pranoi mënyrën e lojës së portugezit, pasi ajo i solli klubit disa trofe, por tashmë ai është mërzitur prej saj. Grant synon të ndryshojë disa gjëra, por ka shpjeguar edhe se duhet kohë dhe para për të ngritur kualitetin. Tashmë, ka ardhur koha që Roman t‘i financojë ndryshimet".
Po sipas mediave britanike, Mançester Siti është rikthyer në "pol" për yllin tjetër të Barcelonës, Ronaldinjo. Klubi i zotëruar nga Shinauatra është gati të paguajë 40 milionë eurot e pretenduara nga katalanët. Nga ana tjetër, fantazistit brazilian i është ofruar një rrogë mbi 150 mijë euro në javë.

Kanë mjaftuar 24 orë nën drejtimin e një Njëshi dhe jo më të një “katriade” që ambienti bardheblu të buçasë. Trajneri, lojtarët që mund të largohen, ata që mund të afrohen e gjithçka që ka të bëjë me ndërtimin e një Tirane kompetitive për sezonin e ri larg asaj që u shfaq gjatë 2007-2008. Sipas burimeve pranë këtij klubi, Sulejman Mema do të jetë një ndër emrat e parë që nuk do të konfirmohet nga presidenti i ri, Refik Halili. Mema me shumë gjasa do t’i lërë vendin një tekniku tjetër për të cilin dalin emra të pafund. Halili është një njeri që kërkon shumë seriozitet dhe disiplinë në skuadër, çka vetëm një trajner i huaj mund t’ia japë. Dhe pikërisht në këtë vazhdë ai tenton të hedhë vështrimin gjetkë, për të gjetur një emër të vazhdimësisë tek kjo skuadër. Por nuk hidhen poshtë edhe mundësitë e një rikthimi në drejtim të Mirel Josës. Ky i fundit ka qenë gjithnjë një nga teknikët që është parapëlqyer në të shkuarën nga Refik Halili. Zërat korridoreve, ndonëse ende të lehta dhe nëpër dhëmbë, që ditën e djeshme flisnin për një rikthim të Josës, i cili nxori kampion këtë Tiranë tre sezone më parë. Duhet theksuar se Halili dëshiron të krijojë një Tiranë, e cila të mos ketë shumë ndryshime thelbësore edhe kur një vit më pas në vend të tij të vijë një tjetër donator si president i klubit. Në bazë të rotacionit në presidencën bardheblu Agron Papuli do të jetë president nga 1 qershori i 2009-ës deri më 31 maj të 2010-ës. Pas tij do jetë Shefikat Ngjela (1 qershor 2010-31 maj 2011) dhe në fund, Avni Nuri (1 qershor 2011-31 maj 2012). Për momentin një gjë është e sigurt; Sulejman Mema nuk do të vazhdojë si trajner te bardhblutë, teksa pritet edhe konfirmimi i ndonjë të huaji, ku të kuotuar janë italiani Leonardo Menikini dhe gjermani Aksel Ros ose i Mirel Josës. Gjatë këtij vitit presidencial Halili do të administrojë buxhetin prej 1 miliard lekësh të vjetra, që të katër donatorët do të vënë në dispozicion të klubit.

Kohë merkatosh dhe ndryshimet në kampionen e Superligës. Pas konfirmimit të trajnerit Ilir Daja në pankinë edhe për sezonin tjetër Dinamo ka përgatitur një listë prej dhjetë futbollistësh që dëshiron t'i ketë të paktën për ndeshjet që do të luajë në pre-eliminaret e Kupës së Kampioneve gjatë muajve korrik-gusht. Në listën e "bluve" të kryeqytetit spikasin kërkesat për 2 mbrojtës, 6 mesfushorë dhe dy sulmues. Kështu dy emrat që mund të ndihmojnë në repartin e mbrojtjes së Dinamos janë pikërisht dy të pezulluarit dhe së fundmi edh e përjashtuarit nga Tirana, Elvis Sina dhe Endri Vrapi. Që të dy lojtarët janë lënë të lirë për të gjetur një skuadër tjetër dhe nuk hidhet poshtë mundësia se ata mund edhe të firmosin edhe për sezonin me Dinamon. Në repartin e mesfushës emrat janë shqiptaro-kroati Anton Dedaj, shkodrani Gilman Lika, talenti i Tiranës, Jahmir Hyka, mesfushorët e tjerë bardheblu Jetmir Sefa e Hetlem Çapja si dhe mëngjarashi i Besës, Enkel Alikaj. Në repartin e sulmit, përveçse konfirmimit të sulmuesve aktualë, kërkohet veterani Gentian Stojku si dhe talenti i Partizanit, Elis Bakaj. Pikërisht për këtë të fundit do të jetë goxha e vështirë duke parë se edhe "Demat e kuq" luajnë në Kupën UEFA dhe nuk do ta lëshojnë lojtarin më aktiv të tyre. Duhet theksuar se Daja është trajneri i pestë i konfirmuar për këtë sezon pas Hasan Likës (Partizani), Agim Canaj (Vllaznia), Slavko Kovaçiç (Flamurtari) dhe Gugash Maganit (Shkumbini).

Humbasim ashtu sikundër tri vjet më parë në Szczecin të Polonisë më 29 maj 2005. Edhe atëherë një gol i shpejtë i vendasve në minutën e dytë të takimit rezultonte një fitore e bujtshme e polakëve dhe një lojë gjithë-sulmuese por jo rezultateve e kuqezinjve. Edhe në atë takim si titullar luante për herë të parë ish-gardiani i Tiranës, Isli Hidi sikundër në këtë ndeshje. Trajneri Arie Haan jo me pak çudi pati zgjedhur Isli Hidin që nga minuta e parë në këtë ndeshje edhe pse Arjan Beqaj është ndër portierët më të mirë të këtij sezoni. Kjo ishte ndeshja e parë e holndaezit të kombëtares shqiptare pas plot pesë muajsh që ka marrë drejtimin e kombëtares shqiptare. Dhe pikërisht në ndeshjen debutuese të tij Arie Haan pati zgjedhur të ndeshej pikërisht ndaj një holandezi tjetër, të famshmit, Leo Benhaker. Duhet theksuar se ekipi përfaqësues tregoi një nivel përgjithësisht në pjesën e dytë të lojës teksa në fushë zbriste edhe fantazisti i Tiranës, Jahmir Hyka. talenti 19-vjeçar ishte padyshim futbollisti më i mirë i kësaj ndeshje. Por nuk kanë zhgënjyer edhe Andi Lila, Kristi Vangjeli dhe Hamdi Salihi, futbollistë që luajnë jo prej shumë kohësh me ekipin përfaqësues. Madje sulmuesi i Riedit, (Salihi) pati provuar disa herë në drejtim të portës duke qenë edhe futbollisti më i rrezikshëm i ekipit tonë. Zhgënjeu në nj farë mënyre, Erjon Bogdani i cili vazhdon të vuajë faktin se është aktivizuar shumë pak në kampionatin italian të futbollit gjatë këtij fund-sezoni. Ish-sulmuesi i Livornos, tashmë i rikthyer te Kievo u zëvendësua gjatë pushimit të dy pjesëve.

E ka nisur me humbje aventurën e tij në krye të kombëtares shqiptare, Arie Haan. Holandezi është trajneri i dytë i shekullit XXI në pankinën shqiptare që starton me humbje. I pari ka qenë ish-tekniku Sulejman Demollari (01.09.2001-17.04.2002) i cili më 1 shtator 2001 në ndeshjen e tij debutuesi i Njëshi i kuqezinjve humbiste 2 me 0 në stadiumin "Qemal Stafa" ndaj Finlandës në një takim zyrtar për kualifikimet e Kupës së Botës "Kore-Japoni 2002". Ndërkohë që 4 të tjerët, Zhega, Dosena, Bgrigel dhe Bariç e patën startuar aventurën e tyre me fitore soe të paktën me një barazim.

Ndeshja e Shpresave U-21 Shqipëri-Greqi do të luhet më 20 gusht. Lajmi është bërë i ditur nga UEFA e cila ka vendosur këtë datë e cila përkon si datë lirë e lënë nga UEFA dhe FIFA për ndeshje miqësore. Ndeshja mes këtyre dy skuadrave e cila duhej të zhvillohej më 26 mars u shty për në një datë tjetër pas pezullimit të përkohshëm të Federatës Shqiptare të Futbollit nga të gjitha organizmat ndërkombëtarë (FIFA dhe UEFA). Shqipëria "e vogël" ndodhet në Grupin 1 së bashku me Greqinë, Italinë, Kroacinë, Azerbajxhanin dhe Ishujt Faroe. Në takimin e parë në Greqi vendasit fituan 2 me 1.

Shqipëria U-19 e mbylli aventurën e saj në Elite Round dhe gjithashtu në Kampionatin Evropian në mënyrë identike edhe me ndeshjen hapëse: një humbje 2-0. Kësaj radhe me Kroacinë. Për ta bërë më të plotë ngjashmërinë me humbjen 2-0 me Gjermaninë në ditën e parë, edhe Kroacia ashtu si formacioni i Horst Hrubesh, humbi një penallti kundër ekipit të Ramadan Shehut. Kroacia shënoi nga një gol në çdo pjesë: 10' dhe 64', me penalltinë e humbur në minutën e 20-të. Gjermania fitoi 5-2 me Sllovakinë dhe siguroi në vend në finalet e Kampionatit Evropian U-19, finalet e të cilit do të luhen në Çeki. Kështu në tri ndeshje kombëtarja shqiptare U-19, morri vetëm një barazim me Sllovakinë (2-2, gola te Metanit e Mustafaj) dhe dy humbje: të dyja 2-0 me Gjermaninë e Kroacinë, duke u renditur e fundit me një pikë.

drejtpërdrejtë, i qartë dhe vende-vende thumbues ndaj origjinës së tij. Ronald Gërcalliu, i vetmi shqiptar puro për momentin në EURO 2008, ka treguar në një intervistë për mediat austriake arsyet e zgjedhjes së përfaqësueses austriake të futbollit përkundrejt asaj shqiptare. Gjithashtu ai ka pohuar se megjithëse Austria nuk shihet si favorite, ajo mund të bëjë surprizën e këtij evropiani ashtu sikundër Greqia katër vjet më parë. "Kam kaluar një fëmijëri aspak të mirë në Shqipëri. Ishin kohë vërtetë të vështira", tregon futbollisti shqiptar në një intervistë për "LAOLA1" (www.laola1.at). Por gjithsesi djaloshi Ronald nuk humbiste shumë kohë në libra përkundrejt futbollit dhe rezultatet në fakt në këtë prizëm erdhën shpejt. Ai tregoi fillimet e tija tek klubi i të rinjve të Partizanit si dhe largimin e tij definitiv nga Shqipëria drejt Austrisë. "Futbolli për mua ishte gjithçka. Edhe pse familjarët e mi më shtynin që edhe të lexoja, unë e kisha mendjen vetëm aty, tek topi. Pas pse vjetësh stërvitje te Partizani familja ime u largua nga Shqipëria për t'u vendosur në Austri", ka vazhduar Ronald Gërcalliu. Ndërkohë sikur ta kishte ditur të ardhmen e tij, Gërcalliu pohon se kishte pas ndjekur kurse të gjuhës gjermane kur ishte i vogël në Tiranë dhe jeta në Austri nuk i kishte krijuar shumë probleme për faktin se kishte disa njohuri të gjuhës. "Pata ndjekur disa kurse të gjuhës gjermane, por sërish kisha probleme kur erdha në Austri, sidomos në shkollë, për të kuptuar dhe shkruar. Gjithsesi arrita ta menaxhoj goxha mirë atë periudhë dhe për këtë gjë jam krenar", ka pohuar futbollisti shqiptar. Tek Sturm Graz, skuadra e parë në Austri Gërcalliu e nisi karrierën e tij si sulmues, por shumë shpejt u kthye në një mbrojtës të mirëfilltë. "E nisa si sulmues, por më pas trajneri më kaloi në mesfushë dhe në fund edhe në mbrojtje. Aty si duket rashë më shumë në sy dhe nuk lëviza më nga ai repart", ka vazhduar shqiptari. Më tej Gërcalliu tregon ndeshjen e parë debutuese në Bundesligën austriake. "Kisha bërë një kampionat evropian me U-17 shumë të mirë. Kisha luajtur edhe disa ndeshje me të rinjtë e Sturm Graz por ëndrra ime u bë realitet më 7 mars 2004 kur trajneri Misha Petroviç më futi në lojë në përballjen me SV Mattersburg. Petroviç më ka ndihmuar shumë, më ka treguar se si duhet të shfrytëzojë cilësitë e mia në mënyrën më të mirë", ka vazhduar rrëfimin e tij, Gërcalliu. Më tej ai tregon haptazi edhe përse zgjodhi Austrinë përkundrejt Shqipërisë. "Kur luaja me U-21 të Austrisë, më erdhi edhe një ftesë nga Federata Shqiptare e Futbollit, të cilën e refuzova menjëherë. Mjaftuan kujtimet jo shumë të mira të fëmijërisë sime për të bërë zgjedhjen që bëra, pra vendosa të luaj për Austrinë, e cila pa më të voglin dyshim ishte zgjedhja ime e parë", ka thënë mbrojtësi. Dhe si për ironi të fatit ka qenë pikërisht Hans Krankl, ish-kandidati kryesor gjatë fundvitit të kaluar për kombëtaren shqiptare, që në 2005-ën (asokohe trajner i Austrisë), kërkoi me ngulm Gërcalliun në kombëtare. "Ai më foli gjatë para se të bëja debutimin tim duke më hequr edhe atë lloj frike dhe emocionesh të tepruara që kisha mbi supe", ka vazhduar Gërcalliu. Më pas kalimi nga Sturm Graz te Salzburgu duket se ka qenë një pikë negative në karrierën e tij. Kalova për gati një vit te Salzburg, por aty nuk gjeta atë që vërtet dëshiroja, ndaj u ktheva sërish te Sturm Graz. Në atë moment erdhën edhe ofertat më të mira. Mund të kaloja te Energji Kotbus në Gjermani, por një rregull i FIFA-s nuk më lejoi që të bëja atë lëvizje. Më pas edhe dy klube angleze, Njukastël, dhe Lids më kërkuan, por pa arritur që të mbyllnin tratativat me klubin tim, kështu që kalova përfundimisht te Austria Vjenë", ka pohuar Gërcalliu. Ndërkohë përsa i përket EURO 2008, shqiptari i Austrisë pohon se kombëtarja bardh e kuqe mund të bëjë surprizën. "Përderisa edhe katër vjet më parë fitoi Greqia, e cila nuk ishte fare ndër favoritet, nuk ka arsye pse të mos besojmë edhe ne në një fitore të mundshme", ka përfunduar intervistën e tij, Ronald Gërcalliu.