Info sport

Nadal humbet valixhet në Pekin


Ai është në Pekin, por pa valixhet e tij. Nis kështu aventura olimpike e Rafael Nadal, mbretit të ri të tenisit botëror. Dy ditë pas mbërritjes së tij në Kinë, atij nuk i kanë ardhur ende bagazhet që kishte me vete. Nadal, që ndryshe nga Federer që ka preferuar një hotel luksoz me pesë yje është transferuar në fshatin olimpik në i është dashur të kërkojë ndihmë pranë “Nike Cina” në mënyrë që të stërvitet duke përdorur uniformën e përbashkët e të gjithë sportistëve spanjollë. “Për fat Nike më ndihmoi ndryshe do të kisha patur probleme me stërvitjen. Unë ndihem shumë mirë këtu, ndihesh ndryshe kur qëndron me të gjithë të mëdhenjtë e sportit. Dje u argëtova duke luajtur bilardo”.

Riberi, lojtari i vitit në Gjermani

Lojtari më i mirë në Gjermani për sezoni 2007-2008 është zgjedhur mesfushori i Bajernit të Mynihut, Frank Riberi. Në vend të dytë është renditur mesfushori dhe njëkohësisht kapiteni i përfaqësueses gjermane, Mikael Balak. Vendi i tretë i shkon një tjetër lojtari bavarez, sulmuesit italian Luka Toni, i cili në sezonin e tij të parë në Bundesligë u shpall edhe golashënuesi më i mirë, me 24 gola të realizuar. 25-vjeçari Riberi ka marrë 224 vota, duke lënë pas Balak me 115 dhe Tonin me 108. “Ky është një rezultat, që tregon më së miri popullaritetin e Bajernit të Mynihut. Jemi shumë të lumtur e krenarë që shumica e gazetarëve ka zgjedhur Frank Riberi”, është shprehur shefi i klubit bavarez, Karl Hainc Rumenige

Edhe Skolari del kundër Murinjos

Pas polemikave me trajnerin e Juventusit, Klaudio Ranieri, një tjetër sulm ka ardhur për drejtuesin e pankinës së Interit, Hoze Murinjo. Kësaj radhe nga Luiz Felipe Skolari, tekniku aktual i Çelsit, sipas të cilit, skuadra londineze duhet të ndryshojë sjelljen arrogante që e ka të trashëguar nga trajneri i para një viti, në mënyrë që të fitojë zemrat e sportdashësve britanikë dhe atyre botërorë. “Nuk jam Hoze Murinjo! Pse njerëzit duhet të më krahasojnë me të? - tërhoqi vëmendjen Skolari. - Murinjo thoshte: Do të fitoj 10 kampionate. Unë nuk e them dot këtë. Jam nga jugu i Brazilit dhe ne të asaj zone jemi paksa të veçantë, jemi të rezervuar. Unë them se do të përpiqem t’i fitojmë të gjitha kompeticionet, por kurrë nuk garantoj 100%. Kurrë!”.

Shqipëria në rënie të lirë


Shqipëria ka humbur një tjetër pozicion në renditjen e FIFA-s për muajin gusht.
Në klasifikimin e përgjithshëm të FIFA-s për muajin korrik, të publikuar dje Kombëtarja shqiptare e futbollit ka humbur një tjetër vend, teksa është renditur në vendin e 101-të duke grumbulluar 359 pikë po aq sa muajin e kaluar. Përfaqësuesja kuqezi e drejtuar nga tekniku holandez, Ari Han, muajt e fundit ka hasur shumë probleme dhe kjo ka ndikuar së tepërmi në paraqitjen e saj në arenën ndërkombëtare. Shqipëria është renditur më poshtë se skuadra që janë thuajse anonime në arenën ndërkombëtare si Ruanda, Burkina Fazo, Uganda etj. Ndërkohë vendin e parë në klasifikimin e përgjithshëm të publikuar nga organizmi më i lartë i futbollit botëror mbahet nga kampionët Evropës, Spanja duke lënë pas Gjermaninë e drejtuar nga Joakim Lëv dhe kombëtaren italiane që drejtohet aktualisht nga Marçelo Lipi. Përfaqësuesja e Brazilit ka humbur dy pozicione duke zbritur në atë vendin e gjashtë.

Çani i thotë ‘jo’ Shqipërisë


Trajneri i përfaqësueses shqiptare U-21, Artan Bushati, ka shpallur dje listën e lojtarëve që do të grumbullohen për ndeshjen kundër Greqisë më 20 gusht, e vlefshme për eliminatoret e Evropianit 2009.
Edgar Çani, sulmuesi shqiptar që është në pronësi të Palermos nuk është pjesë e listës kuqezi, çka ka lënë të kuptohet se ai i ka thënë përfundimisht ‘jo’ Shqipërisë. Sulmuesit 19-vjeçar i është dërguar ftesa gati një muaj më parë për ndeshjen kundër Greqisë, por ai nuk ka shfaqur asnjë interes për të luajtur me Kombëtaren shqiptare në të ardhmen. Një nga arsyet e refuzimit të ftesës së FSHF-së nga Edgar Çani, është fakti që ai shpreson që të luajë me përfaqësuesen italiane në të ardhmen.
Bushati
Trajneri i Shpresave, Artan Bushati nuk e ka fshehur zhgënjimin për refuzimin e ftesës nga ana e Edgar Çanit. “Unë kam kontaktuar vetë me lojtarin para disa kohësh dhe më pas kam kontaktuar me atë nëpërmjet personave të tjerë, ku i kam shprehur qartë sulmuesit dëshirën për ta pasur në ekip, por reagimi i tij ka lënë të kuptohet se nuk ka dëshirë të luajë për Shqipërinë – ka thënë Bushati për “Panorama Sport” – Kam biseduar edhe me drejtuesit e Palermos të cilët më kanë folur me superlativa për cilësitë e lojtarit dhe për sjelljen e tij duke e cilësuar si një talent të padiskutueshëm. Megjithatë më vjen shumë keq që ai nuk pranon të luajë për Shqipërinë, pasi mendoj se në Kombëtaren shqiptare do të kishte një të ardhme të ndritur dhe do të realizonte shumë gjëra. Megjithatë kjo mbetet zgjedhja e tij dhe nuk kemi se çfarë të bëjmë”.
E ardhmja
Bushati i lë ende të hapura dyert për Çanin, madje shpreson që ai të ndryshojë mendje në të ardhmen, por saktëson se nuk ka ndërmend që t’i lutet më futbollistit. “Dyert e Kombëtares shqiptare do të jenë padyshim të hapura në çdo moment për Çanin. Megjithatë dua të sqaroj se nuk kam aspak ndërmend që të vazhdoj t’i lutem futbollistit që të veshë fanellën kuqezi. Ai është në një moshë të pjekur tashmë dhe duhet të bëjë një zgjedhje. Besoj se deri tani unë dhe Federata Shqiptare e Futbollit kemi qenë tepër korrekt me Çanin, por mendoj se nuk ia vlen më që t’i lutemi ndokujt që të veshë fanellën kuqezi, nëse ai nuk ka dëshirë ta bëjë një gjë të tillë”, ka thënë Bushati.

Ja shqiptarët që hynë në historinë e Bundesligës



Kujtim Shala (15 ndeshje me Fortuna Dyseldorfin) u shpall në vitin 1995, Mister Bundesliga (lojtari më i bukur në Bundesligë).
Ai deri vitin e kaluar ishte ndër më të bukurit, kurse tani është Luka Toni i Bajernit të Mynihut, shkruhej në albania-sport.com. Shqiptar tjetër që ka hyrë në historinë e Bundesligës, është edhe kavajasi Altin Rraklli, i cili në vitin 1999 shënoi golin e parë në Bundesligën 1 për Unterhaçing. Në atë sezon Rraklli shënoi 6 gola që i sollën 18 pikë ekipit dhe sulmuesi shqiptar mori nofkën “der Golden Schütze” (shënuesi i artë). Më 14.08.1993 shënoi golin e parë shqiptar në kampionatin gjerman dhe po ashtu po këtë vit ka arritur suksesin më të madh që ka arritur ndonjë shiptar deri më tani në Bundesligën. Rraklli u rendit i treti me Fraiburgun. Deri para tre muajsh ishte shqiptari që me më shumë gola në Bundesligën 1, 16 të tillë. Ish-sulmuesi kuqezi u tejkalua nga Ervin Skela që për momentin ka 19 gola. Shqiptar tjetër që ka hyrë në historinë e Bundesligës është edhe Rudi Vata, i cili kur luante te Energi Kotbus në vitin 2000, u shpall “Mister Body” (futbollisti me trupin më të mirë në Bundesligën 1. Në vitin 2001, Nderim Nexhipi që luante me Herthën e Berlinit, ishte lojtari më i ri që u aktivizua në Bundesligën 1. Këtë rekord e mbajti deri në vitin 2006, kur debutoi Nuri Shahin i Borusias së Dortmundit. Ndërkaq për rekord është edhe Altin Lala, kapiteni i Kombëtares shqiptare që këtë verë mbushi 10 sezone te skuadra e Hanoverit.

Ronaldo: S’dua të shkel në Mançester

Kristiano Ronaldo ka refuzuar të kthehet në Mançester për të folur me trajnerin Ferguson, lidhur me transferimin tek Reali i Madridit. E përditshmja “Marca” thoshte dje se Ronaldo u ka thënë shokëve të tij se nuk do të kthehet në Mançester. Ndërkohë që faqja e kësaj gazete hapej me këtë titull, në brendësi të artikullit shtjellohej se portugezi nuk ka dashur të shprehet më shumë. Sipas gazetës, pretendenti i “Topit të Artë” nuk ka dashur të bëjë ndonjë deklaratë frikësuese, që do të vinte në rrezik shanset për kalimin e tij në “Bernabeu”. Ai ka vendosur të qëndrojë në Geres, një qytet i vogël në veri të Portugalisë, ndërsa përfaqësuesit e tij do të bisedojnë me klubin kampion të Anglisë, lidhur me këtë çështje.

Deko fton Robinjon në Londër

Blerja e re e nënkampionëve të Çelsit, portugezi Deko, e ka lavdëruar ish-rivalin e tij të “El Classico”, Robinjon, dhe e ka ftuar atë të bashkohet me blutë e Londrës, për t’i ndihmuar ata në “sezonin e revolucionit”. “Ai është lojtar spektakolar. Ka aftësi të pabesueshme. Ka këmbë magjike dhe është i aftë të bëjë gjithçka në fushën e lojës. Cilësia e tij është e mahnitshme. Do të ishte kënaqësi për ne, nëse ai bëhet pjesë e skuadrës sonë, - u shpreh Deko për Robinjon, i cili ditën e hënë u kërkoi drejtuesve merengezë ta lejojnë të bashkohet me Çelsin. - Robinjo do të na e përmirësojë edhe më tepër lojën, çka është shumë e nevojshme për të fituar gjithçka, ashtu si duam të gjithë”.

Presidenti çeçen i fal makinë 110 mijë USD Likës


Presidenti i Çeçenisë (Republikës çeçene), Ramzan Kadirov, i cili është njëkohësisht edhe presidenti i klubit FC Terek Groznei i ka dhuruar Ilion Likës një makinë tip “Land Cruiser” të vitit 2008 e cila kushton rreth 110 mijë dollarë.

Jetmir Halilaj

Portieri i përfaqësueses shqiptare ka shkëlqyer në gjashtë ndeshjet e fundit që ka zhvilluar në kampionatin rus dhe ka ndihmuar ekipin e tij që të marrë 11 pikë dhe të ngjitet në mesin e tabelës së klasifikimit. Presidenti i klubit është mahnitur nga cilësitë e portierit shqiptar dhe ka vendosur t’i bëjë atij një dhuratë tepër të kushtueshme. Gardiani i Kombëtares shqiptare ka mbetur i befasuar nga surpriza e presidentit të klubit dhe i ka premtuar këtij të fundit se do të bëjë maksimumin dhe për ta ndihmuar ekipin që sigurojë qëndresën në Premier Ligën ruse edhe për sezonin e ardhshëm. Duke marrë shkas nga rezultatet që ka arritur skuadra e tyre gjatë javëve të fundit, tifozët e FC Terek Grozneit, por edhe stafi drejtues tani kanë filluar të pretendojnë një vend në Kupat e Evropës, çka do të ishte një arritje e jashtëzakonshme për ekipin nëse do të realizohej vërtetë. Ilion Lika, ish-portieri i Dinamos dhe i Elbasanit arriti të siguronte një vend titullari që në fillim të sezonit dhe tani trajneri i skuadrës, Viaçeslav Groznei, e cilëson portierin shqiptar si një nga shtyllat e ekipit. Lika është padyshim një ndër lojtarët më të spikatur në rolin e tij në kampionatin rus dhe një nga kandidatët më seriozë për të siguruar një vend titullari në radhët e Kombëtares shqiptare për edicionin e ardhshëm. 28-vjeçari nga Shkodra është futbollisti i dytë që merr dhuratë një makinë kaq të shtrenjtë nga presidenti i klubit Kadirov, pas mesfushorit bjellorus Vladimir Koritko, i cili gjithashtu ka marrë një dhuratë të tillë dy vjet më parë nga kreu i klubit çeçen.
Ecuria
Deri tani janë luajtur 16 javë në kampionatin rus dhe skuadra çeçene e FC Terek Grozneit renditet në vendin e dhjetë me 21 pikë të grumbulluara. Ekipi ku aktivizohet Lika ka arritur të grumbullojë 11 pikë vetëm në gjashtë ndeshjeve të fundit, ku ka marrë 3 fitore, 2 barazime dhe një humbje. Në këto ndeshje skuadra ka pësuar vetëm 3 gola dhe Ilion Lika në pesë prej ndeshjeve është cilësuar si heroi i FC Terek Grozneit. Një ndeshje e paharrueshme e shqiptarit ishte padyshim fitorja 3-1 kundër Spartakut të Moskës, ku ai u tregua vendimtar dhe u vlerësua me superlativa për paraqitjen që bëri.


Kush është Ramzan Kadirov?
Ramzan Akhmadoviç Kadirov është presidenti i Çeçenisë dhe njëkohësisht edhe presidenti i klubit FC Terek Groznei, ku luan Ilion Lika. Ai ka lindur më 5 tetor të vitit 1976 dhe aktualisht është i martuar dhe ka pesë fëmijë. Ai është ish-shefi i shërbimit të sigurisë çeçene dhe gjatë kësaj kohe që ai ka ushtruar këtë post, por edhe më pas është akuzuar për shkelje të të drejtave të njeriut. Kadirov dyshohet për një sërë torturash dhe vrasjesh, për presione ndaj shtypit të lirë dhe për tendenca anti-demokratike, megjithatë kjo nuk e ka penguar atë që të zgjidhej president i Çeçenisë më 17 dhjetor të vitit 2007. Për emërimin në këtë post ai ka marrë edhe miratimin e ish-presidentit të Rusisë, Vladimir Putin. Ramzan është djali i Akhmad Kadirov, ish-presidenti i Çeçenisë që u vra më 9 maj të vitit 2004 gjatë një atentati në një nga lagjet e Grozneit. Menjëherë pas vdekjes së të atit ai mori në dorë frenat e pushtetit duke i detyruar rivalët e tij politikë që t’i linin rrugë të lirë.


Ilion Lika
Ilion Lika ka lindur më 17 maj të vitit 1980 në Shkodër. Karrierën e ka nisur me skuadrën e Dinamos ku ka luajtur për shumë sezone, madje ka qenë edhe për disa vite kapiten i bluve të kryeqytetit. Lika është 190 cm i gjatë dhe peshon 83 kilogramë. Aktualisht është pjesë e përfaqësueses shqiptare dhe është një nga kandidatët potencialë për një vend titullari në ekipin kuqezi për edicionin e ardhshëm. Lika luajti për gjysmë sezoni (2007-2008) me skuadrën e Elbasanit, por në janar të vitit 2008 u transferua te skuadra çeçene e FC Terek Grozneit.

Besnik Hasi: Shqipërisë i mungojnë liderët


Anderlehti ka festuar 100-vjetorin e themelimit të tij si klub pak javë më parë dhe i ftuar ka qenë edhe trajneri i Kombëtares shqiptare, Ari Han, i cili ka drejtuar në të kaluarën këtë skuadër.
Aktualisht te klubi më i njohur belg punon si zv/trajner ish-futbollisti i përfaqësueses shqiptare, Besnik Hasi. Gjakovari nuk ka mundur të takohet me teknikun e kuqezinjve, megjithatë ai saktëson se i ndjek me vëmendje zhvillimet në futbollin shqiptar dhe atë kosovar. 36-vjeçari Hasi, në një intervistë për "Panorama Sport" ka komentuar gjendjen aktuale të ekipit kuqezi, si dhe ecurinë e skuadrave shqiptare në arenën evropiane.
Si po ecën karriera juaj si trajner?
Shkëlqyeshëm. Jam shumë i lumtur që jam pjesë e këtij klubi të madh si Anderlehti dhe përpiqem që çdo ditë të mësoj sa më shumë. Kjo është një mundësi e artë për mua, të cilën dua ta shfrytëzoj maksimalisht.
A ju mungon fusha e futbollit?
Po, shumë. Në fillim e kisha problem kur shikoja lojtarët që stërviteshin apo luanin, mezi përmbahesha, sepse kisha shumë dëshirë që edhe unë të hyja në fushë e të luaja. Megjithatë tani jam më i përqendruar në detyrën e re dhe shpresoj që të mësoj sa më shumë, sepse këtu vërtet mund të formohesh si trajner. Shembulli më i mirë është trajneri aktual i Cercle Bryzh, Glen de Bëk, me të cilin jo vetëm që punova vitin e kaluar te Crecle, por e kam pasur edhe shok skuadre kur luaja tek Anderlehti. Ai punoi për gati dy vjet si zv/trajner te Anderlehti, para se të merrte drejtimin e Cercles dhe tani cilësohet si një ndër trajnerët e talentuar. Shpresoj që edhe unë të kem një ecuri të tillë në të ardhmen.
Juve jeni zv/trajner i Anderlehtit, Igli Tare drejtor teknik i Lacios, Strakosha zv/trajner i Apoel Nikosias. Lojtarë të një brezi që, edhe pasi i 'varët këpucët në gozhdë', vazhdoni të jeni të suksesshëm në botën e futbollit...
Është e vërtetë. Unë mendoj se kjo ndodh për faktin se një pjesë e mirë e lojtarëve të këtij brezi kishin karakter lideri, pra në një farë mënyre ishin edhe drejtues në fushë. Igli ishte shumë i aftë në mënyrën e komunikimit dhe të menaxhimit të situatave, Strakosha gjithashtu një futbollist tepër autoritar. Megjithatë, ka pasur edhe lojtarë të tjerë që kishin karakter lideri, por unë mendoj se ky është një element që i mungon përfaqësueses kuqezi aktualisht.
Doni të thoni se Shqipërisë i mungojnë liderët?
Deri diku po. Kurrsesi nuk mund të them se skuadra tani nuk ka lojtarë me personalitet, por pjesa më e madhe e tyre ende nuk kanë arritur pjekurinë për të qenë liderë. Lojtar me karakter udhëheqësi momentalisht është Lorik Cana, i cili jo vetëm që gëzon një popullaritet të madh, por është edhe një futbollist i shkëlqyer që e shfaq autoritetin e tij edhe në fushën e lojës, apo edhe në ambiente të tjera të grupit. Ka edhe të rinj të tjerë, të cilët pas pak kohësh jam i bindur se do të arrijnë maturinë e duhur dhe do të jenë vërtetë udhëheqës në fushë dhe jashtë saj.
Skela, Bogdani...si ju duken?
Oh, mos më keqkuptoni. Ata janë pa diskutim futbollistë të shkëlqyer, të cilët kanë dhënë një kontribut të madh. Askush nuk mund t'i vërë në dyshim cilësitë e Skelës, Bogdanit, Berishës, Hykës apo të ndonjë futbollisti tjetër. Jo më kot Ervini aktualisht është një ndër lojtarët më në zë të Bundesligës.

Ari Han ndihmon Holandën


Trajneri i përfaqësueses shqiptare, holandezi Ari Han, po luan një rol të dorës së parë, duke ndihmuar ekipin olimpik të Holandës për të kuptuar më mirë atmosferën kineze.
Han ka qenë më parë trajner i Kinës, përpara se të merrte drejtimin e Kamerunit e më pas të Shqipërisë, prandaj gazeta holandeze "NRC Handelsblad" shkruan se "Ari Han, duke qenë para disa vitesh trajneri i Kinës, e njeh mirë kulturën sportive të atij vendi dhe do ta ndihmojë ekipin olimpik holandez për të arritur suksese.

Beqaj & CO,Shqiptarët e Champions


Portieri i Anorthosis Famagusta, Arjan Beqaj, mesfushori i Marsejës Lorik Cana dhe mesfushori i Bazelit, Jurgen Gjasula, janë tre futbollistët e vetëm shqiptarë, të cilët do të luajnë në turin e tretë eliminator të Ligës së Kampioneve.
Pikërisht, Beqaj do të luajë përballë kampiones së Greqisë, Olimpiakosit. Ndërsa Cana do të përballet me norvegjezët e Bran Bergenit, ndërsa tiranasi Jurgen Gjasula do të ndeshet kundër portugezëve të Guimaresh.

Hënes: Abramoviç, një mafioz

Menaxheri i Bajernit të Mynihut, Uli Hënes, ka kritikuar me tone të ashpra investitorët privatë në futboll, duke marrë si shembull presidentin e Çelsit, Roman Abramoviç. "Më acaron fakti që më duhet të shkoj një herë në javë të mbush makinën time me benzinë. Kjo lloj mafie më merr mua paratë nga xhepi dhe i investon ato në futbollistë. Është një gjë që nuk më pëlqen në asnjë mënyrë dhe kjo vlen edhe për zotin Abramoviç, - u shpreh Hënes, duke kritikuar politikën e presidentit të Çelsit -. Kjo lloj mafie po manipulon botën nëpërmjet çmimeve të karburantëve. Unë nuk dua të matem fare me të tilla klube. Skuadrat si Çelsi, ne duhet t'i mundim nga ana sportive, gjë që do të ishte mjaft pozitive".

Ditët e fundit të jetës për Bobi Çarlton

Sër Bobi Çarlton ka zbuluar dje se ka filluar të humbasë betejën me kancerin, prej të cilit vuan nga viti 1991. Të gjitha operacionet e kryera deri tani nuk mund ta ndihmojnë atë të kalojë rrezikun që i kanoset, edhe pse 75-vjeçari, prej 17 vjetësh ka luftuar me sëmundjen e tmerrshme. "E pranova atë që më thanë dhe jam përpjekur të bëj gjithçka, në kaq pak kohë jete që më ka mbetur. Kam qenë me fat që kam mbijetuar për 17 vjet. Kjo, falë përkushtimit të doktorëve. E ndjej se do të largohem shumë shpejt, por të gjithë i pret ky fat dhe ndihem i kënaqur, pasi kam gëzuar çdo minutë", tha Bobi Çarlton, i cili i dhuroi 500 mijë stërlina fondit të kërkimeve për kancerin më Tajnsajd.

Tare: Synoj të arrij Juven dhe Milanin


“Për mua është një sfidë e rëndësishme. ''
Kam besim se Lacio zotëron gjithçka për t’u bërë si Juventusi e Milani në planin e rezultateve dhe në atë të organizimit. Nuk shoh pengesa pse mund të mos arrijmë këto klube të mëdha”. Igli Tare flet hapur në një intervistë të dhënë për stacionin televiziv italian “RomaUno Tv”. Shqiptari, 35-vjeç, ka varur këpucët në gozhdë, por menjëherë është zgjedhur nga presidenti Lotito si ndërmjetës midis klubit dhe skuadrës. Lotito e deshi përkrah vetes, për një fillim të ri të Lacios. “Presidenti më tha se donte të më jepte këtë rol që dy vjet më parë. Ishte moment i duhur dhe e pranova me entuziazëm – shpjegon ish-sulmuesi -. Me teknikun Rosi bisedova që në ditën e parë të grumbullimit për të shmangur çdo keqkuptim”.
Po ju shkuat me pushime si futbollist. Madje në deklaratën e fundit që kishit bërë thatë se donit të vazhdonit të luanit. Ç’ju bëri të ndërronit mendje?
Ishte një zgjedhje jete. Ndershmërisht mendova për të ardhmen time. Mund të luaja ende edhe dy vjet me nivel të lartë, për të qëndruar gjithsesi më pas në botën e futbollit. Por më erdhi ky shans, aq më tepër me një klub si Lacio, që për mua përfaqëson një nder të madh. Prandaj nuk mendova dy herë dhe u vendosa në dispozicion për të kryer një punë sa më të mirë.
Gjatë kësaj kohe ju kemi parë të stërviteni me ish-shokët tuaj…Sigurisht që kam pak nostalgji, por zgjedhja ime ka qenë shumë e vendosur. Kam një marrëdhënie shumë të ngushtë me shokët e skuadrës, ndihem njëri prej tyre, por me rol tjetër. Më duhet të përballem me ata në mënyrë të vazhdueshme. Java e parë në grumbullim ka qenë pak anormale. Dalëngadalë u fiksua një marrëdhënie shumë e qartë, duke u mbështetur te cilësitë individale për të kuptuar dëshirat dhe nevojat e secilit. Qëllimi është krijimi i një grupi kompakt, pasi vijmë nga një vit ku çdo gjë shkoi keq.
Çfarë rëndësie ka fakti i të qenit një ish-futbollist, në interpretimin e dinamikave brenda ambientit të skuadrës?
Eshtë një avantazh shumë i rëndësishëm. Njoh karakterin dhe mentalitetin e futbollistëve, faktorë që do të mungonin po të ishte zgjedhur një njeri i jashtëm me ambientin.
Shihni një të ardhme si drejtor sportiv?
Nuk është një prioritet. Eshtë ende shpejt, mund ta bëj më vonë, pasi duhet kryer edhe një kurs. Por di të them se do të bëj gjithçka, që do të duhet për të ndihmuar dhe përmirësuar Lacion.
Drejtorët sportivë të mëparshëm si Osti, Martino e Sabatini, në fund u larguan. Nuk i trembeni një rreziku që lidhja juaj me Lotiton mund të prishet?
E vlerësoj shumë presidentin, e falenderoj për këtë mundësi që më dha. Di që ai është një njeri i fjalës. E pranova propozimin e tij, sepse sfidat duhen përballuar për t’i fituar. Deri tani i kam fituar të gjitha në jetën time dhe nuk ka arsye përse kjo të shkojë ndryshe.
Po deri ku mund të mbërrijë kjo Lacio gjatë këtij sezoni?
Mund të them se është një grup me lojtarë të rinj dhe me dëshirë të madhe. E rëndësishme është të nisemi sa më mirë, pasi i kemi forcat për t’u renditur në tetëshen e parë. Duhet të rinisemi me entuziazmin për të realizuar objektivin e kthimit në Evropë. Pastaj do të jetë radha e etapave të tjera.

Të gjithë sytë nga Kina,Olimpiada merr jetë


Ka qenë ora 16 e 05 minuta kur në stadiumin madhështor “Foleja e Zogut”, do të parakalonte delegacioni olimpik shqiptar në ceremoninë e hapjes të Lojërave Olimpike “Pekin 2008”.
Krahas 205 delegacioneve homologe nga gjithë bota përfaqësuesja shqiptare e përbërë nga 11 sportistë dhe e udhëhequr nga flamurmbajtësi, Sahit Prizreni zbriti në pistë e 105-ta. Në parakalimin olimpik sportistët vinin të veshur me kostumet kuq e zi dhe me flamuj të vegjël shqiptarë. Më pas medalisti i kampionatit botëror të Bakusë, Sahit Prizreni do të pasohej në rrugëtimin e Lojërave të 29-ta Olimpike nga flamurmbajtësi i ekipit olimpik të Emirateve të Bashkuara Arabe, Al Maktoum Sheikha Maitha. Ceremonia madhështore e hapjes përfundoi rreth orës 18:00. Më shumë se 80 presidentë, kryeministra, mbretër, lider shtetesh e princër ishin të pranishëm në stadiumin kombëtar të Pekinit. Ra në sy padyshim prezenca e presidentit amerikan Xhorxh Ë.Bush, kryeministrit rus, Vladimir Putin, presidentit francez Nikolas Sarkozi, njëherësh edhe kreu i radhës së Bashkimit Europian.
Kryeministri përshëndet nga tribuna
Në ceremoninë e hapjes ishte i pranishëm edhe Kryeministri Berisha, i shoqëruar nga bashkëshortja e tij, Zonja Liri Berisha. Shefi i ekzekutivit u bë protagonist i këtij evenimenti kaq të rëndësishëm sportiv për pak sekonda gjatë transmetimit ndërkombëtar, teksa gjatë parakalimit ka përshëndetur sipas mënyrës së tij demokratike nga tribuna e personaliteteve ekipin kombëtar shqiptar. Kuqezinjtë u pritën dy ditë më parë nga kryeministri në selinë e ambasadës shqiptare në Pekin, i cili duke u uruar sportistëve suksese në këto Lojëra, shprehu besimin se rezultatet e tyre do të jenë shumë të mira, sepse në këtë ekip marrin pjesë sportistë dhe sportiste me shumë eksperiencë, të cilët kanë arritur rezultate të larta në nivel europian e botëror.
Rekord pjesëmarrjeje
E veçanta për ekipin kombëtar në Lojërat Olimpike të 2008-ës është numri i sportistëve në konkurrim. Si rrallëherë në një kompeticion gjigand si ky, kuqezinjtë do të përfaqësohen me 11 olimpistë, 7 nga të cilët e prenë biletën përmes kualifikimit me rezultate të normës olimpike: Sahit Prizreni(mundje e lirë), Dorian Çollaku (atletikë), Erkand Qerimaj (peshëngritje), Romela Begaj (peshëngritje), Gerti Trasha(peshëngritje), Elis Guri(mundje klasike) dhe Lindita Kodra (qitje). Ndërkohë katër sportistët e tjerë, Klodiana Shala (atletikë), Edmond Topalli (xhudo), Rovena Marku (not), Sidni Hoxha (not) përfituan falë ftesave.

UEFA kërkon kasetat e sfidave të Dinamos e Partizanit në Evropë


UEFA ndërhyn për të marrë në dorë kontrollin e situatës, pas fjalëve për fiksime rezultati të ndeshjeve të ekipeve shqiptare në Kupat e Evropës.


Përmes një faksi të dërguar në FSHF, organizmi më i lartë i futbollit të kontinetit të vjetër ka kërkuar kasetat e sfidave të luajtura gjatë muajve qershor-korrik nga Dinamo, Partizani e Besa. Për takimin e Dinamos në turin e parë të Ligës së Kampionëve ndaj boshnjakëve të Modricës ishte shtypi danez ai që ngriti tymnajën, duke aluduar për paracaktimin e rezultatit. Përsa i takon impenjimit të Partizanit kundër Shirokit, në sfidën e vlefshme për turin e parë eliminator të Kupës UEFA, ishte vetë presidenti Albert Xhani që nxiti hetimin, me deklaratën e tij se futbollistët i shitën ndeshjen. Ajo që çudit është kërkesa për kasetën e ndeshjeve të luajtura nga Besa, që arriti të kapërcejë një tur të Kupës Intertoto, duke u eliminuar nga Grasshopersi. Me shumë mundësi, UEFA do të ketë patur ndonjë sinjal për sfidat e kavajasve, ndonëse nuk përjashtohet që vëzhgimi i këtyre takimeve të jetë thjesht për verifikim.

Grekët garantojnë: Skela, pasardhësi i Rivaldos


Nuk ka se si të mos ngelesh i mahnitur nga vlerësimet që i bën shtypi i huaj lojtarëve shqiptarë, por këtë herë ishte ndryshe sepse në qendër të vëmendjes ishte Ervin Skela dhe komplimentet vijnë nga komentatorët dhe nga tifozët grekë.
Duke marrë shkas nga ndeshja miqësore midis AEK-ut dhe Kotbusit e zhvilluar në Gjermani pak më 29 korrik, komentatori grek që transmetonte ndeshje në kanalin Nova, nuk reshtte së foluri me superlativa për fantazistin kuqezi Ervin Skela. Në periferi të Mynihut zhvillohej ndeshja miqësore Energi Kotbus - AEK, një ndeshje kjo që ngjalli interes të shumë shqiptareve, të cilët përveçse do të kishin mundësi të shikonin Përparim Hetemajn dhe Panajot Konen, do të shihnin dhe fantazistin e Kombëtares shqiptare Ervin Skela. Që në fillim televizioni grek dha pamjet e takimit tejet miqësor mes Skelës, Hetemajt dhe Kones. Megjithëse ndeshja zhvillohej në një fushë stërvitore, veprimet teknike dhe spektakolare të Skelës dhe të Rivaldos (AEK) mahnitën spektatorët, aq sa komentatorët e ndeshjes shpërthyen në elozhe për shqiptarin. Komenti i tyre ishte: “Skela edhe Rivaldo janë mbi 30-vjeç, por mesa shohim janë lojtarët më të lëvizshëm dhe më të mirët në fushë. Rivaldon e njohim për aftësitë e tij dhe çfarë ka arritur në karrierën futbollistike, por po na çudit Skela që e mori gjithë skuadrën mbi shpatulla, duke shpëtuar rënien nga Bundesliga 1 sezonin e kaluar. Interesant është fakti që shqiptari asnjëherë nuk ka luajtur për ndonjë ekip grek duke e ditur që shumë futbollistë shqiptarë kanë luajtur në Greqi”. Më pas komentatorët vazhdojnë të me lavde për 31-vjeçarin nga Vlora, i cili zhvilloi një ndeshje të jashtëzakonshme. Në pjesën e dytë Rivaldo u zëvendësua, kurse Skela vazhdoi magjitë e tij me topin duke arritur të fitonte edhe një penallti për Kotbusin. Në pjesën e dytë Skela shpalosi talentin e tij duke bërë vërtetë gjëra të mrekullueshme. Në këto momente komentatori grek nuk harron të thotë se Skela ka qenë dy herë shumë pranë Olimpiakosit dhe Panioniosit që kishin kërkuar shërbimet e fantazistit, por ambicia e Skelës për të luajtur akoma në nivele të larta, ka qenë arsyeja që ai s’ka përfunduar në Greqi. Për të janë interesuar edhe PAOK-u e Iraklisi të Selanikut, por kartoni i tij i shtrenjtë ka qenë pengesa për këto dy ekipe. “Lojtarë të kalibrit të Skelës duhet të luajnë patjetër në evenimente si Liga e Kampioneve”, ka thënë komentatori grek. Ai ishte shumë i informuar kur theksonte se shokët më të mirë të Skelës janë grekët që luajnë në Bundesligë, si Amanatidis, Kirjako, Papadopulos, Aloneftis etj. Çudia e shumë njerëzve që ndiqnin ndeshjen mbetet thënia e një prej ish simboleve të ekipit të AEK-ut, Stelios Manolas, i cili gjatë komentit të ndeshjes tha: Ervin Skela është si ajo vera e vjetër që sa më shumë vjetrohet, aq me e mirë bëhet dhe duke ditur se ky është viti i fundit i Rivaldos, drejtuesit e AEK-ut mund t’i hedhin sytë te ky lojtar kaq i zgjuar për organizimin e lojës”, ka thënë Manolas.

Hyka


Jahmir Hyka, mesfushori i përfaqësueses shqiptare që luan te skuadra e Maincit ka bërë dje debutimin zyrtar me ekipin e tij të ri, teksa ka luajtur për 25 minuta në ndeshjen që Mainci fitoi 2-1 kundër Babelsberg në shtesë. Kjo ishte ndeshja e parë zyrtare që Hyka luajti me Maincin. Ndërkaq Altin Lala luajti gjatë gjithë ndeshjes në fitoren e thellë 5-0 që Hanoveri i tij realizoi në transfertë kundër Hallesher.

Curri


Debatik Curri ka qenë heroi i Vorskla Poltavës dje teksa i ka dhënë një pikë ekipit të tij në barazimin 2-2 kundër gjigantëve të Dinamos së Kievit. Ndeshja ishte mbërthyer në 2-1 deri 10’ minuta para përfundimit dhe atëherë ka qenë mesfushori i Kombëtares shqiptare që ka dënuar miqtë, duke ngritur në delir mijëra të pranishmit në stadium. Futbollisti kuqezi është kthyer tashmë dhe në golashënues, pasi edhe sezonin e kaluar ai realizoi gjashtë gola në kampionat.

Lindita Kodra, sot nis përfaqësimin shqiptar


Kampionia e Evropës, Lindita Kodra, ngre sot siparin e Lojërave Olimpike për ekipin olimpik shqiptar.
46-vjeçarja, e cila bëri të sajin titullin kampion në Granada të Spanjës, do të konkurrojë mes 44 rivaleve në disiplinën e 10 metrave pistoletë me ajër. Ndërsa më 13 gusht, Kodra do të konkurrojë në 25 m pistoletë me zjarr, disiplinë me të cilën fitoi medaljen e artë dhe titullin kampione e Evropës. Kryeministri Berisha, në një interviste për “Radio Kina Internacional” (CRI), shprehu vlerësimet për punën përgatitore, organizimin dhe mikpritjen e Lojërave Olimpike “Pekin 2008”. “Mikpritja kineze është e përsosur, por mendoj se po në këtë lartësi janë të gjitha terrenet, i gjithë organizimi dhe trajtimi, pra, çdo gjë ecën me një përsosmëri të vërtetë”, tha kryeministri gjatë intervistës, të përkthyer në 43 gjuhë të botës.

Ministri Pango vizion Fshatin Olimpik


Ministri i Sporteve, Ylli Pango, ka qenë dje i pranishëm në Fshatin Olimpik, ku është akomoduar përfaqësuesja shqiptare.
Ka qenë shefi i delegacionit shqiptar në olimpiadë, Fidel Ylli, ai që ka konfirmuar për “Panorama Sport” vizitën e kreut të sporteve. Sipas Yllit, ministri Pango u takua me anëtarët e ekipit olimpik shqiptar. Në vijim të vizitës, ministri i Sporteve pa nga afër ambientet ku sportistët janë të akomoduar, mensën, si dhe disa ambiente rekreative në fshat. Po sipas shefit të delegacionit, pas takimit që zhvilloi me sportistët dhe trajnerët, ministri pohoi se do të ketë më shumë mbështetje për sportin në tërësi dhe sportistët elitarë në veçanti. Dje ministri Pango zhvilloi një takim të veçantë me drejtorin e marrëdhënieve me komitetet olimpike kombëtare pranë Komitetit Olimpik Ndërkombëtar, Mishel Fiju, ku u diskutua për autonominë e organizatave sportive

Ari Han bën tifo për Kinën në Lojëra


Trajneri i Kombëtares shqiptare, Ari Han ka ndjekur nga afër ceremoninë e hapjes së Lojërave Olimpike dhe ka pohuar se ka mbetur i mrekulluar nga spektakli që është shfaqur në stadiumin “Foleja e Zogut”.
Ai ndodhet në Kinë për të ndihmuar ekipin olimpik të Holandës që të arrijë rezultate sa më pozitive. Edhe pse e njeh nga afër kulturën kineze, ai nuk e ka fshehur habinë se nuk e kishte imagjinuar kurrë një ceremoni aq madhështore. Në një intervistë për sitin zyrtar të FIFA-s, trajneri holandez ka folur për impresionet e tij për turneun e futbollit. “Shpresoj që Kina të ecë mirë. Si pritës, ata do të kenë mbështetjen e fansave të tyre dhe nëse kalojnë grupin, kanë shumë shanse për të vazhduar. Favoritë? Ka disa ekipe të mira dhe shumë lojtarë të zotë, por duhet të presim disa ndeshje për të parë formën. Argjentina dhe Brazili janë dy skuadrat më të forta, por këto ekipe nuk luajtën shumë mirë në ndeshjet e para.

Napoli, gati dyndja në Shkodër

Reportazh i "Gazzeta dello Sport" në prag të ndeshjes me Vllazninë


Italianët i kushtojnë jo pak vëmendje ndeshjes Vllaznia-Napoli. Gazeta më e madhe sportive në Itali ka botuar dje një reportazh për Shkodrën, ku përveç ndeshjes, ajo këshillon tifozët edhe për mundësinë e pushimeve të këndshme e të lira në vendin tonë. "Jemi shumë afër ndeshjes së madhe të Kupës UEFA. Napoli e shijoi aperitivin e parë në Athinë, tani një brusketë në Shqipëri dhe pastaj do të mund të ulet në tavolinë me të tjerët. Të enjten, më 14 gusht, në orën 20:30, nga ana tjetër e Adriatikut, në Shkodër kundër Vllaznisë. Mund të bëhet. Transfertë për pushimet verore. Duke pasur parasysh edhe vendin e transfertës, është aq këndshëm sa mund t‘ia fusim ca pushime alternative me çmim të ulët".

Si të udhëtojmë për në Shqipëri - Opsioni traget është më praktiku. Nuk duhet të trembemi nga fakti që do të zbarkojmë në Mal të Zi dhe jo në Shqipëri, sepse "Skutari" (në shqip Shkodër ose Shkodra) është pothuajse në kufi. Një barkë turistike nga Bari në Bar (vend në malin e zi me Montenegro Lines. Nisja bëhet të mërkurën në drekë dhe mbërrijmë në mbrëmje. Çdo vend kushton 55 euro, ndërsa udhëtimi me makinë i gjithi vetëm 78 euro. Nga Bar ngelet edhe rreth një orë me makinë deri në qytetin shqiptar. Për kalimin e kufirit mjafton vetëm pasaporta.

Ku të flemë - Pesë kilometra larg qendrës, në hotelin "Meteor". Gjendet në rrugën nga e cila do të vini nga Mali i Zi (Shtoji i Ri), 20 euro për person në dhomat dopjo, në një hotel që në Itali, për cilësinë dhe rehatinë që ofron, do të kushtonte 60 euro. Nëse dëshironi të qëndroni në qytet, keni hotel "Colosseo", në rrugën "13 Dhjetori", i njëjti standard dhe cilësi me hotelin e parë, vetëm se kushton 10 euro më tepër.

Ku mund të hahet - Në tregimet e atyre që kanë qenë në ish-Jugosllavi para luftës janë legjendare të ngrënat e të pirat pafund me çmime fare të ulëta. Në Kroaci apo Slloveni kjo nuk është më e mundur. Në Shqipëri kjo ndodh akoma. Kudo që të shkoni, dijeni që tani se për një vakt të bollshëm do të shpenzoni vetëm çerekun e asaj që do të shpenzonit në Itali. Kuzhina është e fuqishme fare, sipas zakonit të ballkanasve për t‘i bërë ballë dimrit. Në verë, më të pëlqyeshmet për t‘u ngrënë janë tava me peshk krap, tavat me zarzavate e perime të ndryshme me mish të pjekur dhe trahanaja e shtruar lloj-lloj salcash. Restorant "Mondial" në qendër të qytetit ka një kopsht të brendshëm tejet elegant. Por kemi edhe zgjidhje praktike, siç është byreku, që ngjan me një lloj kulaçi me brumë shumë të hollë, të mbushur dëng me mish e me qepë, apo me kos e me djathë.

Si mund të lëvizet - Shkodra është një qytet i vogël, që si të gjitha qytetet e tjera të Shqipërisë nuk iu shmang dot shëmtimit nga vitet e regjimit komunist të Hoxhës. Një mëkat i madh, sepse nga pikëpamja natyrore dhe historike ofron gjëra të admirueshme. Në qytet, në pak metra distancë, bashkëjetojnë minaret, kullat e gurit dhe pallatet katrore prej çimentoje të bëra gjatë diktaturës. Në shkëmbin mbi qytet, fatmirësisht u ka mbijetuar shkatërrimeve komuniste Kalaja e Rozafës, e lindur nga një legjendë që të rrëqeth mishin (po jua lemë si surprizë ta zbuloni vetë cila është. Vizita kushton 200 lekë, pak më shumë se 1 euro e gjysmë). Nuk është si Posilipi, por edhe liqeni i Shkodrës është ideal për t‘u çlodhur në freski ditëve të nxehta të verës, para se të riktheheni në hotele për të përqafuar krevatet.

Biletat - Do të luhet në "Loro Boriçi", stadium me 16000 vende, i ristrukturuar pak vite më parë, por ku mund të shihen akoma skena të lezetshme, si për shembull njerëz që e ndjekin ndeshjen në këmbë mbi çatinë e tribunës qendrore. Ka marrë emrin e ish-kapitenit dhe trajnerit të Kombëtares shqiptare, që ka luajtur edhe me Lacion gjatë viteve të luftës ‘41-‘43. Në dispozicion të napoletanëve duhet të jetë e gjithë tribuna qendrore prej 950 vendesh. Biletat blihen në sportelet e stadiumit, çmimi duhet të rrotullohet aty te 10 euro (sepse në Shqipëri mund të blihet edhe me euro).

Partizanit të shpërfytyruar i duhen patjetër 4-5 lojtarë

Drejtuesit premtojnë se do të rindërtojnë një ekip pretendent

Te Partizani për momentin paratë nuk po duken, ndërkohë që drejtuesit e lartë të tij premtojnë se do ta ringrenë skuadrën pretendente edhe nga e para, po të jetë nevojë. Koha nuk premton shumë. Gjithçka duket e zymtë. Megjithatë ditët e fundit kanë filluar lëvizjet për rindërtimin e ekipit të shpërfytyruar. Tashmë pohohet si e sigurt, që në ekip do të rikthehen portieri Orges Shehi dhe Babamusta, të cilët pritet të jenë të hënën në stërvitje. Ndërkohë që vetë presidenti Albert Xhani ka informuar se brenda javës së ardhshme do të bëjë minimumi dy blerje, emrat e të cilëve nuk janë bërë konkretë. Gjithsesi, rikthimi i dy të parëve dhe ndërhyrja e presidentit duken një sinjal i mirë, edhe pse të gjithë e dinë se do të jetë shumë e vështirë për të ndërtuar sërish një ekip që të rivalizojë për titullin kampon. Drejtuesit e ekipit, të konsultuar me trajnerin Hasan Lika dhe me specialistë të tjerë pranë klubit, kanë arritur në përfundimin se skuadrës për momentin i nevojiten minimumi katër apo pesë lojtarë. E gjitha kjo bëhet për t‘i dhënë formën e një ekipi, "mbetjes" që ngeli si pasojë e "arratisjeve" të fundit nga klubi i kuq. Drejtuesit premtojnë se këta katër apo pesë lojtarë do të jenë edhe objektivi në merkato në ditët e ardhshme. Po ashtu, e paqartë mbetet situata në lidhje me Muzakën, Bakajn dhe Beqirin, të cilët vazhdojnë të figurojnë akoma si futbollistë të Partizanit, pasi presidenti Xhani nuk u jep kartonin. Muzaka, po arriti të shkëputet nga klubi i kuq, me shumë gjasa do shkojë te Tirana. Për Beqirin duket se interesohet Elbasani. Ndërsa për largimin e Bakajt, dëmshpërblimi i kërkuar nga presidenti i të kuqve është shumë i lartë. Po ashtu, në listën e atyre që do të largohen është edhe Paulin Dhëmbi, i cili tashmë duket se e ka të sigurt një vend në radhët e skuadrës së Elbasanit të Mirel Josës, i cili ka shprehur dëshirën për të pasur shërbimin e mesfushorit korçar. Edhe pse në ekip janë të pakët të mbeturit, ata kanë vazhduar normalisht stërvitjen edhe paraditen e djeshme. Kishin planifikuar një ndeshje miqësore me Besën, e cila nuk u realizua dhe kështu që mund të shtyhet për javën tjetër. Sot të kuqtë do të jenë pushim.