Transferime (merkato)

Sukaj refuzon Inter Bakun, firmos për Kaiserslauternin


Sulmuesi i talentuar shkodran Xhevair Sukaj, autori i dy golave në fitoren 2-1 të Vllaznisë kundër Koperit në ndeshjen e parë të turit të parë të Kupës UEFA, ka refuzuar së fundi një ofertë në shumën e 500 mijë dollarëve amerikanë të bërë nga skuadra e Azerbajxhanit, Inter Baku.

Lajmin për Albania-sport e bëri të ditur në linjë telefonike nga Mali i Zi, bosi i agjencisë më të madhe të transferimeve “Vata Vizion Football Management”, Rudi Vata. “Menaxherët e këtij klubi kishin parë disa ndeshje të Sukajt dhe më paraqitën ofertën e tyre për lojtarin, por Xhevairi ndërkohë kishte zgjedhur Gjermaninë si vend të së ardhmes së tij futbollistike’, - tha Vata, i cili po merret ndërkohë transferimin Xhulian Rrudhos te Lodz në Poloni.

20-vjeçari Sukaj do të niset të dielën drejt Gjermanisë për të firmosur kontratën me Kaiserslauternin, një ekip ku më parë janë aktivizuar edhe Igli Tare e Ervin Skela.

Për sulmuesin e Kombëtares U-21 (5 gola në eliminatoret e këtij edicioni të Kampionatit Europian 2009), kanë qenë të interesuara klube nga Austria, Zvicra, Gjermania, Ukraiana, Azerbajxhani e Turqia, por vetë lojtari i ka besuar një emigranti shkodran, i cili banon prej disa vitesh në Gjermani dhe ka lidhje të ngushta me skuadrën e Kaiserslauternit.

Pas firmosjes së kontratës ditën e hënë, Sukaj do të rikthehet menjëherë në Shkodër për të vazhduar përgatitjet me Vllazninë për ndeshjen e kthimit kundër Koperit, takim që do të luhet në “Loro Boriçi”, më 31 korrik 2008.

Andi Lila firmos me Tiranën

TIRANA- Mbrojtësi kavajas Andi Lila është përforcimi i radhës i Tiranës. Gjithsesi, në kontratën e tij parashikohet që nëse Lila, ka një ofertë nga një klub jashtë shtetit ai është i lirë të largohet.

23-herë kampionët janë mbushur me të rinj si kurrë më parë, të paktën ata që po stërviten më skuadrën e Tiranës në Maqedoni. Në portë janë Eni Malaj e Klajdi Kuka. Në mbrojtje rreshtohen: Muça, Kazazi e Tafaj. Mesfusha kompletohet me Migel Metanin. Edhe sulmi ka disa të rinj të talentuar: Ergys Sorra e Blerti Hajdari.

Të gjithë këta janë pëlqyer nga trajneri kroat i bardhebluve Bllazhe Slishkoviç. Këtyre u shtohen edhe Erbim Fagu e Jetmir Stefa, që janë titullarë në ekipin e parë.

Besa ofertë Bekim Kulit

BESA- Presidenti Nexhat Bizhdili i ka bërë ofertë të kënaqshme në kushtet financiare Bekim Kulit, duke i propozuar edhe shiritn e kapitenit. Pak ditë më parë 26-vjeçari kavajas i ka këkruar një kontratë me terma të lartë financiarë Dinamos, me të cilën fitoi edhe kampionatin e fundit.

Besa, që arriti të kalojë një tur në Kupën Intertoto me Ethnikos Aknas të Qirpos, por u eliminua nga zviceranët e Grasshopers në turin e dytë, ka shumë mungesa. Reparti i vetëm i kompletuar është mesfusha: Progni, Veliaj, Krasniqi, Zhdralla, Sakaj, Alikaj e Ishka.

Të gjithë repartet e tjera kanë nevojë për lojtarë. Nga vija e sulmit janë larguar Xhihani (Ukrainë), Shaqiri (Azerbajxhan), ndërkohë që dhe Fortunat pritet të rikthehet në Francë. Vetëm dy blerje ka bërë Besa gjatë këtij sezoni: Artan Sakaj dhe Sokol Ishka.

Apolonia, katër serbë në provë

APOLONIA- Skuadra fierake është në mbyllje të javës së parë të fazës përgatitore në Malin e Zi. Përveç mesfushorit organizator, rumunin, 25-vjeçarit Emil Marius, në provë janë dhe katër lojtarë serbë: dy sulmues, një mbrojtës i majtë dhe një mesfushor.

Flamurtari ka nevojë për tre lojtarë

FLAMURTARI – Te vlonjatet është ende në provë kroati Jure Grizejl (22 vjeç) mesfushor i majtë, por shefi i klubit Geri Çipi pohon se Flamurtari ka ende nevojë për nj mbrojtës, një mesfushor e një sulmues. Merkatoja e kuqezinjve vlonjate është tërësisht e orientuar nga Krocia, kjo falë edhe bashkëpunimit me menaxherin Adrian Aliaj. Çipi hodhi poshtë zërat se Flamurtari ishte i interesuar për Ilirjan Çaushajn e Dinamos.

Dështon testimi i kamerunasve

TEUTA- Dy futbollistët kamerunas Takui Emanuel dhe Kinsklei Ndi Folabi nuk kanë arritur të kalojnë testin e Sulejman Starovës, edhe 19-vjeçarë kanë qenë lotjarë të përfaqësueses së moshave të Kamerunit. Te Teuta po stërviten edhe Curri, Rada, Dollaku, futbollistë durrsakë, të cilët ishin dhënë në formë huazimi te ekipe të tjera. Të hënën pritet të bashkohet me grupin edhe mbrojtësi Pashaj, mesfushori Gjondeda e sulmuesi Hysa.

Lëvizjet e fundit nga kampet e Superligës

DINAMO- Kroati 29-vjeçar Frane Petreviç është edhe emri i ri i sulmit të Dinamos. Sulmuesi ka luajtur së fundi në Slloveni me NK Çelje. Petreviç është rekomanduar nga trajneri i ri Zlatko Daliç si alternativë për të zëvendësuar Pero Pejiçin. Mesfushori sulmues Bekim Kuli, i cili u largua nga Dinamo si protestë ndaj ish-trajnerit argjentinas Marselo Havier Zuleta, i ka vënë kushte Dinamos për rikthimin e tij, Kavajasi kërkon rritje rroge. Dinamo vazhdon përgatitjet për ndeshjen e kthimit të Ligës së Kampioneve kundër boshnjakëve të Modricës. Pranë Dinamos pritet të rikthehet edhe Dario Bodrusiç.

FLAMURTARI - Kroati Jure Grizejl është bashkuar me Flamurtarin gjatë përgatitjeve të skuadrës vlonjate në Mavrovë të Maqedonisë. 22-vjeçari është mesfushor i majtë. Flamurtari fitoi 4-1 miqësoren me skuadrën maqedonase të Kategorisë së Dytë, Lokomotiva e Gostivarit. Golat; Pema (2), Guna e Pamiç.

ELBASANI – Sulmuesi Oriand Abazaj është dhe një nga blerjet e spikatura të Elbasanit. Abazaj, i cili më parë ka luajtur me Kastriotin e Tiranën, do të formojë dyshen në sulm së bashku edhe me Fjodor Xhafën. Elbasani është në pritje të firmosje së kontratave të Veliajt e Sasha Delainit.

SHKUMBINI – Skuadra peqinase vazhdon fazën përgatitore në Strugë të Maqedonisë. Mbrojtësi i njohur Alpin Gallo është blerja e fundit e Shkumbinit. Te skuadra që po drejtohet për momentin nga Sokol Branica përveç Delioskit, pritet edhe një sulmues e një mesfushor maqedonas, ndërsa për portën pritet një futbollist serb.

TIRANA- Bardheblutë e kryeqytetit vazhdojnë stërvitjen në Ohër të Maqedonisë. Me grupin është bashkuar edhe Bledar Devolli.

BESA – Mesfushori kosovar, 23-vjeçari Driton Krasniqi, i cili luan prej tre sezonesh te Besa, konfirmoi qëndrimin edhe për këtë sezon te skuadra kavajase. Nga Besa janë larguar : A.Shaqiri (Azebajxhan), Z.Ramadani (Azerbajxhan), A.Belisha (Vllanzia), P.Xhihani (Ukrainë), Abdulla Ishaka (Kinë). Liridon Leci kërkohet në Zvicër.

APOLONIA- Skuadra fierake do të përforcohet me një mesfushor organizator, ruminin 25-vjeçar Emil Marius, i cili ka luajtur më parë më Universatea e Krajovës, por vjen nga Olimpiakos Nikosia e Qipros. Apolonia është duke kryer fazën përgatitore në Malin e Zi. Të ardhur të tjerë të Apolonia janë Bedini (Flamurtari), Skënderi (Flamurtari), Guri (Dajti)

Të gjitha lëvizjet në merkato

DINAMO

Trajner: Zlatko Daliç (Kroaci, i ri)

Të ardhur: A. Tapia (Argjentinë), M.Kampazano (Argjentinë), E. Sina (Tirana), J. Brahja (Kastrioti), H.Çapja (Tirana), F.Sefa (Lushnja)

Të larguar: P.Pejiç (Kapfenberg, Austri), D.Bodrusiç (Kroaci), A.Abraham (Tirana), Pollozhani (Maqedoni), Kuli (pa ekip), Pema (Flamurtari), Vinçetiç (SC Ëeiz, Austri), D.Bortoja (Argjentinë), F.Paladinio (Argjentinë).

Ekipi:



PARTIZANI

Trajner: Hasan Lika (I konfirmuar)

Të ardhur: R. Shala (Lushnja), Y.Shameti (Kastrioti), Larti (Skënderbeu), E.Çajku (Skënderbeu), M. Ngjela (Besëlidhja)

Të larguar: O.Shehi (pa ekip), B. Devolli (Tirana), D.Babamusta (pa ekip), B.Shkembi (pa ekip).

Ekipi: Portierë: Ed.Bakaj, Xhika. Mbrojtës: Hallaçi, Tafaj, Osmani, Beqiri, Shala, Larti. Mesfushorë: Gjyla, Karapici, Dhembi, Muzaka, El.Bakaj. Sulmues: Ngjela, Përlleshi, Çajku, Capo.



BESA

Trajner: Iljaz Haxhiaj (I konfirmuar)

Të ardhur: D.Sakaj (Elbasani), S.Ishka (Dinamo),

Të larguar: A.Shaqiri (Azebajxhan), Z.Ramadani (Azerbajxhan), A.Belisha (Vllanzia), P.Xhihani (Ukrainë), Abdulla Ishaka (Kinë)

Ekipi:



ELBASANI

Trajner: Mirel Josa (I ri)

Të ardhur: O.Abazaj (Kastrioti), E.Bakalli (Tirana), G.Stojku (Shkumbini), Kacollja (Shkumbini)

Të larguar: Adrian Nuhui (pa ekip), Arben Nuhiu (pa ekip), Menglevski (Maqedoni), Vranic (pa ekip), E. Tetova (Teuta)

Ekipi:



TIRANA

Trajner: Bllazhe Slishkoviç (Kroaci i ri)

Të ardhur: A. Abraham (Dinamo), M.Memelli (Gais, Suedi), Devolli (Partizani), Dabulla (Shkumbini)

Të larguar: E. Sina (Dinamo), K. Duro (Omonia, Qipro), J. Hyka (Mainc 05, Gjermani), E. Bakalli (Elbasani), H. Çapja (Dinamo), I.Fortuzi (lënë futbollin), S. Gjoreski (Maqedoni), B. Hyseni (Kosovë).

Ekipi:



SHKUMBINI

Trajner: Gugash Magani (i konfirmuar)

Të ardhur: E. Grami (Kastrioti), E. Turdiu (Kasrtrioti), E. Rizvanolli (Kastrioti), Mallota (Besëlidhja), Deliovski (Maqedoni), Gallo (Kastrioti).

Të larguar: G. Stojku (Elbasani), R. Dabulla (Tirana), M. Kacollja (Elbasani), Ndoni (Lushnja), K. Dalipi (Bylis), Kuçi (Apolonia).

Ekipi:



VLLAZNIA

Trajner: Agim Canaj (i ri)

Të ardhur: D. Smajli (Besëlidhja), N. Shtubina (Skënderbeu), M. Bashiç (Kroaci), Miklosh (Çeki).

Të larguar: A. Teli (Alki, Qipro), A. Jusufi (Kosovë)

Ekipi: Bishani, E. Beqiri, Bashiç, Hoti, Teli, Belisha, Smajli, Osja, Nallbani, Lika, Sukaj, Kaçi, Lici.



FLAMURTARI

Trajner: Slavko Kovaçiç (i konfirmuar)

Të ardhur: Guna (Apolonia), Liçaj (Apolonia), Halili (Vlora), Maringon (Kroaci), Çaushaj (Dinamo-Teuta)

Të larguar: Cani (Vllaznia), Bërdufi (Elbasani), Flavio Zhunior (Brazil).

Ekipi:



TEUTA

Trajner: Sulejman Starova (i ri)

Të ardhur: Babamusta (Partizani)

Të larguar: V. Mile (pa ekip), Hodo (Bylis),

Ekipi:



APOLONIA

Trajner: Gerti Haxhiu (I konfirmuar)

Të ardhur: Bedini (Flamurtari), Skënderi (Flamurtari), Guri (Dajti), Emil Marius (Rumani)

Të larguar: Guna (Flamurtari)

Ekipi:



BYLIS

Trajner: Faruk Sejdini (I konfirmuar)

Të ardhur: K. Dalipi (Shkumbini), E.Dalipi (Elbasani), B. Hodo (Teuta), Mushica (Kosovë), Hashani (Besëldidhja), Haliti (Kosovë), Stafa (Dinamo), R. Nenaj (Elbasani)

Të larguar: Prela (Besëlidhja), Lamaj, Bedini, Dimo, Prela, Hazizi, Heqimi, Sisoko.

Ekipi: Portierë: Egbo. Mbrojtës: Ujkani, Besha, Asanga Rih-reh, Driza, Muça, E. Malasi. Mesfushorë: Nenaj, Idrizi, Kule, Roshi, E.Dalipi, Hodo, Kuçi, Novi, Beqiri, Terolli, Rakipi. Sulmues: Asllani, K.Dalipi, Ziambo, Bakiu, Hysenaj, Kalemaj.



LUSHNJA

Trajner: Artan Bano (I konfirmuar)

Të ardhur: Sekseri (Skrapari), E.Çela (Laçi) Ndoni (Shkumbini), K.Arbëri (i lirë).

Të larguar: F.Sefa (Dinamo), Shala (Partizani)

Sliskoviç: Tre lojtarë që të bëjnë diferencën

Pas një jave pune intensive me grupin e lojtarëve bardheblu, trajneri Blazhe Sliskoviç, në një prononcim për “Sport Ekspres”, dje ka dhënë mendimet e tij për ecurinë e deritashme. “Tri ditët e para, - tha tekniku, - jemi marrë me përzgjedhjen e elementëve të rinj. Kështu, nga një grup i madh prej rreth 40 futbollistësh të rinj, kemi arritur të seleksionojmë 13, të gjithë të talentuar, që premtojnë, por që u mungon eksperienca, sidomos në ndeshje të rëndësishme. Ndaj, them se, tani për tani, kemi krijuar një grup me mesatare moshe shumë të re, i cili kompletohet nga disa futbollistë me eksperiencë, si Dabulla, Kçira, Abraham e Memelli, por edhe të tjerë, si Sefa, Arapi e Deliallisi, të cilët e kanë një farë përvoje, por duhet të bëjnë akoma edhe më shumë në drejtim të perfeksionimit të tyre”.

Si ndiheni pas kësaj që keni bërë deri tani?

Shumë optimist, sepse djemtë kanë punuar mirë e me shumë seriozitet. Dhe për mua kjo është më e rëndësishmja.

Kjo Tiranë, tashmë e ravijëzuar në formatin e saj. Në ç’repart ka nevojë më shumë për t’u përforcuar me futbollistë cilësorë?

Deri tani ne jemi ndeshur vetëm brenda “llojit”. Çdo trajner dëshiron të ketë në dispozicion të tij të paktën 18 futbollistë, të njëllojtë për nga niveli, të gatshëm në çdo moment për t’i shërbyer ekipit. Në përgatitoren e Ohrit, që do të fillojmë sot, në dy ndeshjet e para stërvitore do të shohim se ku i kemi mungesat kryesore. Gjithsesi, në këto momente mund të them se vëmendja jonë është përqendruar në domodoshmërinë e një futbollisti tipik të qendrës në mesfushë, të një mbrojtësi të qendrës dhe të krahut të djathtë, “fashë”. Në dhjetëditëshin e parë të qëndrimit tonë në Ohër kemi planifikuar për të luajtur katër ndeshje miqësore stërvitore, në të cilat do të shohim më mirë se çfarë lojtarësh e në cilat role do të na duhen. Paraprakisht, për mendimin tim skuadrës i duhen dy tre lojtarë cilësorë, që të bëjnë diferencën me të tjerët. Për këtë unë kam biseduar me presidentin Halili e drejtuesit e klubit dhe kam gjetur gatishmërinë e tyre për t’i gjetur këta futbollistë.

Gjatë ditëve të përgatitores në Ohër, në ç’drejtim do të përqendrohet programi stërvitor?

Do të jetë një përgatitje komplekse, si në planin fizik, atletik dhe atë teknik. Sigurisht, në këtë periudhë kujdes të veçantë do t’i kushtojmë përgatitjes fiaike, aq më tepër kur dihet që në futbollin e sotëm këtë aspekt të gjithë e kanë në qendër të vëmendjes. Ne jmi të interesuar që të kemi në skuadër edhe lojtarë të aftë teknikisht, por edhe të një sulmuesi “pykë”, që di të shënojë. Pra, do të arrijmë të harmonizojmë gjithçka në një lojë moderne, rezultative në gola dhe argëtuese për tifozët. Nëse do të arrijmë ta bëjmë këtë, them se e ardhmja do të jetë shumë e mirë. Sidomos pas mbërritjes së lojtarëve cilësorë, që thashë pak më lart, me synim fitimin e titullit kampion.

Ç’njohje keni për skuadrat e kampionatit shqiptar?

Të them të drejtën, nuk i njoh fare skuadrat e tjera. Të martën kam ndjekur Dinamon në ndeshjen e saj me Modriçën. Por nuk jam impresionuar shumë. Në fillim të ndeshjes, Dinamo pati dy tre raste, që nuk arriti t’i shfrytëzojë. Pas kësaj, loja ndryshoi krejt. Gjithsesi, për momentin di të them se neve na intereson vetëm loja dhe përgatitja jonë.

Në ndeshjen që përmendët, keni vëzhguar gjithashtu edhe Daniel Xhafajn, sulmuesin e skuadrës suaj?

Për mendimin tim, të gjitha rastet e favorshme për të shënuar në portën e Modricës i krijoi ai. Dy-tri herë ka goditur portën me kokë, por edhe ka “siluruar” fuqishëm drejt saj me të djathtën. Përfundimisht, nuk mund të them se luajti shumë mirë, por veprimet e tij ishin gjithnjë në shërbim të skuadrës. Ndaj, kam mendimin se me rikthimin e tij skuadra do të përfitojë shumë.

Orges Shehi firmos me Elbasanin

Orges Shehi është përfundimisht portieri i Elbasanit për sezonin 2008-2009. Lajmi bëhet i ditur nga menaxheri i lojtarit, Mario Cenolli.

“Shehi është një nga portierët më të mirë të kampionatit shqiptar, - tha Cenolli për “Albania-sport.com”, - dhe pa dyshim kishte shumë oferta nga ekipet më të mira të Shqipërisë.

Shuma e ofruar nga presidenti i Elbasanit, Arben Laze për shërbimet e tij ishte e kënaqshme dhe shkon rreth 70 milionë lekë të vjetra”.

30-vjeçari Shehi ka mbrojtur portën e Teutës, Vllaznisë, Bylisit e Partizanit dhe njihet për cilësinë e tij si portier, pasi luan që nga viti 1995 (saktësisht më 14 maj 1995, në moshën 17-vjeçare) në elitën e futbollit shqiptar dhe ka një eksperiencë të jashtëzakonshme, çka përkon edhe me synimet e Elbasanit, duke qenë një armë e fortë në shërbim të trajnerit Mirel Josa.

Çeku Miklosh nënshkruan për Vllazninë

Vllaznia do të zhvillojë sot seancën e fundit stërvitore, përpara se të niset të mërkurën në drejtim të Sllovenisë, ku do të përballet me Koperin në ndeshjen e parë të turit të parë eliminator të Kupës UEFA.

Presidenti Fushaj nënshkroi kontratën sulmuesin çek Miklosh, i cili bëhet kështu lojtari i dytë i huaj që ka nënshkruar me Vllazninë, pas kroatit Marko Bashiç, dhe blerja e pestë sezonale për këtë sezon pas Smajlit, Shtubinës e Belishës.

Në dyshim e sipër është e ardhmja e sulmuesit brazilian Da Lima, i cili ende nuk e ka kënaqur plotësisht trajnerin Agim Canaj.

Superliga, goditjet e fundit të merkatos

TIRANA – Ish-mesfushori i Partizanit, Bledar Devolli e ish-sulmuesi i Gaisit në Suedi, Migen Memelli janë dy “fytyrat” e reja në stërvitjen e Tiranës. Gjirokastriti nënshkroi një kontratë njëvjeçare me opsion edhe për një vit tjetër me 23-herë kampionët, ndërsa pogradecari, i cili ka luajtur edhe në Norvegji me Bran Bergenin, ka nënshkruar për një vit e gjysmë.

ELBASANI - Gentian Stojku është rikthyer te Elbasani, ndërkohë që për provë te 2-herë kampionët e Shqipërisë në kampingun e Pogradecit janë duke u testuar dy lojtarë brazilianë: sulmuesi Silvano Lukas Megalhases (25 vjeç) dhe mesfushori i avancuar Tony Helena Kosta De Pinho (25 vjeç). Sulmuesi Oriand Abazaj ende nuk ka firmosur për Elbasanin.

VLLAZNIA – Problemi më i madh mbetet “çështja Admir Teli”. Mbrojtësi shkodran vazhdon të endet midis klubit të tij të ri qipriot, Alki Larnaka dhe Vllaznisë, ku është i detyruar të luajë për Kupën UEFA kundër sllovenëve të Koperit. Vllaznia ndodhet në regjim kazerme dhe është akomoduar në hotel “Meteor” në periferi të Shkodrës. Ende nuk dihet fati i dy sulmuesve të huaj të saj, brazilianit Da Lima dhe çekut Mirosllav Millosh. Vioresin Sinani e ka të pamundur të luajë kundër Koperit, ndërsa dyshja sulmuese e fituesve të Kupës së Shqipërisë do formohet nga Albert Kaçi e Xhevair Sukaj. Vllaznia fitoi dy testet miqësore me skuadrat malazeze: me Deçiçin 1-0 dhe Zetën 3-2.

TEUTA – Sulejman Starova nisi sot stërvitjen e parë me Teutën, skuadrën, të cilin e shpalli nënkampione në sezonin 2006-2007. Arben Likmetaj pohoi se me ardhjen e Starovës në stolin durrsak, Teuta synon një vend në Kupat e Europës. “Duam të ndërtojmë një ekip të kompletuar. Futbollistët e rinj janë të etur për sukses”, - thotë 20-vjeçari, lojtar i Kombëtares U-21. Faza përgatitore e Teutës do të kryhet në Pogradec, aty ku ndodhet edhe Elbasani.

BYLIS – Goditja e fundit në merkato e Bylisit quhet Klevis Dalipi. Goleadori i njohur elbasanas, me një të kaluar edhe në Portugali, nënshkroi një kontratë njëvjeçare me presidentin Besnik Kapllanaj. Pak ditë më parë me skuadrën ballshiote kishte nënshkruar edhe vëllai i tij, Endri Dalipi. Bylisi, i drejtuar nga Faruk Sejdini, nisi grumbullimin në Poçem.

SHKUMBINI - Erion Rizvanolli, një nga tre blerjet e reja të skuadrës peqinase të ardhur nga Kastriot, së bashku edhe me Erald Turdiun e Elton Gramin, pohoi se shpreson të bëjë një sezon të sukesesshëm me Shkumbinin. “Ndryshe nga sezoni i fundit kur luajta me këtë skuadër, lufta për të mbijetuar në Superiore është zëvendësuar me objektiva ambiciozë”. Shkumbini i Gugash Maganit, që po kryen aktualisht fazën përgatitore në Strugë të Maqedonisë, sezonin e kaluar u rendit në vendin e pestë.

FLAMURTARI –Skuadra vlonjate është në kërkim të një sulmuesi dhe një mesfushori të krahut të majtë, pas dështimit të tratativave me kroatët Vinçetiç e Gllavina. Flamurtari ndodhet në kampingun e Mavrovës në Maqedoni, ndërkohë që për kompletimin e skuadrës së drejtuar nga Slavko Kovaçiç, po punon menaxheri Adrian Aliaj. Lajmi i fundit ka të bëjë me mesfushorin Arlind Rustemi, i cili ndodhet në Romë të Italisë për një vizitë mjekësore.

LUSHNJA- Sulmuesi Klodian Arbëri ka nisur stërvitjen me skuadrën lushnjare, pas dy vitesh mungesë nga futbolli i luajtur. “Nuk e mohoj, që për mua do të jetë shumë e vështirë,por me mendoj se me vullnetin që kam do t’i kaloj të gjitha pengesat”. Me Lushnjën luajnë edhe nipërit e tij, Gersi e Polizoi Arbëri. Te Lushnja pritet firma e Blerim Hasallës, ndërkohë që Saimir Xhagalliu nuk ka pranuar ofertën e bërë nga klubi.

APOLONIA– Mbrojtësi tiranas, Nerion Spaho, i cili luajti edhe sezonin e kaluar me skuadrën fierake, beson se Apolonia do të arrijë të mbijetojë midis 12 më të mirave të Shqipërisë. Gjithsesi, Spaho pohon se skuadrës së Gerti Haxhisë i duhen edhe disa përforcime me lojtarë cilësorë.

Egert Bakalli firmos për Elbasanin
Mesfushori 32-vjeçar ishte lojtar i lirë, pasi kishte përfunduar detyrimet me Tiranën, për të cilën luajti për tre sezone rresht, duke filluar nga ai 2005-2006.

”Bakja” trupvogël, por punë shumë është nisur menjëherë drejt Pogradecit për të qenë nën urdhrat e Mirel Josës, të cilin e ka pasur edhe trajner te bardheblutë.

Bakalli është një ndër lojtarët më të njohur të kampionatit shqiptar, pasi është shpallur kampion me Dinamon (2001-2002) e Tiranën (2006-2007).

Fillimet e tij sportive kanë nisur me Dinamon (1995-1996, 1998, 2000-2004), Sopotin e Librazhdit (1995-1997), Besën e Kavajës (01.1999-06.1999), Bylisin (1999-2000) e së fundi me Tiranën (2005-2008). Debutimin e tij të parë në Superligë, mbrojtësi e ka bërë, më 17 janar të vitit 1996.

Elton Grami firmos për Shkumbinin

Elton Grami është blerja e re e Shkumbinit. Trajneri Gugash Magani dha pëlqimin për mbrojtësin 24-vjeçar, i cili sezonin e fundit luajti me Kastriotin.

Grami bëhet lojtari i tretë i Kastriotit që bashkohet me skuadrën peqinase, pasi më parë me presidentin Xhavit Ismaili kishin nënshkruar edhe Erion Rizvanolli e Erald Turdiu.

Shkumbini, që sezonin e kaluar u rendit në vendin e pestë fazën përgatitore do ta zhvillojë në Strugë të Maqedonisë. Nisja për në vendin fqinjë, të shndërruar tashmë në një kamping stërvitor për shumë skuadra shqiptare – e fundit Dinamo – do të bëhet ditën e diel.

Galiani-Dinjo "blindojnë" Kakanë


Fantazisti i Milanit, Rikardo Kaka, i dhuron fanellën e tij të parë sezonale me numrin 9, administratorit të Milanit, Adriano Galiani. Për momentin drejtuesi kuqezi ka filluar betejën e tij ndaj klubeve si Real Madrid dhe Çelsi, që çdo ditë insistojnë t'i blejnë Milanit brazilianin Kaka. "Është e vërtetë që kemi marrë oferta për Kakanë, por me sa më rezulton mua, ai është i lumtur që do ta fillojë sezonin e ri me Milanin. Nëse nuk do ishte kështu, atëherë do futeshim në bisedime me palët e interesuara për të, ndërkaq ju konfirmoj se, edhe spanjollët e Real Madridit më kanë telefonuar për të", ka thënë Galiani. Edhe blerja më e re e Milanit, Ronaldijo, është shprehur se dëshiron të luajë për shumë kohë në krah të patriotit të tij Rikardo Kaka.

Kenion: Me Lampardin për Championsin


Ndërsa ekipi i Çelsit ka filluar stërvitjet e para të fazës parasezonale në jug të Kinës, Luiz Felipe Skolari, thotë se me Frenk Lampardin po bisedojnë vazhdimisht rreth detyrave që do të ketë mesfushori për sezonin e ardhshëm. Edhe shefi ekzekutiv i bluve, Piter Kenion, ka shprehur bindjen e tij se Lampard do të qëndrojë në "Stamford Bridge" sezonin e ardhshëm "Bashkimi i Lampard me grupin në turin e Lindjes është një lajm shumë i mirë për ne. Gjithmonë e kemi shprehur dëshirën që Frenk të qëndrojmë sa më gjatë në te Çelsi. Vitin e shkuar, klubi hodhi një hap përpara, duke shkuar në finalen e Ligës së Kampioneve, por këtë vit do të bëjmë më shumë. Do të fitojmë Ligën e Kampioneve, si dhe do t'i marrim Mançesterit, titullin Kampion të Anglisë".

Shkëmbi i shkel syrin Tiranës


Bledi Shkëmbi ka ndërmend të vazhdojë betejën e drejtësisë me Partizanin, por nga ana tjetër i shkel syrin edhe Tiranës.

"Nuk e konsideroj të drejtë që një klub të të largojë, kur nuk të ka paguar për muaj të tërë, aq më tepër duke pasur edhe dy vjet kontratë - ka deklaruar mesfushori -. Meqënëse drejtuesit e kuq donin që puna të shkonte kështu, unë do të luftoj deri në fund për të drejtën time". Aktualisht, korçari po vështron edhe mundësitë për të vazhduar të ardhmen e tij larg Partizanit. Së fundi i ka ardhur një ofertë nga Shiroki Brijeg, ku Kataliniç e ka ftuar për t'u aktivizuar. "Unë e kam refuzuar, përderisa në Bosnje luhet një kampionat thuajse i të njëjtit nivel me atë shqiptar. Më mirë sesa aktivizimi atje preferoj qëndrimin në Shqipëri. Deri tani nuk kam pasur asnjë kontakt me klubin bardheblu. Sidoqoftë, nëse ekziston ndonjë mundësi, nuk kam përse ta fsheh që çdokush do të donte të luante në një klub si Tirana".

Halili: Kam gati dy blerje të fuqishme



Merkato e Tiranës sapo ka nisur dhe këtë e konfirmojnë vetë drejtuesit e saj.
Kryedonatori i bardhebluve, Refik Halili pohon se është shumë pranë blerjes së dy futbollistëve shqiptarë të një niveli të lartë, të cilët do të mund t'i shërbejnë ekipit në të ardhmen. "Jam në bisedime me dy futbollistë shqiptarë që njihen nga të gjithë, sepse në sezonet fundit janë dalluar në ekipet e tyre - ka thënë Halili për "Panorama" -. Unë po bëj më të mirën time për të ndërtuar një skuadër sa më solide dhe sa më të fortë, sepse synojmë të arrijmë majat në sezonin e ardhshëm. Besoj se deri tani kemi dhënë sinjale të qarta, sepse përveç marrjes së Memellit, për të cilin duhet thënë se është një sulmues me peshë, kemi arritur të marrim edhe Andi Lilën. Ai është padyshim një ndër mbrojtësit më të mirë të kampionatit shqiptar, por gjithashtu edhe futbollist i përfaqësueses shqiptare. Kjo tregon qartë seriozitetin e drejtuesve të Tiranës si dhe përkushtimin që ata kanë ndaj kësaj skuadre".
Misteri
Megjithatë Halili nuk ka dashur të japë detaje të hollësishme për futbollistët që pritet të firmosin gjatë këtyre ditëve për Tiranën. "Mund të them se janë futbollistë shqiptarë të një niveli shumë të mirë, janë rreth moshës 25 vjeç dhe janë ndër më të mirët në rolin e tyre. Mos m'i kërkoni emrat, sepse asgjë nuk është bërë zyrtare dhe nëse unë i bëj publik emrat, atëherë mund të dështojë e gjithë puna ime e këtyre ditëve", ka thënë kryedonatori, Refik Halili. Drejtuesi i Tiranës është i bindur se shumë shpejt tratativat me këta dy futbollistë do të përfundojnë me sukses dhe kjo do të kënaqë të gjithë tifozët e skuadrës së Tiranës. "Shpresoj dhe besoj se transferimet e këtyre lojta-rëve do të realizohen me sukses. Shpresoj që stafi teknik, por edhe tifozët të mbeten të kënaqur, sepse ata janë vërtet lojtarë cilësorë", ka përfunduar Halili.

Mançesteri shënjestron Tieri Hanri


Këmbëngulja e klubit të Totenhemit, për të shitur me një shifër rekord në Britani (38 milion sterlina), bullgarin Dimitar Berbatov, e detyron trajnerin e Mançester Junajtid, Sër Aleks Ferguson të hedhë vëmendjen tek francezi i Barcelonës, Tierri Hanri, i cili u ble vitin e shkuar me vlerën e 15 milionë stërlinave nga katalanasit. Me francezin, skocezi i stolit të kampionëve po mendon të bëjë një blerje surprizë, duke kthyer në Angli një nga “macet e zeza” për shumë kohë të “Djajve të Kuq”. Skocezi beson se 30-vjeçari do të ishte një partner i përkryer i Uejn Runit, edhe pse sezonin e shkuar ai zhgënjeu në “Kamp Nou”.

Barça ofron Eto për Trezege


Sipas medias spanjolle, klubi i Barcelonës do të përdorë kartonin e Samuel Eto për të bërë përforcimin e duhur në repartin sulmues. Këtë herë bëhet e ditur se drejtuesit katalanas janë hedhur në sulm për francezin e Juventusit, David Trezege. Si në ofertën e bërë për Karim Benzema, edhe këtë herë në shkëmbim të kartonit të sulmuesit, do të ofrohet pikërisht kartoni i një tjetër sulmuesi, madje mjaft i vlerësuar në sezonet e kaluar, siç është kamerunasi Eto. Në të vërtetë, pasi Lioni bëri rezistencë për Karim Benzema, këtë herë duket se drejtuesit bardhezinj do të jetë të gatshëm për të pranuar këtë ofertë, e cila u duket mjaft e leverdisshme.

Itali/ Viçenca rihidhet në sulm për Bogdanin


Klubi i Kievos është i gatshëm ta largojë Erjon Bogdanin nga skuadra, por për t’u realizuar kjo krerët e skuadrës verdheblu duhet të kalojnë shumë pengesa.
Viçenca gjatë ditëve të fundit ka shprehur hapur interesimin e saj për qendërsulmuesin e Kombëtares shqiptare, por transferimi drejt skuadrës që militon në Serinë B duket shumë i vështirë. Problemi i parë është që Bogdani nuk dëshiron të privohet nga Seria A, pasi dëshiron që të tregojë vlerat e tij pas dy sezoneve jo fort bindëse me Kievon dhe Livornon. Problemi tjetër, që është gjithashtu po kaq serioz, është çmimi i lartë i kartonit të futbollistit (3.8 milionë euro) si edhe paga e tij e lartë prej 950 mijë eurosh në sezon. Ndërkaq lojtari ka thënë se dëshiron të qëndrojë te Kievo, por nëse do t’i duhet që të shkojë të largohet nga klubi veronez, atëherë do të jetë ai që do ta zgjedhë skuadrën dhe jo klubi. Lojtari ka paralajmëruar drejtuesit e verdhebluve se nuk do të shkojë askund në formë huazimi, pasi eksperienca e tij te Livorno sezonin e kaluar, tregoi se nuk ishte një zgjedhje e mirë. Ndërkaq, drejtuesit e Kievos megjithëse në deklaratat e tyre janë shprehur se dëshirojnë që Bogdani të qëndrojë në ekip, duket qartë që ata janë të hapur për çdo ofertë që vjen për sulmuesin shqiptar.

Bogdani



Shtohen ofertat nga Anglia për Erjon Bogdanin. Pas golit që i shënoi QPR-së, skuadrës së Flavio Briatores dy ditë më parë, drejtuesit e këtij klubi po përgatiten t’i bëjnë një ofertë zyrtare Kievos për bomberin shqiptar. Ndërkohë që edhe klubi i Ipsuiç Toun interesohet për bomberin shqiptar, madje sipas medias italiane, drejtuesit e tij janë gati t’i bëjnë një ofertë prej 2.5 milionë eurosh Kievos për të marrë shërbimet e bomberit kuqezi.

Mesfushori rus, Roman Pavljuçenko, refuzon ofertën e Totenhemit


Shënjestra e fundit e Totenhemit, Roman Pavljuçenko, e ka mohuar mundësinë e transferimit në radhët e ekipit të drejtuar nga Huande Ramos, duke deklaruar se parapëlqen më tepër të luajë tek Çelsi ose Arsenali. Sulmuesi rus është përmendur disa herë nga tekniku spanjoll si njeriu që mund të zëvendësojë denjësisht Dimitar Berbatovin, mirëpo vetë bomberi, i cili, falë partneritetit të shkëlqyer me Arshavinin, shkëlqeu në Euro 2008, e mohon mundësinë e kalimit tek Spërsat: “Më pëlqen shumë Premier Liga dhe do të doja të luaja aty një ditë. Por nëse shkoj në Angli, dua që të luaj për Arsenalin ose Çelsin”.

Interesimi, Arsenali kërkon të marrë Lorik Canën


Arsenali është hedhur sërish në sulm për të marrë shërbimet e mesfushorit të Kombëtares shqiptare, Lorik Cana.
Kjo i jep një shpjegim logjik edhe deklaratave të pak ditëve më parë të futbollistit, ku dukej qartë se po bëhet gati t'i japë lamtumirën skuadrës së Marsejës. Sipas të përditshmes angleze "Daily Mail", klubi londinez ka hyrë në bisedime me drejtuesit e Marsejës, por edhe me vetë futbollistin, për të realizuar blerjen e 25-vjeçarit kuqezi. Trajneri Arsen Venger e pëlqen shumë mesfushorin dhe është i bindur se ai mund të zëvendësojë më së miri Matjë Flamini, i cili u transferua në fund të sezonit te Milani me parametra zero. Klubi i Marsejës pretendon një shumë prej 15 milionë eurosh për kartonin e Lorik Canës, por "topçinjtë" shpresojnë që t'i sigurojnë shërbimet e shqiptarit për gjysmën e parave që kërkojnë francezët. Kapiteni i Marsejës vëzhgohet prej shumë kohësh nga Arsenali, madje disa vite më parë ishte tekniku Venger ai që i kërkoi futbollistit të testohej te skuadra e Arsenalit, por kjo nuk u bë e mundur sepse Cana nuk mundi të udhëtonte drejt Anglisë asokohe, për shkak të problemeve me dokumentet. Edhe Reali i Madridit shfaqi pak kohë më parë interes për yllin e përfaqësueses shqiptare, por tratativat nuk patën ndonjë përfundim konkret.

Reali, gati të shesë Robinjon

Ekipi i Çelsit është shumë pranë blerjes së brazilianit të Realit të Madridit, Robinjo. E përditshmja spanjolle "sports" shkruante ditën e djeshme se presidenti i merengezëve, Roman Kalderon, dhe drejtori sportiv Pedja Mijatoviç e kanë dhënë aprovimin për transferimin e sulmuesit drejt Londrës, ndërsa i vetmi kundër kësaj është trajneri Bernd Shuster. Pas firmosjes së Rafael Van der Vartit, edhe Shuster, mund ta ketë të lehtë të hapë dritën jeshile për Robinjon, i cili do të ketë në dyshim, pozicionin e titullarit sezonin e ardhshëm. Vetë lojtari i ka kërkuar klubit të pranojnë shitjen e tij, menjëherë pasi Reali e pengoi atë të shkojë në Lojërat e Pekinit.

Cana


Arsenali është tërhequr, të paktën momentalisht, për sa i përket blerjes së Lorik Canës. Klubi londinez i ka bërë një ofertë konkrete Udinezes për mesfushorin Gëkhan Inler. Ndërkaq për Canën është rishfaqur Evertoni, klub i cili është i gatshëm të paguajë deri në 13 milionë euro për kartonin e shqiptarit, por është ky i fundit që nuk dëshiron të transferohet atje, pasi dëshiron një ekip të nivelit më të lartë.