Lorik Cana i dëmtuar, rrezikon Maltën

Mesfushori kuqezi nuk kërkon të rrezikojë, pas problemit në gju. E sigurt mungesa e tij në kampionat

Lorik Cana nuk do që të riskojë, teksa bën të ditur se nuk mund të caktojë një datë, kur do të jetë gati për të luajtur. Mesfushori i kombëtares dhe njëkohësisht kapiteni i Olimpikut të Marsejës, duket se i ka tejkaluar parashikimet e kthimit në fushë. Ai ka më shumë se një muaj që po pushon, sepse problemi në njërin gju, pas enjtjes së çuditshme, tashmë është serioz.


Vetë Cana ka qenë i mërzitur në lidhje me këtë çështje, duke qëndruar i rezervuar edhe me mediat franceze. Megjithatë, pasi këto të fundit, duke iu referuar burimeve pranë klubit francez, kanë thënë se kapiteni mund të jetë i gatshëm për ndeshjen e 8 shkurtit, Marsejë-Bordo, Cana është prononcuar.


Për gazetën lokale të Marsejës, "La Provence", 25-vjeçari sqaroi: "Më duhet të qëndroj i kujdesshëm dhe të zbatoj me përpikmëri këshillat e mjekëve, për të arritur formën time optimale. Kësisoj, nuk mund të caktoj një datë, se kur do të jem gati për të luajtur." Stafi mjekësor i Marsejës i ka këshilluar Canës një tjetër pushim të detyrueshëm, pasi shenjat e përmirësimit të gjurit nuk ishin të mira.


Burime pranë lojtarit kanë bërë të ditur, se ky problem për Canën, nuk ka ardhur si pasojë e dëmtimit në ndeshje, por thjesht duke qëndruar. Enjtja e madhe i ka imponuar kontrollin e menjëhershëm, nga i cili është dalë në përfundimin se lojtari duhet të kryejë një terapi riaftësuese.


Ndërkohë, duke qenë se edhe ndeshja e rëndësishme e kombëtares me Maltën, më 11 shkurt, është afër, nuk dihet nëse lideri i mesfushës kuqezi do të jetë në fushë. Ky është një problem i madh për trajnerin Ari Han, pasi nëse mungon Cana, shto këtu edhe kapitenin Altin Lala, gjërat bëhen shumë më të vështira.


Edhe pse Marseja ka arritur dy fitore në ndeshjet e fundit, trajneri i saj, Erik Geretes, e ka përmendur mungesën e Canës, duke qenë se shqiptari është gati i pazëvendësueshëm për rolin që ka në ekipin francez.