Lajme Politike nga vendi dhe nga bota

Ketu mund te postohen lajmet me te fundit nga vendi dhe nga bota

Berisha çon emrat te Topi


Zëdhënësja e kryeministrit, Juela Meçani bëri të ditur dje 20 minuta para mbledhjes së qeverisë, kreu i shtetit ka marrë nga kryeministri propozimet e reja për kabinetin. "Kryeministri i Republikës së Shqipërisë Prof. Dr. Sali Berisha i propozoi Presidentit të Republikës Bamir Topi, në bazë të nenit të 98.1 të Kushtetutës së Republikës së Shqipërisë emërimin në postin e Zëvendëskryeministrit të zotit Genc Pollo dhe lirimin e tij nga posti i Ministrit të Arsimit dhe Shkencës", u shpreh Meçani në konferencën për shtyp. "Gjithashtu, Kryeministri i Republikës së Shqipërisë Prof. Dr. Sali Berisha i propozoi Presidentit të Republikës zotit Bamir Topi, emërimin në postin e Ministrit të Arsimit dhe Shkencës të zotit Fatos Beja, Dr. i Shkencave Filologjike, si dhe emërimin në postin e Ministres së Shëndetësisë të Prof. As. Dr. i Shkencave Zonjën Anila Godo dhe lirimin nga kjo detyrë të zotit Nard Ndoka", vijoi më tej zëdhënësja e Kryeministrit. i sakrifikuari i madh i këtyre ndryshimeve është pikërisht kryetari i Partisë Demokristiane, Nard Ndoka, i cili një 15 muaj, pasi mori postin e ministrit të Shëndetësisë, detyrohet ta lërë në favor të Partisë Republikane. Nga ana tjetër kreu i shtetit ka një javë kohë për t'i shqyrtuar dekretet. Në nenin 92 të Kushtetutës, në kapitullin "Emërimi dhe shkarkimi i ministrit" thuhet se: "1. Ministri emërohet dhe shkarkohet nga Presidenti i Republikës, me propozim të Kryeministrit, brenda 7 ditëve. 2. Dekreti shqyrtohet brenda 10 ditëve nga Kuvendi". Kështu nëse kreu i shtetit do të dekretojë ndryshimet në qeveri deri të hënën paradite, ato mund të kalojnë në seancë për t'u votuar gjatë punimeve të së hënës, ndërkohë që nëse kreu i shtetit do të shfrytëzojë në maksimum afatin që i jep kushtetuta, votimi i ndryshimeve shtyhet për në seancën e fundit. Por kjo llogari shërben vetëm nëse Presidenti Topi do të kryejë rolin e noterit dhe do të firmosë ndryshimet në qeveri të Kryeministrit, ndërkohë që gjithçka vështirësohet akoma më shumë nëse kreu i shtetit do të ketë rezerva ndaj kandidatit, që do të propozohet për ministër.

PDK, sot qëndrimi zyrtar për Qeverinë


Partia Demokristiane pritet të pozicionohet sot për ndryshimet në qeveri, pasi kryetari i saj që drejtonte Ministrinë e Shëndetësisë është lënë jashtë kabinetit. Burime pranë kësaj force politike bëjnë të ditur për gazetën se, gjatë mesditës së sotme pritet të mblidhet kryesia, e cila do të vendosë nëse do të vazhdojë të mbështesë qeverinë dhe të pranojë disa poste dytësore në administratë, apo do të dalë jashtë koalicionit. Ndërkohë gjatë mbledhjes së djeshme të Këshillit të Ministrave ra në sy edhe mungesa e kreut të PDK-së, ndërkohë që si përfaqësuese e Ministrisë së Shëndetësisë ishte zv.ministrja Sinoimeri. Ndërkohë zyrtarët e lartë të PDK-së shpresojnë ende për një rikthim të tyre në kabinetin qeveritar, teksa shtojnë se gjatë ditës së sotme mund të ketë sërish takim me përfaqësuesit e lartë të Partisë Demokratike.

Malaj: Ky buxhet, jo kushtetues


Një ditë përpara votimit në Kuvend të buxhetit të ri, deputeti i PS-së, Arben Malaj, e ka cilësuar si antikushtetues atë, pasi në të përmbahen fondet e privatizimit të ARMO-s në një kohë që nuk është nënshkruar ende kontrata. “Në çdo vend buxheti pasqyron kufirin maksimal të shpenzimeve, qeveria nuk mund të përdorë asnjë qindarkë të papërfshirë dhe pasqyruar në buxhetin e miratuar nga Parlamenti. Kjo është shkelje e rëndë kushtetuese, cenon rëndë transparencën e të ardhurave nga privatizimi, cenon rëndë kontrollin parlamentar mbi buxhetin”, tha Malaj në konferencën e djeshme për shtyp. Sipas tij, “veç kritikave për dështimet e qeverisë dhe rritjen e varfërisë së shqiptarëve, kemi denoncuar edhe një shkelje shumë të rëndë të demokracisë parlamentare”, theksoi Malaj.

Ligji i Barnave, Shehu kërkon shtyrjen


Kryetari i komisionit parlamentar të Shëndetësisë, Tritan Shehu, kërkoi në mbledhjen e djeshme shtyrjen e miratimit të p/ligjit të qeverisë “Për barnat”, duke sjellë si argumentin ndryshimet që po ndodhen në Ministrinë e Shëndetësisë. Sipas tij, nuk është normale që një projektligj i tillë të diskutohet në momentin kur ndryshohet titullari i këtij institucioni. Por edhe pse ka pasur mendime pro dhe kundër për këtë projekt, komisioni ka nisur shqyrtimin e draftit. Dy deputetët e PBDNJ-së të pranishëm në këtë komision, Solis dhe Peçi, e kontestuan ashpër liberalizimin e importit të ilaçeve, pasi një gjë e tillë do të ishte e dëmshme.

Topalli: Ishte vetëm një keqkuptim administrativ



Kryetarja Kuvendit, Jozefina Topalli, me anë të një letre publike drejtuar ambasadorit amerikan, Jon Withers, dhe kreut të prezencës së OSBE-së ka dhënë arsyet në lidhje me të ashtuquajturin incident të ndodhur në seancën kur po realizohej raportimi i kryeprokurores Ina Rama. Në letër theksohet se, “ashtu si edhe në seancat e tjera plenare, edhe në atë të datës 17.07.2008, me një axhendë intensive me shumë pika në rend të ditës, punimet e kësaj seance janë transmetuar drejtpërsëdrejti mbi 5 orë, në disa kanale televizive”. “Dëshiroj t’ju siguroj se, nuk ka ndodhur dhe nuk do të ndodhë kurrë që të largohet njeri nga ndjekja e punimeve të Parlamentit. Ndryshimi i vendeve, nga lozha në galeri, për punonjësit e huaj dhe shqiptarë të programit OPDAT-it ka qenë vetëm keqkuptim administrativ, për shmangien e të cilit në të ardhmen janë marrë të gjitha masat”, shkruan Topalli në letrën e saj. Kryeparlamentarja theksoi gjithashtu se, i konsideron të mira marrëdhëniet me SHBA-në. “Më lejoni të ritheksoj se, unë personalisht dhe Kuvendi që unë drejtoj, ashtu si të gjithë shqiptarët, ushqejmë një mirënjohje të thellë ndaj miqësisë së palëkundur dhe mbështetjes që Shtetet e Bashkuara të Amerikës i kanë dhënë dhe i japin Shqipërisë dhe shqiptarëve”, thuhet në letrën e saj. Të njëjtin sqarim Topalli i bëri dhe ambasadorit të OSBE-së, Bosch, duke u shprehur se, “e konsideroj nder të veçantë për Kuvendin e Shqipërisë praninë e ambasadorëve dhe të stafeve të tyre në ndjekjen e punimeve të Parlamentit”. b.h

Letra e Topallit



I nderuar Ambasador Withers
Lexova me vëmendje letrën tuaj, të datës 21.07.2008.
Më lejoni të ritheksoj se, unë personalisht dhe Kuvendi që unë drejtoj, ashtu si të gjithë shqiptarët, ushqejmë një mirënjohje të thellë ndaj miqësisë së palëkundur dhe mbështetjes që Shtetet e Bashkuara të Amerikës i kanë dhënë dhe i japin Shqipërisë dhe shqiptarëve. Kuvendi i Shqipërisë, si gjithnjë, ndihet i nderuar të mirëpresë titullarë të Trupit Diplomatik, ambasadorë, shefa misionesh e përfaqësues të tjerë, në punimet e Parlamentit.
Jam e lumtur që, së bashku me kolegët kemi arritur të bëjmë transparente, më shumë se kurrë, veprimtarinë e Kuvendit të Shqipërisë. Ashtu si edhe në seancat e tjera plenare, edhe në atë të datës 17.07.2008, me një axhendë intensive me shumë pika në rend të ditës, punimet e kësaj seance janë transmetuar drejtpërsëdrejti mbi 5 orë, në disa kanale televizive. Dëshiroj t’ju siguroj se, nuk ka ndodhur dhe nuk do të ndodhë kurrë që të largohet njeri nga ndjekja e punimeve të Parlamentit. Ndryshimi i vendeve, nga lozha në galeri, për punonjësit e huaj dhe shqiptarë të programit OPDAT ka qenë vetëm keqkuptim administrativ, për shmangien e të cilit në të ardhmen janë marrë të gjitha masat.
Sërish dëshiroj të përsëris se, e konsideroj nder të veçantë për Kuvendin e Shqipërisë praninë e ambasadorëve dhe të stafeve të tyre në ndjekjen e punimeve të Parlamentit.
Sh.T.Z John L. Uidhers, II Jozefina TOPALLI (ÇOBA)
Ambasador i SHBA
Tiranë

Maxhoranca rrëzon nismën për minatorët


Nisma e opozitës mori 42 vota pro, ndërsa 57 ishin kundër dhe 11 abstenuan. Mustafaj, Ujka dhe Ngjela abstenuan në këtë votim. Nisma e deputetëve të opozitës në nismën e kryesisht në projektligjin "Për një shtesë në ligjin nr. 8685, datë 9.11.2000, "Për trajtim të veçantë të punonjësve që kanë punuar në miniera, në nëntokë", të ndryshuar", ku kërkohet një shtesë prej 1 milion usd për një kategori personash. Ministri i Financave, Ridvan Bode e cilësoi si propozim elektoral, që ka motive vetëm për përfitime politike dhe se skema e re e pensioneve do të sjellë ndryshimin e përfitimit. Ndërsa socialistët e kanë cilësuar të dëmshme qëndrimin e mbajtur nga ana e ministrit, duke deklaruar se "kjo gjë bëhet vetëm për një kategori të caktuar personash dhe se nuk ka ndonjë ndikim në buxhetin e shtetit. Ministri Bode ftoi deputetët të tërhiqnin nismën, por një gjë e tillë u kontestua nga ana e socialistit Braçe. Deputeti i LSI, Neranxi u shpreh pro kësaj nisme. "Minatorët e meritojnë një trajtim njerëzor për kontributin që kanë dhënë në ekonominë shqiptare pavarësisht nga sistemi në të cilin ata kanë punuar".

PDK: Ndryshimet në qeveri nën shantazhin e Gërdecit


Pas një mbledhje me dyer të mbyllura të kryesisë së PDK-së, kjo e fundit shprehet se, ndryshimet në qeveri u bënë nën shantazhin e Gërdecit, duke rikthyer në kabinet ata që e shkaktuan këtë tragjedi dhe duke lënë jashtë saj, ata që u kujdesën për ta shëruar. Gjithsesi demokristianët do të vazhdojnë të jenë pjesë e koalicionit të djathtë. "Kryesia e PDK-së gjykon se, ndryshimet e fundit në qeveri u bënë nën shantazhin e Gërdecit. Ndryshimet e fundit sjellin në qeveri shkaktarët e tragjedisë së rëndë Gërdecit, ndërkohë lënë jashtë qeverisjes ata që shëruan plagët e shkaktuara nga kjo tragjedi e rëndë, e cila pritet të zbardhet nga drejtësia, duke vënë para përgjegjësisë ligjore fajtorët", thuhet në njoftimin për shtyp të kësaj partie. "Do jemi pjesë e mazhorancës, pasi jemi për bashkëpunim dhe jo ura ndarëse", ka vlerësuar kreu i demokristianëve në një prononcim për mediat. PDK pret që kreu i qeverisë të zbatojë kontratën që ka me këtë forcë të nënshkruar rreth një vit e gjysmë më parë mes Kryeministrit Berisha dhe Nard Ndokës për marrjen e një posti ministror nga kjo parti. "Kryesia e PDK-së shprehu gjithashtu, shqetësimin e saj për largimin nga qeveria të të vetmit ministër që vinte nga shtresa e ish-të persekutuarve, ndërkohë që mbahen në qeverisje përfaqësues politikë të partive të ekstremit të majtë, ish-bashkëpunëtorë të Sigurimit të Shtetit, apo pinjollë përsekutorësh të njohur e të denoncuar publikisht", thuhet më tej në njoftimin për shtyp. Gjithashtu sipas PDK-së, pas këtyre ndryshimeve në qeveri, ky ekzekutiv bëhet i vetmi në Evropë përveç Turqisë, që nuk ka si pjesë të tij një ministër të besimit katolik.

Ligji i Barazisë, gratë mbesin jashtë Parlamentit


Ligji i debatuar dhe cilësuar si një premtim i klasës politike shqiptare për të realizuar përfaqësim mbi 30 për qind të grave në Parlamentin shqiptar nuk është konkretizuar. Me ndryshimin e bërë së fundmi në ligjin "Për barazinë gjinore" mësohet se Kuvendi, më saktë dy komisionet parlamentare i Shëndetësisë dhe Ligjeve hoqën mundësinë që minimumi i përfaqësimit të grave në Parlamentin e ardhshëm të jetë 30 për qind nga femrat. Me 71 vota pro, 2 kundër dhe 2 abstenime është kaluar ligji "Për barazinë gjinore". Votat kundër në këtë sallë kanë qenë të deputetes socialiste Rajmonda Stefa dhe të republikanit Arjan Madhi, ndërsa Hushi dhe Çaçi abstenuan. "Votova kundër, pse ju zoti kryeministër nuk e realizuat atë që kishit premtuar, barazinë gjinore, kjo është një farsë që po bëni me barazinë gjinore, zoti kryeministër", tha pas votimit socialistja Stefa. Ndërsa Berisha ka synuar që të realizojë këtë ndryshim në Kodin e ri Zgjedhor. Neni 20 i këtij projektligji ka qenë debati më i madh mes pozitës dhe opozitës. Në propozimin e sjellë nga dy komisionet parlamentare, në pikën c, të nenit 20 përcaktohet se, "sigurohet përfshirja jo më pak se 30 % të secilës gjini, në listën e kandidatëve të paraqitur nga partitë politike apo koalicionet politike, për sistemin proporcional për zgjedhjet qendrore dhe vendore". Edhe pse është votuar një herë, debati është hapur në seancë nga nënkryetari i komisionit të Shëndetësisë dhe Punëve Sociale, socialisti Albert Çaçi, i cili kërkoi shpjegime se për çfarë votoi Parlamenti për variantin e qeverisë, apo për propozimet e dy komisioneve për mënyrën e përfaqësimit të grave në Parlament. Çaçi e ka cilësuar jo të drejtë përcaktimin e lënë nga dy komisionet, duke lënë variantin e qeverisë. Ndërsa për këtë çështje ka ndërhyrë edhe kryeministri Sali Berisha, i cili ka kërkuar që në Parlament të jenë të paktën 30 % e grave të pranishme të të gjithë deputetëve. "Nëse ne nuk arrijmë atë s'kemi arritur asgjë, por duhet të përcaktojmë atë te Kodi Zgjedhor, ky është propozimi im. Nëse themi 30 % e listës, nuk kemi bërë asgjë. Ne mund të përcaktojmë edhe 60 % të listës, por s'kemi bërë asgjë, nuk do kemi asnjë grua në Parlament. Prandaj t'ia kalojmë komisionit të posaçëm për Reformën Zgjedhore", deklaroi Berisha. Por kryekomisioneri Shehu ka qenë i mendimit që të miratohet në këtë mënyrë ligji, pasi përcaktohen standardet dhe komisioni i posaçëm mund të realizojë ndryshimet e nevojshme. Ndërsa debati tjetër ka qenë në lidhje me shtimin e një institucioni tjetër, komisioneri që do të ndjekë këtë proces. Ky shtim i institucionit është kontestuar nga ana e socialistit Bashkim Fino, por është pranuar edhe nga ministri i Financave, Ridvan Bode dhe kryeministri Sali Berisha. Sipas tyre, një gjë të tillë duhet ta realizojë Avokati i Popullit.

debati

Sali Berisha: Nëse ne nuk arrijmë atë s'kemi arritur asgjë, por duhet të përcaktojmë atë te Kodi Zgjedhor, ky është propozimi im. Nëse themi 30 % e listës, nuk kemi bërë asgjë. Ne mund të përcaktojmë edhe 60 % të listës, por s'kemi bërë asgjë, nuk do kemi asnjë grua në Parlament. Prandaj, t'ia kalojmë komisionit të posaçëm për Reformën Zgjedhore.

Albert Çaçi: Nëse nuk e ndryshojmë, nuk kemi arritur asgjë për barazinë gjinore.

Rajmonda Stefa: Votova kundër propozimit pasi qeveria dështoi në nismën e saj për realizimin me 30 % të përfaqësimit të grave në Parlament. Rishikoni nenin 20, për këtë është bërë e gjithë përplasja.

Jozefina Topalli: Unë nuk jam kundër, tërhiqeni nismën nëse duhet dhe e rishikojmë nenin. Nëse jeni për votim, atëherë e votojmë.

Procesverbali, hiqen sharjet


Deputeti i PS-së, Erion Braçe, ka deklaruar se, ai nuk ka pasqyruar fjalët e sakta që janë përmendur, duke shmangur fjalët banale që kryeministri ka drejtuar në seancën parlamentare në adresë të socialistit Balla. “Nëse nuk i ndryshoni këto, do të ketë probleme me ju zonja kryetare, pasi këtu janë vetëm fjalët e juaja dhe më pas do të ndiqeni ju penalisht për këtë çështje”, deklaroi Braçe. Ndërsa socialisti Petro Koçi theksoi se, duhet të realizoheshin patjetër ndryshimet dhe të vendoseshin saktësisht shprehjet e kryeministrit. Por, Topalli me ironi i është drejtuar sallës se, “më mirë silleni ju me shkrim, atë që doni të saktësoni ju në procesverbal”. Deputeti Koçi u shpreh se, Kuvendi nuk duhet të merret me trashëgimtarët e ministrave apo deputetëve, si dhe të mos debatoheshin në këtë formë në sallë ndërmjet kolegëve. Por më pas seanca ka vazhduar me votimin e projektligjeve.

Tension në seancë, shmanget përplasja


Në sallë kryeministri Berisha ka tentuar disa herë të marrë fjalën, por kjo është frenuar nga Topalli, e cila ka tentuar të mos e acarojë situatën. Kur Berisha kërkoi fjalën për reagimin ndaj Metës, Topalli e ka shmangur me qetësi, duke bërë që seanca të vazhdojë me debate të tjera. Ndërsa Berisha ka qëndruar disa herë në dëgjimin e diskutimeve. Seancën për disa momente e ka drejtuar edhe Ylli Bufi, i PS-së. Për këtë Braho e ka dënuar si veprim, duke u shprehur se s’mund të bëhet mburojë e gabimeve të demokratëve. Ndërsa në seancë kryeministri Berisha para se të fliste për buxhetin, ka nxjerrë krehrin nga xhepi i xhaketës dhe është krehur, duke shkaktuar tone humori në sallë. Një xhest i pakontrolluar, ky zakonisht nga ana e kryeministrit.

Pas dekretimit, ministrat për votim të hënën në Kuvend


Firma e hedhur dje në mesditë nga presidenti Topi mbi dekretet për ministrat e rinj, i hap rrugën Kuvendit të nisë procedurat për votimin e tyre në seancë parlamentare.

Kështu, gjatë seancës së të hënës në Kuvend, që pritet të jetë edhe seanca e parafundit për këtë sesion parlamentar, pritet që ministrat e rinj t'i nënshtrohen votimit të deputetëve. Më konkretisht, Fatos Beja për ministër Arsimi, Anila Godo për ministre të Shëndetësisë dhe Genc Pollo për zv/kryeministër. Në votimin e ditës së hënë, i cili do të jetë me elektronikë dhe i hapur, nuk pritet të ketë ndonjë surprizë edhe për shkak se publikisht asnjë nga deputetët e shumicës nuk kanë dalë kundër këtyre ndryshimeve. Pas miratimit të tyre në seancën e të hënës në Kuvend, gjatë ditës së martë pritet të bëhet betimi i tyre në Presidencë, kur ky mund të jetë një tjetër rast për shtrëngim duarsh e trokitje gotash mes presidentit Bamir Topi, kryeministrit Sali Berisha dhe kryetares së Kuvendit, Jozefina Topalli. Pas betimit që do të bëhet në Presidencë, tre ministrat, Beja, Pollo e Anila Godo pritet të jenë të pranishëm në mbledhjen e Qeverisë, që do të zhvillohet ditën e mërkurë. Këtë herë Genc Pollo nuk do të jetë përballë kryeministrit Berisha, por në krah të djathtë të tij, në postin e zv/kryeministrit. Ndërkohë që në vend të tij do të ulet Fatos Beja, i cili do të jetë në mes të ministrit të Drejtësisë, Enkelejd Alibeaj dhe ministrit të Punës, Çështjeve Sociale dhe Shanseve të Barabarta, Koço Barka. Ndërkohë, përveç ministres Majlinda Bregu një tjetër zonjë do të bëhet pjesë e kabinetit. Anila Godo, mjekja e njohur, pritet të jetë të mërkurën në radhën e ministrave që janë përballë kryeministrit Berisha dhe më konkretisht mes ministrit të Punëve Publike, Sokol Olldashi, dhe atij të Bujqësisë dhe Ushqimit, Jemin Gjana.

Ministrat, dekretet për 48 orë


Presidentit Bamir Topi i janë dashur vetëm 48 orë për të hedhur firmën mbi propozimet e kryeministrit Berisha, lidhur me ndryshimet e fundit në Qeveri.
Ndryshe nga sa pritej për një zgjatje të dekreteve deri ditën e fundit të afatit kushtetues, kreu i shtetit dje në drekë i ka hapur rrugë riformatimit të Qeverisë, duke dekretuar ministrat e rinj.
Dekretet
Zyra e shtypit e presidentit Topi bëri të ditur dje në mesditë se, kreu i shtetit ka nxjerrë dekretet për shkarkimin dhe emërimin e ministrave të kabinetit "Berisha". Fillimisht presidenti Topi ka dekretuar shkarkimin e kryetarit të Partisë Demokrate të Re, Genc Pollo, nga posti i ministrit të Arsimit dhe emërimin e tij në postin e zv/kryeministrit. "Në mbështetje të neneve 93 dhe 98, pika 1, të Kushtetutës, me propozim të kryeministrit Sali Berisha, dekretoj zotin Genc Pollo, shkarkohet nga detyra e ministrit të Arsimit dhe Shkencës. Ky dekret hyn në fuqi menjëherë. Në mbështetje të neneve 93 dhe 98, pika 1, të Kushtetutës, me propozim të kryeministrit Sali Berisha, dekretoj zotin Genc Pollo, emërohet zëvendëskryeministër. Ky dekret hyn në fuqi menjëherë", citohet në dekretet e kreut të shtetit. Në rendin numerik të dekreteve, më pas presidenti ka dekretuar emërimin e Fatos Bejës në postin e ministrit të Arsimit. "Në mbështetje të neneve 93 dhe 98, pika 1, të Kushtetutës, me propozim të kryeministrit Sali Berisha, zoti Fatos Beja, emërohet ministër i Arsimit dhe Shkencës. Ky dekret hyn në fuqi menjëherë", theksohet në dekretin nr. 5820. Në këtë mënyrë Fatos Beja do të lërë postin e nënkryetarit të Kuvendit dhe kryetarit të Komisionit të Ligjeve për të nisur një detyrë të re në kabinetin qeveritar. Gjithashtu të njëjtin fat ka pasur edhe ministri i Shëndetësisë në detyrë, Nard Ndoka. Kreu i PDK-së është njëri prej mbështetësve të presidentit Topi dhe është renditur në krah të tij lidhur me ndryshimet kushtetuese në prill të këtij viti. "Në mbështetje të neneve 93 dhe 98, pika 1, të Kushtetutës, me propozim të kryeministrit Sali Berisha, dekretoj zotin Nard Ndoka, shkarkohet nga detyra e ministrit të Shëndetësisë. Në mbështetje të neneve 93 dhe 98, pika 1, të Kushtetutës, me propozim të kryeministrit Sali Berisha, zonja Anila Godo, emërohet ministër i Shëndetësisë. Ky dekret hyn në fuqi menjëherë", vijohet më tej në dy dekretet 5821 e 5822 të nxjerrë nga presidenti Topi. Megjithëse pritej që kreu i shtetit të shfrytëzonte deri në limit 7 ditët, që i jepte Kushtetuta për të shqyrtuar kandidatët për ministra, që i kishte paraqitur kryeministri Berisha, nuk është menduar gjatë duke lënë të kalojnë jo më shumë se dy ditë për të nxjerrë dekretet për ndryshimet në Qeveri. Kryeministri Berisha vendosi të rishikojë kabinetin qeveritar pas ultimatumeve të vazhdueshme të Partisë Republikane për t'u përfshirë në Qeveri, katër muaj pasi ish- ministri i Mbrojtjes dhe kryetari i Partisë Republikane, Fatmir Mediu, kishte dhënë dorëheqjen nga posti, që mbante pas tragjedisë së Gërdecit. Në të njëjtën kohë, falë këtyre ndryshimeve në Qeveri demokratët kanë marrë për vete njërën prej ministrive më të rëndësishme, me një buxhet të madh dhe me numër të madh punonjësish, tani vetëm një vit para zgjedhjeve të përgjithshme. Ministria e Arsimit, e cila në këto tre vite drejtohej nga demokratët e rinj, duke shkaktuar disa herë pakënaqësi në radhët e demokratëve, tani do të drejtohet pikërisht nga partia më e madhe e koalicionit të djathtë.

Pas largimit të Ndokës, PDK sërish në koalicion


Megjithëse Partia Demokristiane nuk përfaqësohet më në qeveri me post ministror, ajo do të jetë sërish pjesë e koalicionit të djathtë.

Këtë e bëri të ditur kryetari i PDK-së, Nard Ndoka, i cili në një prononcim për mediat tha se, "Do jemi pjesë e maxhorancës, pasi jemi për bashkëpunim dhe jo ura ndarëse". Pas një mbledhje të kryesisë, PDK-ja doli me qëndrimin zyrtar se ndryshimet në Qeveri u bënë nën shantazhin e Gërdecit, duke rikthyer në kabinet ata që e shkaktuan këtë tragjedi dhe duke lënë jashtë saj, ata që u kujdesën për ta shëruar. "Kryesia e PDK-së gjykon se, ndryshimet e fundit në Qeveri u bënë nën shantazhin e Gërdecit. Ndryshimet e fundit sjellin në Qeveri shkaktarët e tragjedisë së rëndë të Gërdecit, ndërkohë lënë jashtë qeverisjes ata që shëruan plagët e shkaktuara nga kjo tragjedi e rëndë, e cila pritet të zbardhet nga drejtësia, duke vënë para përgjegjësisë ligjore fajtorët", thuhet në njoftimin për shtyp të kësaj partie.

Topi dekreton Maksim Malajn, PS: Zaimi ka gradë më të lartë


Presidenti Bamir Topi ka dekretuar dje Maksim Malajn, në postin e shefit të Shtabit të Përgjithshëm të Forcave të Armatosura.

Pas gati dy javësh nga propozimi i kryeministrit Berisha, kreu i shtetit hedh më në fund firmën, duke zyrtarizuar plotësimin e vendit të mbetur vakant pas shkarkimit të Luan Hoxhës. "Në mbështetje të nenit 169, pika 3 të Kushtetutës, të nenit 7, pika 5, si dhe të nenit 30, pika 1, të ligjit nr. 8671, datë 26.10.2000 "Për Pushtetet dhe Autoritetet e Komandimit e të Drejtimit Strategjik të Forcave të Armatosura të Republikës së Shqipërisë", i ndryshuar, me propozim të kryeministrit, dekretoj:
Gjeneral-Brigade, Maksim Malaj, emërohet shef i Shtabit të Përgjithshëm të Forcave të Armatosura të Republikës së Shqipërisë", thuhet në dekretin nr. 5815 të dalë dje nga zyra e presidentit. Maksim Malaj do të zërë në këtë mënyrë vendin e lënë bosh nga Luan Hoxha, i cili u shkarkua pas tragjedisë së Gërdecit. Kryeministri Berisha i kishte kërkuar presidentit Topi të shkarkonte Luan Hoxhën, si një ndër përgjegjësit kryesorë të shpërthimit të 15 marsit në Gërdec dhe kreu i shtetit e ka firmosur propozimin e kryeministrit pas gati dy muajsh që nga dita e propozimit. Ndërkohë, pas dekretimit të Maksim Malajt në postin e shefit të shtabit ka reaguar Partia Socialiste. Deputeti i PS-së, Pirro Lutaj, shprehet se, si pasojë e moszbatimit të ligjit në gradimin e gjeneralëve, përfaqësuesi ushtarak i Shqipërisë në NATO, Arjan Zaimi, ka gradë më të lartë se shefi i ri i shtabit. "Shefi i Shtabit të Përgjithshëm, i dekretuar sot nga Presidenti i Republikës, për të cilin nuk kemi asnjë paragjykim apo rezervë lidhur me aftësinë dhe kualifikimin e tij profesional, madje i urojmë detyrën e re, do të gjendet në këtë funksion të lartë qysh në ditën e parë të detyrës së tij, në kundërshtim me ligjin nr. 8771, datë 26.10.2000, i ndryshuar me ligjin nr. 9194, datë 19.02.2004, pasi në linjën e vartësisë së tij, do të jetë përfaqësuesi ushtarak i Shqipërisë në NATO, i cili është me gradë më të lartë se ai. Nuk e di nëse e ka pasur parasysh Presidenti i Republikës këtë fakt në momentin e dekretimit", u shpreh dje deputeti i PS-së. Sipas Lutajt, është i papranueshëm fakti që Forcat e Armatosura qëndruan për gati 3 muaj pa shefin e Shtabit të Përgjithshëm. "Është një rast unikal, që ndodh vetëm në Shqipëri dhe askund tjetër. Në çdo organizëm shtetëror, por sidomos në ushtri, hierarkia luan rol parësor. Precedentë të tillë, ku FA-ja, nuk kanë drejtuesit e tyre kryesorë, ndodhin vetëm në Shqipëri dhe nën drejtimin e kryeministrit të sotëm, ashtu siç ndodhi në vitin 1997, kur ushtrinë e drejtonte SHIK-u", u shpreh më tej Tavo, duke shtuar se, Forcave të Armatosura po u tjetërsohet e ngushtohet misioni i tyre kushtetues.

“Godo? S’ka pse pengohen fëmijët e politikanëve”


Anila Godo është anëtare dhe themeluese e PR-së dhe ajo nuk ka marrë postin e ministres së Shëndetësisë pse është vajza e Sabri Godos.
Në këtë mënyrë u përgjigjet, kryetari i Partisë Republikane, Fatmir Mediu, atyre që kritikojnë këtë parti për prirje monarkike. Në një intervistë për gazetën "Panorama", kreu i republikanëve shprehet se, kryesia dhe grupi parlamentar kanë qenë dakord me propozimin e Anila Godos, ndërkohë që nuk pranon të komentojë deklaratat e kreut të PDK-së se, ndryshimet në qeveri u bënë nën shantazhin e Gërdecit.
Pas katër muajsh Partia Republikane u rikthye në Qeveri. Si ishin negociatat me kryeministrin dhe a jeni të kënaqur që tani keni postin e ministrit të Shëndetësisë?
Mendoj që negociatat me kryeministrin ishin krejt normale. Kryeministri Berisha duke vlerësuar pozicionin politik të Partisë Republikane si parti e dytë në koalicionin e djathtë, ra dakord me kërkesën tonë për një nga ministri prioritare. Në fillim ishte një gamë më e gjerë ministrish, që diskutuam dhe ramë dakord me kryeministrin që do kishim kandidatura alternative për ministritë përkatëse. Këto kandidatura përfshinin autoritetet politike të kryesisë së Partisë Republikane, të grupit parlamentar, si dhe autoritetet me integritet profesional. Si përfundim u ra dakord për Ministrinë e Shëndetësisë, me një kandidaturë që besoj duhet të ishte nga fusha e shëndetësisë, me një eksperiencë të gjatë. Kjo bën që zonja Godo të njohë thellësisht problematikën që ka shëndetësia, por edhe t'i japë zgjidhje asaj sepse duket qartë që niveli profesional dhe akademik i Anila Godos është jashtëzakonisht cilësor. Është profesoreshë e asociuar edhe për menaxhim spitalor. Besoj që vajtja e zonjës Godo në atë ministri krijon edhe një raport më të drejtpërdrejtë dhe të përgjegjshëm me stafin spitalor dhe stafin e shëndetësisë. Edhe për një arsye se pjesëmarrja e tyre në reformat e shëndetësisë është e domosdoshme.
Përse u zgjodh pikërisht Anila Godo për ministre të Shëndetësisë, pasi Partia Republikane ka figura të tjera politike, të cilat mund ta përfaqësonin këtë parti në Qeveri. A ka qenë dakord kryesia e partisë dhe grupi parlamentar me këtë propozim?
Nuk ka pasur asnjë qëndrim me mospërputhje për kandidaturën e zonjës Godo. Kryesia dhe grupi parlamentar ka autoritete, të cilat pa dyshim do të ishin kandidatura shumë rezultative për ministër në pozicionet që mund të ofroheshin, por u vlerësua që për sektorin përkatës të shëndetësisë zonja Godo ishte figura më e spikatur. Ky pranim ka qenë unanim në kryesi.
Me përfshirjen e zonjës Godo në Qeveri, kur kujtojmë që ajo është vajza e themeluesit të PR-së, Sabri Godo, a po i hapet rruga fëmijëve të politikanëve që të futen në politikë dhe sa gati jemi ne ta pranojmë një fenomen të tillë?
Së pari, dua të theksoj që Anila Godo është anëtare e Partisë Republikane që nga themelimi, pra është themeluese e kësaj partie. Së dyti, ne këtu flasim për vlera të individit dhe jo vajza apo djali i kujt është. Unë nuk mendoj që në politikën shqiptare, në karrierën e tyre fëmijët mund të pengohen për shkak të statusit që kanë pasur, apo kanë prindërit e tyre. Por edhe e kundërta, mendoj se gjithsecili bazuar në vlerat e tij dhe qëndrimet politike, duhet vlerësuar në punën që bën dhe karrierën që ofrohet, se po të gjykonim ndryshe atëherë pse jo, pse të mos i ofronim zotit Godo postin e ministrit dhe jo vajzës së tij. Sabri Godo është një nga njerëzit me vlera në politikë dhe do të ishte patjetër një autoritet në qeverisje, si dhe anëtarët e tjerë të kryesisë apo grupit. Por u diskutua për postin konkret të Shëndetësisë. Është normale të shikohet brenda intelektualëve që janë në radhët e PR-së dhe e tillë është zonja Godo.
Partia Demokristiane ka deklaruar se, ndryshimet në Qeveri u bënë nën shantazhin e Gërdecit, madje sipas tyre, me propozimin e Anila Godos, kjo parti po kthehet në parti me prirje monarkike. Si i komentoni këto deklarata?
Nuk kam ndonjë koment të veçantë për qëndrimet e PDK-së, apo të zotit Ndoka në mënyrë specifike. Kam pasur dhe kam bindjen që demokristianët duhet të jenë pjesë e maxhorancës, por në kuptimin e Partisë Republikane e drejta e subjekteve për të drejtuar një pozicion të caktuar në qeverisje, ka të bëjë jo thjesht me dëshirën e subjekteve, por me gjykimin dhe vlerësimin e kryeministrit.

SHBA: Kuvendi të votojë jo të hetojë dekretet e Topit

SHBA pret që Kuvendi i Shqipërisë të mos mbajë ndikime partiake në votimin e gjashtë dekreteve të dyta të kreut të shtetit për anëtarët e Gjykatës së Lartë.
Katër gjyqtarë të njohur amerikanë me një letër publike, drejtuar kryetares dhe deputetëve të Kuvendit kërkojnë, që procesi i seancave dëgjimore për anëtarët e Gjykatës së Lartë të mos ketë ndikime partiake. Në letrën e tyre gjyqtari i Qarkut të Dytë, të Shteteve të Bashkuara, Xhon Uoker gjyqtar i distriktit të Minesotas të Shteteve të Bashkuara, Pol A. Magnuson, Ish-kryetar i Gjykatës së Lartë të Shtetit të Uashingtonit, Robert Atër, Doktor në Shkenca Juridike; këshilltari ligjor, Rozher D. Sherard kanë lëshuar këtë apel përpara votimit të gjashtë dekreteve. "Seancat dëgjimore të Parlamentit për të emëruarit në Gjykatën e Lartë duhet të ngrihen mbi interesat partiake dhe taktikat akuzuese. Sulmet personale mbi të emëruarit dhe pandehmat e paprovuara nuk duhet të pengojnë kandidatët për të shërbyer në Gjykatën e Lartë. Nga ana tjetër, pandehmat shqetësuese, të cilat mbështeten mbi fakte specifike duhet të hetohen imtësisht dhe të vlerësohen duke pasur parasysh një proces të ndershëm gjykimi. Bazuar mbi këtë funksion, Parlamenti vepron si një ruajtës i rëndësishëm dhe duhet të qëndrojë mbi politikën për të pranuar të emëruarit për në Gjykatën e Lartë, të cilët do t'u shërbejnë shqiptarëve me profesionalizëm dhe gjykime të pavarura", thuhet në letrën e katër gjyqtarëve. Sipas tyre, e drejta e dekreteve i takon presidentit të vendit Topi dhe Kuvendi duhet të shprehet me anë të votës. "Presidenti Topi tashmë i ka emëruar dy herë kandidatët për të shërbyer në Gjykatën e Lartë. Në të vërtetë, është në tagrin dhe detyrimin e Presidentit për të bërë një hetim në mënyrë që të gjejë kandidatë të kualifikuar për t'u emëruar në Gjykatën e Lartë. Sipas Kushtetutës dhe për të përmbushur parimet demokratike, kjo duhet të mbetet e drejta ekskluzive e Presidentit të Republikës", thuhet në letër. Disa kanë shprehur shqetësimin se, politika do të ndërhyjë mjaft në procesin përzgjedhës të anëtarëve të Gjykatës së Lartë.


“Reforma në drejtësi,të mos jetë e copëzuar”

Reforma në drejtësi duhet të konceptohet si një e tërë, pasi në këtë mënyrë do të shmangen përplasjet ligjore të mundshme ose mungesa e koherencës në legjislacion. Përfaqësuesit e Unionit të Gjyqtarëve të Shqipërisë, Shoqatës Kombëtare të Prokurorëve, Shoqatës Kombëtare të Gjyqtarëve dhe Komiteti Shqiptar i Helsinkit i kanë dërguar dje një letër të hapur krerëve të shtetit lidhur me reformën në sistemin e drejtësisë. Në letër thuhet se, përgatitja e reformës në drejtësi deri më sot, sidomos procesi i ligjbërjes lë mjaft për të dëshiruar. "Konstatojmë me keqardhje se metodologjia e hartimit të disa projekteve që kanë të bëjnë me reformën në drejtësi, si rrjedhim i defekteve që përmendëm më lart shoqërohet me elementë të subjektivizmit dhe interesave të ngushta sektoriale dhe konjukturiale", citohet në këtë letër. Përfaqësuesit e shoqatave vlerësojnë organizimin e seancave dëgjimore, që zhvillohen në Parlament, por sipas tyre, ato nuk janë as të mjaftueshme dhe as rezultative nëse nuk paraprihen nga një angazhim i mëparshëm i aktorëve përkatës qysh në fazën e hartimit të projektligjeve. "Kryerja e reformës në drejtësi është një proces kompleks dhe i ndërlikuar, miratimi i saj i copëzuar do të shoqërohej me pasoja të dëmshme dhe të pariparueshme", vijon më tej letra.


NATO, Topalli takon Finin
Kryetarja e Kuvendit, Jozefina Topalli gjatë takimit me homologun italian Xhianfranko Fini ka marrë premtimin e Italisë se do të ratifikojë së shpejti marrëveshjen e Shqipërisë për partneritet me NATO-n. "Italia do të ratifikojë së shpejti Protokoll, sepse Shqipëria në vitet e fundit ka bërë hapa të mëdha përpara. Nevojitet që komuniteti ndërkombëtar t'i njohë këto hapa, duke iu përgjigjur kështu meritës që ajo ka. Italia ka një traditë të hershme në raportet e afrimitetit dhe miqësisë me Shqipërinë, kështu që sigurisht ratifikimin do ta kryejmë me bindje dhe jo thjesht si një kërkesë", deklaroi Presidenti i Dhomës së deputetëve italianë. Kryetarja Topalli referoi sot në mesditë në tryezën e rrumbullakët me temë "Parlamentet në procesin e asociim-stabilizimit dhe integrimit evropian dhe mesdhetar".

Vasili: PS të reagojë për reformën
LSI shprehet e hapur për një takim me socialistët në lidhje me problemet kryesore, jo vetëm për reformën zgjedhore. Sekretari i Përgjithshëm i LSI-së, Petrit Vasili për median u shpreh se "Është normale dhe logjike që do të kemi edhe një reagim nga ana e PS-së. LSI-ja ka konsumuar të gjitha mjetet për t'i paraprirë katastrofës së zgjedhjeve të ardhshme në Shqipëri", deklaroi Vasili. Qëndrimi i tij erdhi si rezultat i letrës së bërë publike nga ana e europarlamentarëve në lidhje me procesin e reformës zgjedhore në Shqipëri. Sipas Vasilit pas kësaj letre PS-ja duhet të reagojë në lidhje me reformën zgjedhore në vend. Prej kohësh LSI-ja ka kërkuar një takim me PS-në, për të diskutuar mbi reformën zgjedhore. U përfol një takim me Xhufit të LSI-së dhe Leskajt të PS-së, por takimi dështoi për faj të socialistëve.

Gjinushi: Largim të Berishës
Kryetari i PSD-së, Skënder Gjinushi e quan amorale dhe jo normale bashkëpunimin e maxhorancën dhe qeverisë në këto momente. "Të tolerosh këtë qeverisje do të thotë, të tolerosh krimin shtetëror të Gërdecit, të tolerosh arrogancën ndaj biznesit dhe shantazhin ndaj medias", deklaroi dje Gjinushi për mediat. Sipas tij, opozita duhet të bashkëpunojë për të realizuar largimin para kohe të kryeministrit Sali Berisha. Ndërsa në lidhje me sherrin e ndodhur në seancën e 21 korrikut, Gjinushi u shpreh se: "Kuvendi është kthyer si puna e një moteli, ku kur ikën deklaron se je i përdhunuar". Grupi parlamentar i PSD-së në shenjë proteste ndaj sherrit të ndodhur të hënën e kaluar mes socialistit Balla dhe kryeministrit Berisha, bojkotoi seancën e ditës së enjte në Parlament. PSD u bëri thirrje edhe opozitës të bënte të njëjtën gjë.

PD mbyll fushatën në Kashar
Partia Demokratike mbylli të premten fushatën elektorale në Komunën e Kasharit. Në këtë garë PD-ja për kryetar komune ka paraqitur emrin e Besnik Fuçias. Kryetari i Grupit Parlamentar të PD-së, Astrit Patozi i pranishëm në këtë takim u shpreh, se "ashtu sikurse në të gjithë Shqipërinë edhe në Kashar, qeverisja e Partisë Demokratike do të mbajë çdo premtim të dhënë". Ai shtoi, se "e kemi kthyer Shqipërinë në kantier ndërtimi dhe këtë kantier duam që ta zhvendosim edhe në Kashar, duke iu bërë thirrje banorëve të votojnë për kandidatin e PD-së Besnik Fuçia". "Ne ju kemi treguar përgjatë këtyre tre vjetëve në qeverisje se ne dimë të mbajmë fjalën dhe kjo jo vetëm në Kashar, por në çdo cep të Shqipërisë", nënvizoi Patozi. Të pranishëm banorë të kësaj zone, dashamirës të kandidatit demokrat, kanë marrë pjesë edhe deputetë të PD-së dhe anëtarë të kabinetit qeveritar.

Rama: Berisha dha leksione halucinante


TIRANË- Ne seancën plenare të ditës së enjte, kryeministri Sali Berisha nuk kërkoi ndjesë. Madje ai nuk kishte ndër mend ta bënte një gjë të tillë, duke i justifikuar fyerjet e ulëta ndaj familjes së deputetit Taulant Balla, me qëndrimin “provokues” të këtij të fundit. Kjo ishte arsyeja që sërish dje kryetari i PS-së, Edi Rama, doli në një konference për shtyp.”Për fat të keq më duhet të riflas sepse pas agresionit nuk erdhi ndjesa, madje nuk pasoi as heshtja, po vijoi shfaqja e ulët duke e ulur edhe më poshtë shkallën e besimit të shqiptarëve tek kjo politikë e vjetër e tek ky Parlament i lindur nga imoraliteti i Dushkut dhe i katandisur në një teatër të të gjitha varieteve të imoralitetit politik. Për fat të keq më duhet të riflas sepse nuk mund të heshtet përpara aktit edhe më të turpshëm të justifikimit të turpit me një turp tjetër. Turpi tjetër ishte kalimi i fajit të pashlyeshëm nga agresori tek viktima, përmes justifikimit se kryeministri na qenkej provokuar”, - tha dje Rama. Madje, këtë e bënë edhe deputetë e ministra, të gjithë ligjvënës. “Pra, për fat të keq, sipas këtyre zotërinjve që na qeverisin, çdokush është i përligjur të veprojë siç veprohej përpara se të lindte Kanuni dhe të mos e çajë kokën fare

as për ligjet e shoqërisë ku jetojmë, as për normat e bashkëjetesës qytetare dhe as për gratë, vajzat, fëmijët. Sipas këtij leksioni halucinant, që Sali Berisha dhe shpura e shërbëtorëve të tij dhanë mu në sallën e Parlamentit të Shqipërisë, çdo lloj agresioni i egër verbal në mjedisin tonë shoqëror është i justifikuar, çdo lloj rrugaçi që i vërsulet me zhargonin kryeministror të asaj nate një qytetari a një familjeje çfarëdo në rrugë, në plazh, në autobus, në stadium, në park, në kafene, është i justifikuar, sepse barra e fajit, sipas shumicës së ligjvënësve të Kuvendit të Shqipërisë ka kaluar nga agresorët tek provokatorët”,- tha Rama. Për këtë arsye, kreu i PS-së, Edi Rama, tha se ka vetëm një rrugë. “Kjo është rruga e bashkimit të qytetarëve shqiptarë, burra e gra, të moshuar, të reja e të rinj, përtej të majtës e të djathtës, në një rrjet të madh mirëkuptimi e solidariteti njerëzor. Për një Shqipëri ku politika flet me gjuhën e urtësisë e jo të rrugaçërisë, ku Parlamenti rrezaton gjuhën më të lartë shqipe e jo nën kulturën e rrugës, ku njerëzit me detyra publike mishërojnë respektin ndaj qytetarit e jo talljen me hallet e shpresat e tij”, tha ai. Rama ftoi qytetarët që të bëhen pjesë e bashkimit të ri për t’i dhënë fund

politikës së vjetër të së shkuarës.

Islami: Kartat e identitetit të shpërndahen brenda Prillit


TIRANË- Deputeti i PS-së, Kastriot Islami, shprehu dje pasigurinë për zhvillimin e zgjedhjeve brenda afatit kushtetues dhe me të gjithë infrastrukturën zgjedhore të përfunduar, ku kryesisht kishte parasysh listat e zgjedhësve të hartuara mbi bazën e regjistrit civil kombëtar, dhe kartat e identitetit.“Sipas dispozitave të ndryshuara kushtetuese zgjedhjet e ardhshme parlamentare normalisht duhet të zhvillohen jo më vonë se muaji qershor 2009. Nga ana tjetër, zgjedhjet e standardeve demokratike nuk mund të bëhen realitet pa reformimin e Kodit Zgjedhor dhe pa garantuar të gjithë infrastrukturën zgjedhore, pra pa pajisur çdo zgjedhës me kartë identiteti dhe pa hartuar listat e votuesve mbi bazën e regjistrit civil elektronik të përqendruar”, tha Ismali. Ai sqaroi sekonkluzioni i PS është se për zhvillimin e zgjedhjeve në afatin kushtetues dhe me të gjithë infrastrukturën zgjedhore, ekzistojnë vonesa të pajustifikueshme nga ana e qeverisë. “Më konkretisht për prodhimin e kartave të identitetit dihet vetëm data 1 janar 2009 për fillimin e prodhimit e shpërndarjes së tyre, ndërkohë që nga informacionet zyrtare apo publike ende nuk është e qartë se kur do të mund të pajiset shtetasi i fundit me kartë identiteti. Dhe a mund të realizohet kjo detyrë para fillimit të fushatës elektorale, që normalisht do të duhej të ishte fundi i prillit 2008 në rast se zgjedhjet zhvillohen në afatin kushtetues qershor 2009”, tha Islami. Deputeti i PS-së theksoi se nuk dihet ende numri i saktë i kartave që duhen prodhuar e shpërndarë. Për rrjedhojë nuk dihet se kur procesi i pajisjes së shtetasit të fundit me kartë identiteti do të përfundojë. “Nga media dihet se numri i kartave të prodhuara e të shpërndara në ditë nga kompania franceze “Sagem” në të gjithë territorin e vendit është, sipas kontratës së firmosur, 15 mijë karta në ditë. Por, është i turbullt informacioni sesa ditë në muaj do të punojë kompania franceze, për të bërë të mundur më tej të përcaktohet sesa karta do të mund të prodhohen e të shpërndahen realisht më 1 muaj”,- tha ai. Islami tha se në kontratën e firmosur me qeverinë shqiptare, kompania franceze ka vendosur rezervën se nuk mban asnjë përgjegjësi në rast se shtetasit nuk paraqiten për të dhënë informacionin e nevojshëm dhe për të tërhequr kartën e prodhuar. Ndërkohe që nuk ka zgjidhje të qartë nga ana e qeverisë për pajisjen me karta identiteti për zgjedhësit me banim jashtë vendit.

Mustafaj: Ndryshimet në qeveri, të pamjaftueshme


Tiranë- Ish-Ministri i Jashtëm, deputeti demokrat Besnik Mustafaj, i cili aktivitetin e tij po e përqendron më së shumti në takimet me elektoratin që e ka votuar, ka deklaruar dje se ndryshimet e qeverisë Berisha janë të pamjaftueshme. Në një takim me elektoratin e zonës së tij, Mustafaj tha se i kishte mirëpritur emrat e rinj në qeverinë Berisha, porse kryeministri duhet të bënte ndryshime më rrënjësore, në shërbim të interesave të qytetarëve. I pyetur nga media pas firmosjes së dekreteve nga ana e Presidentit të Republikës, Bamir Topi, deputeti demokrat u shpreh se qeveria ka sërish nevojë për përmirësime. “Do t’i bëjmë analizën e nevojshme. Unë mendoj se ishin të pamjaftueshme si ndryshime. Unë shpresoja një formatim më të madh. Por duhet parë efikasiteti i tyre pasi të vihen në provë. Unë ministrave të rinj i uroj për detyrën e re. Unë kam besim të plotë qofte tek Godo, ashtu edhe tek Beja që bëhen ministra për herë të parë, por ashtu edhe për z.Pollo i cili është një politikan me eksperiencë tashmë, por qeveria ka përsëri nevojë për t’u kompletuar më mirë”,- tha ai. Prej kohësh, deputeti demokrat, Besnik Mustafaj ka këmbëngulur në domosdoshmërinë e ndryshimeve të thella në qeverisjeje. Por Kryeministri Berisha e mbylli këtë çështje për 48 ore, ndërkohë që nuk ka dhënë ndonjë përgjigje konkrete mbi qëndrimin që do të mbajë ndaj përbërjes së kabinetit të tij në të ardhmen. Deri më tani, ndryshimet e tij janë bërë publike vetëm përmes zëdhënëses së tij.

Kryesia e PDK-së: Berisha solli në qeveri shkaktarët e Gërdecit


Demokristianët i kërkojnë Kryeministrit që të reflektojë për bashkëpunimin mes dy partive

TIRANË- 24 orë pas qëndrimit të heshtur dhe thuajse indiferent të kryeministrit Sali Berisha ndaj kërkesës së demokristianëve për të qenë ende pjesë e qeverisjes, kryesia e PDK-së është shprehur, përmes një deklarate zyrtare, se në qeveri erdhën shkaktarët e tragjedisë së Gërdecit. Kryesia e PDK-së e mbledhur dje herët në mëngjes citon se nga qeveria është larguar i vetmi ministër që vinte nga shtresa e ish-të përsekutuarve, ndërkohë që sipas anëtarëve të kryesisë, “në qeverisje mbahen përfaqësues politikë të partive të ekstremit të majtë, ish-bashkëpunëtorë të Sigurimit të Shtetit, apo pinjollë të persekutorëve të njohur e të denoncuar publikisht”. “Kryesia e PDK-së gjykon se ndryshimet e fundit në qeveri u bënë nën shantazhin e Gërdecit.

Ndryshimet e fundit sjellin në qeveri shkaktarët e tragjedisë së rëndë të Gërdecit, ndërkohë lënë jashtë qeverisjes ata që shëruan plagët e shkaktuara nga kjo tragjedi e rëndë e cila pritet të zbardhet nga drejtësia, duke vënë para përgjegjësisë ligjore fajtorët”,- thuhet në njoftimin zyrtar të kryesisë së PDK-së. Kryesia e PDK-së pret që Kryeministri dhe kryetari i PD-së, Sali Berisha, të reflektojë dhe të rishikojë në të njëjtën kohë marrëdhëniet e tij me PDK-në, e cila aktualisht përbën një nga partitë kryesore të maxhorancës së djathtë. Për këtë arsye, ata ende nuk kanë dhënë një qëndrim zyrtar për daljen ose jo nga koalicioni edhe pse shumica e tyre e kanë kërkuar një gjë të tillë.

Demokristianët siguruan në të njëjtën kohë, se do të mbeten parti e qendrës së djathtë. “Qëndrimi përjashtues dhe mosvlerësimi i kontributeve të PDK-së në qeverisjen e vendit, në realizimin e reformave dhe në zgjidhjen e krizave politike, dëmton frymën e bashkëpunimit midis dy partive tona si dhe qeverisjen e kësaj maxhorance”, -thuhet në njoftimin zyrtar të PDK-së. Kryesia e PDK-së, në mbledhjen e djeshme vlerësoi kontributin e Ndokës në krye të Ministrisë së Shëndetësisë, si dhe reformat e ndërmarra. “Kryesia e PDK-së nënvizoi edhe faktin se kur Shqipëria kërkon të integrohet në Europë dhe të bëhet pjesë e qytetërimit dhe e kulturës së saj, është i vetmi vend, përveç Turqisë, që qeveriset nga një qeveri e cila nuk ka në përbërjen e vet asnjë ministër të besimit katolik”, - thuhet në vendimin e kryesisë.

Ndryshimet, Ndoka takon Anila Godon


Ende pa u dekretuar, Ministri i Shëndetësisë i dorëzon dosjet e punës

TIRANË- Demokristianët nuk e kanë pritur mirë zëvendësimin e tyre nga republikanët në Ministrinë e Shëndetësisë. Megjithatë, qëndrimi i tyre duket se është krejtësisht parimor, pa u marrë me emra konkretë, e veçanërisht me pasardhësen e këtij dikasteri, pikërisht me mjeken e njohur Anila Godo. Burime nga PDK thanë dje për “Shekullin” se kryetari i PDK-së, Nard Ndoka, ka pritur në zyrën e tij të punës, Ministren e ardhshme të Shëndetësisë, një takim ky i kërkuar nga vetë ai. Burimet cituan se gjatë takimit, Ndoka i ka dorëzuar dosjet e punës dhe gjithçka tjetër që ka lidhje me impenjimet e ministrit, ditët e ardhshme.

Anila Godo, një mjeke pediatre e njohur, pritet të zërë vendin e Ministrit të Shëndetësisë. Emërimi i saj nga kryeministri Sali Berisha është pritur mirë në ambientet e Ministrisë së Shëndetësisë, ndërkohë që tanimë pritet vetëm firma e Presidentit të Republikës e miratimi më pas në Kuvend. Anila Godo, do të përfaqësoje pikërisht Partinë Republikane në formatimin e ri të qeverisë “Berisha”. Pak ditë më parë, Godo mori edhe mbështetjen e plotë të kryesisë së PR-së, duke i hapur rrugë vetëm emërimit të saj në rrugë zyrtare. Ndërsa demokristianët, të cilët drejtuan për më tepër se një vit dikasterin e Shëndetësisë, pritet që të mbesin përfundimisht jashtë Qeverisë. Gjatë këtyre ditëve negociatash, ka pasur vetëm një takim mes kryetarit të PDK-së dhe Sekretarit të Përgjithshëm të PD-së, Ridvan Bode, njëkohësisht edhe Ministër i Financave. Oferta e PD-së për disa drejtori në nivel Qarku, apo edhe emërimi i tyre në detyrën e zv-kryetarit të Kuvendit me largimin e Bejës, nuk është pranuar nga Ndoka, i cili kërkoi rishikim të kërkesave nga ana e PD-së, gjë që nuk u realizua.

Topi përshëndet liberalizimin e vizave me Maqedoninë


TIRANË- Presidenti i Republikës, Bamir Topi ka përshëndetur dje ratifikimin e marrëveshjes së nënshkruar mes Shqipërisë dhe Maqedonisë për një regjim të liberalizimit të plotë të lëvizjes së qytetarëve të dy vendeve, duke plotësuar kështu procedurat parlamentare reciproke për hyrjen në fuqi të saj. “Presidenti i Republikës së Shqipërisë e përshëndet këtë akt të Parlamentit të Maqedonisë dhe shpreh besimin e tij të plotë se aplikimi i kësaj marrëveshjeje do të japë produkte të konsiderueshme pozitive për shtetasit e të dy vendeve tona. Presidenti i Republikës e konsideron këtë marrëveshje si reformën më të thellë në sistemin e lëvizjes së lirë të njerëzve, kapitaleve dhe të mirave materiale midis vendeve tona, si fryt i përpjekjeve tona integruese dhe si pjesë e rëndësishme e Marrëveshjes së Lehtësimit të Vizave të Bashkimit Evropian me vendet e Ballkanit Perëndimor”,- thuhet në njoftimin zyrtar të Presidencës.

Lëvizja e lirë, sipas presidentit Topi, është guri i provës së lirisë, së demokracisë, i çlirimit përfundimtar nga izolimet ideologjike, hapi i njohjes së ndërsjellë të popujve të Ballkanit Perëndimor, dhe ndarja përfundimtare nga paragjykimet nacionaliste e etnike. “Presidenti Topi, i ndërgjegjshëm dhe i përgjegjshëm për rëndësinë e një marrëveshjeje të tillë midis dy vendeve tona, i vëmendshëm ndaj interesit dhe ndjeshmërisë së qytetarëve, të publikut dhe të medias për këtë çështje, u angazhua seriozisht në çastet kulmore të bisedimeve për të dhënë produktin që qytetarët e të dy vendeve gëzojnë sot”,- thuhet në qëndrimin zyrtar.

Ndoka: PD fshehu dosjet për nivelet e larta drejtuese


Ndoka deklaroi se drejtuesit e shtetit i kanë fotokopjuar dosjet, për t’i përdorur në formë presioni ndaj subjekteve të caktuara

TIRANË- Demokristianët, një prej partive përfaqësuese në qeveri, tregohen të ashpër në qëndrimet e tyre, kur bëhet fjalë për hapjen e dosjeve të ish-bashkëpunëtorëve të Sigurimit të Shtetit. Duke iu rikthyer herë pas here kësaj çështjeje të rëndësishme për nga përmbajtja, kryetari i PDK-së, Nard Ndoka, ka deklaruar dje se gjatë viteve ‘95-’96 ish-drejtuesit e PD-së në atë kohë, informacionin që kishin për ish-bashkëpunëtorët e Sigurimit të Shtetit e përdoren për të pastruar partinë vetëm në nivele të dyta dhe të treta. Ndërsa për deputetët, anëtarët e Këshillit Kombëtar, por edhe për lidershipin e saj, sipas Ndokës, ato vetëm u fotokopjuan. “Degët e partive dërgonin emrat dhe ekzistonte një rrjet kontrolli, pra një grafi e tyre dhe çdo njeri vihej me shenjë, për t’u parë me konsideratë, për t’u spostuar nga organet drejtuese. Besoj se ishte gjëja më e mirë që Partia Demokratike bëri në atë kohë në radhët drejtuese. Kjo u shtri në nivelet e dyta dhe të treta, por nuk u pasua në lidershipin dhe në drejtuesit e Partisë Demokratike, anëtarët e Këshillit Kombëtar, deputetët në atë kohë, dhe ky është problemi”,- tha Ndoka.

Në një deklarim për mediat, kryetari i PDK-së theksoi se drejtuesit e lartë i njohin bashkëpunëtorët e Sigurimit të Shtetit. “Drejtuesit e lartë të shtetit shqiptar, kanë informacion për dosjet e ish- bashkëpunëtorëve të Sigurimit. Pra, i njohin ato bashkëpunëtorë, i njohin pseudonimet e tyre, i kanë fotokopjuar dosjet e tyre dhe në çdo moment i kanë si prova për të ushtruar presion, për t’i bërë ata që të binden”,- shtoi ai.

Madje kryetari i demokristianëve shprehet si ish-kryeministra, ministra të Brendshëm që kanë informacione mbi dosjet sekrete, i kanë ruajtur edhe në formën elektronike. “Këtë informacion e kanë shumë persona. Janë disa ish-ministria të Brendshëm, janë disa ish- kryeministra, janë disa ish-drejtues të Shërbimit Informativ Kombëtar. Pra, është një numër i konsiderueshëm njerëzish që kanë informacione për këto dosje. Një numër i konsiderueshëm personash, të cilët i kanë tashmë, edhe në formën elektronike, të ruajtura, pavarësisht se i kanë marrë në kundërshtim me rregullat dhe Arkivat e Shtetit, por kanë shfrytëzuar postin e tyre zyrtar”,- tha ai. Qëndrimi i kreut të PDK-së vjen në një kohë kur në Kryeministri, por edhe më gjerë, në selitë e partive aleate të mazhorancës po diskutohet jo pak mundësia e ndryshimeve në qeveri, për shkak të këmbënguljes së republikaneve, drejtues të së cilës kërkojnë përfaqësimin e tyre me një post qeveritar të rëndësishëm. Në këto negociata është përfshirë edhe dikasteri i Shëndetësisë i mbajtur nga Ndoka, porse burimet bëjnë të ditur se ky dikaster do të vazhdojë që t’i mbetet PDK-së, ndërkohë që janë në lojë ministri të tjera të rëndësishme, si ajo e Bujqësisë, Transporteve, madje edhe e Arsimit.

Drafti

Ndërkohë, në debatin që ka përfshire forcat politike shqiptare për hapjen e dosjeve, demokristianët do të mbështesin variantin e propozuar nga deputeti i PD-së, Aleksandër Biberaj, përveç disa pikave, siç është edhe ajo për mënyrën e verifikimit të subjekteve. Pak kohë më parë, kryetari i PDK-së, Nard Ndoka deklaroi se ky proces nuk duhet të kthehet në një gjueti shtrigash për interesa elektorale, por të jetë një proces serioz, ligjor, transparent dhe të sjellë pastrimin e ndërgjegjes shtetërore e politike. Ai ka theksuar se dënimi i krimeve të komunizmit dhe përjashtimi i bashkëpunëtorëve të Sigurimit nga jeta politike dhe postet e larta zyrtare, nuk ka përse të konsiderohet si shkelje e të drejtave dhe lirive të njeriut, për arsye se kemi të bëjmë me një kufizim që bëhet me qëllim mbrojtjen e interesave të publikut. Demokristianët kërkojnë që procesi i verifikimit të përfshijë të gjitha nivelet, duke filluar nga Presidenti i Republikës e duke përfunduar me diplomatët në përfaqësitë tona diplomatike.