Vdes"vritet" bisnezmeni Kosta Trebicka

KORCE - Kosta Trebicka, biznesmeni i cili denoncoi trafikun e armëve që shkonin nga Gërdeci në Afganistan, vdiq sot rreth orës 15.30.

Shkaku i vdekjes së tij besohet të jetë një aksident automobilistik. Sipas të dhënave të para të policisë që ka shkuar në vendngjarje, aksidenti ka ndodhur pranë fshatin Lekas të Korcës, një zonë e thellë malore ku besohet se biznesmeni Trebicka shkonte për gjah.

Biznesmeni besohet të ketë qenë i vetëm në makinën e tij tip Nisan Patrol me targë TR 88 43J.
Policia është njoftuar nga dy punëtorë të cilët kanë parë aksidentin dhe kanë njoftuar policinë. Në makinë janë gjetur dokumente me emrin e Kosta Trebickës, ndërkohë që ky kishte vdekur.

Sipas dëshmive që kanë dhënë punëtorët që kanë parë skenën e aksidentit, makina ka bërë salto në ajër dhe viktima mund të ketë pësuar plagë të rënda në kokë si rezultat i përplasjeve të forta. Dëshmitarët thonë se biznesmeni ka hyrë në makinë dhe ka tentuar ta ndezë atë. Sipas tyre, fuoristrada e tij, Nisan nuk i është ndezur. Personi në makinë ka tentuar të bëjë mbrapa, por në këtë moment, sipas dëshmitarëve, makina ka bërë edhe saltot që besohet se mund të kenë sjellë edhe aksidentin tragjik. Trupi i pajetë eshte gjetur disa metra larg makinës.
Pranë trupit të Trebickës eshte gjetur edhe arma e gjahut.

Mësohet se Kosta Trebicka frekuentonte zonat e thella të Korcës për gjah. Një grup prokurorësh dhe familjarë të biznesmenit janë nisur nga Tirana pë të bërë identifikimin e viktimës dhe dokumentimin e rrethanave të ngjarjes. Policia ndodhet në vendngjarje për të zbardhur motivet e aksidentit.

Të afërmit e Trebickës kundër autopsisë
Familjarët e Kosta Trebickës kërkojnë mjekë amerikanë për të kryer autopsinë e trupit, duke shprehur mosbesim për përfundimin e nxjerrë prej ekspertëve ligjorë shqiptarë.

Ekspertët e Ambasadës Amerikane kryejnë ekspertizën e vendit të ngjarjes. Ina Rama, në Korçë për hetimet

Familjarët e viktimës kanë kërkuar autopsi nga ekspertët amerikanë. Pikat e errëta të rindërtimit të ngjarjes

KORÇË- Familjarët e Kosta Trebickës kërkojnë mjekë amerikanë për të kryer autopsinë e trupit, duke shprehur mosbesim për përfundimin e nxjerrë prej ekspertëve ligjorë shqiptarë. Kontestimi i tyre është bërë në morgun e Korçës, vetëm pak çaste pasi kanë marrë në dorë lejen e tërheqjes së trupit të pajetë.

Megjithëse trupi i Trebickës është këqyrur edhe nga ekspertët e Ambasadës Amerikanë, të afërmit kanë shprehur rezervat e tyre, duke thënë se ata nuk kanë profesionin e mjekut ligjor.Trupi i pajetë i Kosta Trebickës ka qëndruar në morgun e spitalit të Korçës për më shumë se 15 orë, ndërsaautopsia është kryer për gati 5 orë, deri në orët e para të mëngjesit të djeshëm. Pas një riekspertimi të dytë, ai është nisur në drejtim të Tiranës rreth orës 17.30 të pasdites së djeshme.

Për të përjashtuar çdo dyshim apo paragjykim mbi grupin hetimor, edhe prokurorja e Përgjitshme, Ina Rama i ka kërkuar Ambasadës Amerikane një grup të posaçëm hetimi për ngjarjen. Megjithëse ekspertët e kësaj ambasade janë shfaqur në Lekas që prej së premtes, kryeprokurorja Rama është në pritje të përgjigjes për mbërritjen e ekspertëve nga Shtetet e Bashkuara të Amerikës.

Ndërkohë, ekspertët amerikanë në vendngjarje i kanë përqendruar hetimet e tyre tek vendi i ngjarjes, por edhe tek makina e Kosta Trebickës. Ekspertët e Ministrisë së Brendshme, të detyruar nga specialistët amerikanë kanë rindërtuar edhe njëherë skenën e “aksidentit” të biznesmenit Kosta Trebicka, duke vendosur objekte artificiale në vendet ku është gjetur trupi. Sipas burimeve zyrtare pranë Prokurorisë së Përgjithshme mësohet se me ardhjen e ekspertëve amerikanë, ato pak sende të lëvizura nga vendi i ngjarjes janë rivendosur sërish edhe njëherë në disa raste me objekte artificiale, duke i lehtësuar punën ekipit amerikan për krijimin e një hipoteze të përafërt të shkakut të aksidentit.

“Ekspertët e SHBA-së, me mjetet e tyre teknike kanë bërë matjet e pjerrësisë së tokës, gjurmëve të gomave të automjetit, kanë llogaritur shpejtësinë e lëvizjes, kanë bërë matjen e vendit ku u gjet i shtrirë dhe largësinë nga makina, që ishte rreth 43 metra. Të gjitha këto veprime janë kryer për llogari të raportit përfundimtar që ekspertët amerikanë pritet të nxjerrin në përfundim të ekspertimit të vendit të ngjarjes.

Megjithë matjet dhe eksperimentet e kryera, ka mbetur i pashpjegueshëm fakti i kthimit të makinës në një vend të rrafshët, për të përfunduar pas disa saltosh disa metra larg vendit të ngjarjes. Kjo gjë ka nxjerrë në skenë një tjetër pistë dyshimi, që lidhet me ndjekjen e mundshme të makinës së drejtuar prej Kosta Trebickës. Kjo pistë i shtohet dyshimeve të shumta mbi gjetjen e trupit shumë larg makinës.

Ndërkaq, ekspertët e Ambasadës Amerikane kanë kryer hetimet e tyre në çdo vend që mendohet se ka qenë Kosta Trebicka. Ata kanë këqyrur dhomën me nr.107, ku ai ka kaluar natën e fundit të tij në jetë si dhe trupin e tij në morgun e spitalit të Korçës. Gjatë pasdites së djeshme, ekspertët amerikanë janë takuar edhe me Prokuroren e Përgjithshme, Ina Ramën, e cila kishte shkuar në Korçë për të bërë një analizë të hetimeve të deritanishme.


Xhevahir Tahiraj pohoi se Kosta Trebicka nuk shkonte asnjëherë vetëm për gjueti

Miku i Trebickës: Ishte nën presion, s’ikte askund pa rojen

TIRANË- Biznesmeni Kosta Trebicka ndjehej i kërcënuar pas denoncimit që kreu për trafikun e armëve. Madje këtë fakt ai ua kishte bërë të ditur edhe shokëve të tij. Njëri prej tyre, Xhevahir Tahiraj, tha dje për mediat se Trebicka nuk shkonte kurrë i vetëm për gjueti. “Unë e kisha shok dhe i thashë ik nga Shqipëria,se nuk mund të jetosh më këtu”- u shpreh shoku i biznesmenit, Tahiraj. Biznesmeni shqiptaro-amerikan, sipas shokut të tij nuk dilte asnjëherë pa rojën e tij. “Asnjëherë nuk dilte vetëm. Dilte me rojën’ -shtoi më tej Xhavahir Tahiraj, ditën e djeshme teksa ndodhej në banesën e Trebickës në pritje të mbërritjes së trupit të tij.

Ndihej i frikësuar?

Ndihej shumë i frikësuar pas Gërdecit. Unë e kisha shok dhe i thashë ik, se nuk mund të jetosh më këtu.

Dilte për gjah?

Dilnim të gjithë. Dilja dhe unë me të. Asnjëherë nuk dilte vetëm. Dilte me rojën. S’ka bërë vaki të dilte Kosta ndonjëherë vetëm. Këtu jemi nja 4-5 veta që dilnim të gjuanim. Dhe në fshat kur dilnim ne, Kosta dilte dhe na merrte me makinë. Kosta shkonte shpesh për gjah andej, meqë e njihte zonën pasi ishte rritur. Hante në një lokal gjithmonë. Nuk kishte probleme me njerëzit këtu. K.Kotorri

Koço Bardhi pohon se pas makinës së Trebickës ka kaluar edhe një makinë tjetër

Dëshmitari: Pashë një makinë të dytë në Lekas

VOSKOPOJË- Koço Bardhi, personi që gjeti i pari të gjakosur Kosta Trebickën ka pohuar dje për mediat se pas makinës së Kosta Trebickës ka parë një tjetër makinë, të kalonte nëpër të njëjtën rrugë. “Kaloi një makinë dhe shoferi ngriti dorën. Pak kohë më pas kaloi një tjetër makinë dhe sërish shoferi ngriti dorën. Pas çerek ore kanë ardhur punëtorët e kromit nga Tirana dhe më thanë se kishin parë një makinë të dëmtuar. Shkova dhe pashë një person me rroba ushtarake të gjakosur. Mora në telefon policinë dhe ata më thanë të mos prek asgjë me dorë”,- është shprehur Bardhi për mediat.

Ndërkohë, një tjetër banor i Voskopojës është gjendur si deshmitar në çastet kur është zbuluar automjeti i rrëzuar. “Viktima ishte mbuluar me gjak në fytyrë. Kujtova se mund të ishte dikush tjetër që mund ta kishte vrarë, por nuk kishte asnjë njeri rreth e rrotull”, -tregon dëshmitari. Sidoqoftë, hetuesit shprehen se është ende herët për të sqaruar se çfarë ka ndodhur në të vërtetë me Kosta Trebickën, dëshmitarin kyç të çështjes së Gërdecit.


DYSHIMI

Motra e Kostës: E qava tim vëlla që pas Gërdecit

TIRANË- “Kostën e kam qarë që pas 15 marsit, kur ndodhi tragjedia e Gërdecit”. Motra e Kosta Trebickës, e sapoardhur nga Shtetet e Bashkuara të Amerikës ka pohuar në shtëpinë e mortit se i ishte lutur të vëllait të mos denonconte gjë, por ai nuk e kishte dëgjuar. Ajo u ka thënë miqve të mbledhur në shtëpinë e Trebickës, në pritje të trupit të tij se jetonte çdo ditë me frikën se të vëllait mund t’i ndodhte ndonjë gjë, frikë që për fat të keq nuk rezultoi e kotë. Në shtëpinë e Kosta Trebickës, ende duket e pabesueshme vdekja e tij.

Bashkëshortja e tij, Brunilda, u kthye në gjendje të rënduar psikologjike nga Korça, pa mundur të flasë me askënd. Ndërkohë, të afërmit janë kujdesur që djalit 11-vjeçar të Kosta Trebickës t’i gjejnë një psikologe, për të përballuar këtë tragjedi të rëndë. Familjarët bënë me dije mbrëmë se ceremonia mortore do të kryhet sot në orën 15.00 të pasdites, në varrezat e Tufinës.


Gazeta Shekulli

Vdekja e Trebickës, kriminalistët:Sipas provave ,tre variante janë vrasje, 1 aksident

Vdekja e dëshmitarit kyç Kosta Trebicka, i cili denoncoi trafikun e municioneve dhe armëve që bëhej zyrtarisht në mënyrë mafioze prej bazës së Gërdecit në Tiranë, ende nuk ka një përgjigje përfundimtare edhe pse janë bërë procese ekspertimi paralel prej drejtësisë shqiptare dhe SHBA. Prej 15 ditësh, vdekja e tij vazhdon të jetë e mbuluar me mister dhe hipoteza që janë pjesë e hetimit, por edhe edhe e opinionit. Vendi ku ai u gjet i vdekur, pozicioni dhe gjendja shumë e mirë e makinës, nisja për në Leskovik e Trebickës dhe "vizita" në Korçë, Voskopojë e Lekas, plagët e rënda e të shumta në fytyrën e tij,si dhe detaje të tjera që shoqëruan këtë vdekje, krijojnë mendimin, se nuk kemi të bëjmë me një aksident rrugor, por me një vrasje. Duke ditur pozicionin shoqëror e ligjor të Trebickës, logjikisht mund të dyshohet për vrasje, mbasi ai kishte denoncuar publikisht aferën korruptive dhe trafikun shtetëror shqiptar të armëve dhe municioneve, trafik ky që rezultoi me vrasjen e 26 njerëzve dhe shkatërrimin e 3000 banesave, denoncim që të nxit të mendosh, se krimi nuk është aksident, por vrasje e parapërgatitur për të zhdukur "njeriun provë" dhe nëpërmjet tij shumë prova të tjera që drejtësia priste t'i fuste në dosjen "Gërdeci". Nisur nga kjo vdekje e një personi të rëndësishëm për ligjin dhe përcaktues me dëshmitë e tij për zbardhjen e trafikut të armëve, ekspertë të njohur kriminalistë dhe specialistë hetimi të "aksidenteve" të kësaj natyre, mendojnë se kemi të bëjmë me krim e jo me vdekje aksidentale, siç e paraqiti në çast policia shqiptare. Këta specialistë, mbështetur në provat dhe pozicionin "gjeografik" të vendit dhe të kufomës, përveç versionit të "aksidentit me makinë", paraqesin si të mundshme vrasjes e planifikuar e të inskenuar. Për këtë, ata paraqesin katër variante, tre nga të cilat kanë lidhje me akt-vrasjeje, ndërsa varianti i fundit më i pamundur është "aksidenti rrugor", të cilin e përjashtojnë edhe oficerë të thjeshtë të policisë së qarkullimit rrugor. Ja katër pistat, pra 4 variantet që kanë çuar në vdekjen e Kosta Trebickës. Marrja peng që nga Tirana, vrasja dhe hedhja e trupit tek vendi ku gjet Kosta Trebicka, mund të jetë marrë peng që nga Tirana, pas një "takimi" të planifikuar, nga individë që ka patur lidhje dhe që u shkonte në takime të mbyllura në zona të caktuara. Pasi mund të jetë marrë peng është goditur prapa koke me mjet të mprehtë që i ka shkaktuar vdekjen. Pas kësaj, për siguri i kanë bërë edhe një shpim poshtë veshit. Më tej, për të krijuar përshtypjen e një vrasjeje barbare prej individësh primitivë, e kanë masakruar në fytyrë dhe këtë e provon fytyra e tij e dëmtuar në ballë, në hundë, thyerja e nofullave, thyerja e dhëmbëve, copëtimi i mjekrës etj. Për të humbur gjurmët, e kanë transportuar dhe e kanë hedhur trupin në vendin ku u gjend, duke përgatitur atje edhe dëmtimin e makinës me shenja batimi. Ndjekja me makinë, dalja e tij prej makinës dhe vrapimi Kosta Trebicka mund të ketë qenë vërtetë në Korçë dhe mund të jetë ndjekur për atje që nga momenti i nisjes nga Tirana. Në pamundësi ndoshta për të mos e futur në kurth të parapërgatitur në vendin ku kanë lënë takim, Kosta mund të jetë larguar befasisht me makinë. Ata mund ta kenë ndjekur me makina dhe pak kilometra para vendit ku është gjendur makina, të jetë kapur e të jetë vrarë. Por ekziston edhe mundësia tjetër, që ai mund të jetë vrarë në tjetër vend në zonën e Korçës dhe të jetë çuar atje kufoma dhe makina e cila mund të jetë batuar pas goditjeve, ndërsa deri tek vendi ku është gjendur, mund të jetë çuar nga vrasësit dhe është lënë e ndezur. Helmimi dhe më pas masakrimi për ta paraqitur vrasje banale Kosta Trebicka mund të jetë helmuar me pije, me injeksion, ose mund të jetë asfiksuar me gaz. Për të mos lënë gjurmë të një krimi të tillë, pas vdekjes e kanë masakruar për të humbur gjurmët në gojë dhe fytyrë. Më pas i kanë dëmtuar mjetin dhe e kanë çuar atë në Lekas, duke hedhur edhe trupin larg saj në mes të rrugës, për ta paraqitur jo si aksident por si vrasje banale nëpërmjet ndonjë sulmi hajdutësh, prej të cilëve Kostës i është dëmtuar makina në ndjekje prej plaçkitësve dhe ai për t'i shpëtuar krimit, ka dalë nga makina dhe ka vrapuar por është arritur prej tyre dhe atje është goditur në kokë, duke vdekur prej plagëve. Aksident rrugor, i stimuluar nga një mjet tjetër Ekziston edhe mundësia të jetë vdekje nga aksident me makinë, por fakti që makina ishte në kushtet të mira teknike dhe me shpejtësi më pak se 40 kilometra në orë dhe që gjendej në afolio dhe e ndezur, të bën të dyshosh. Deri tani, nuk ka një variant të tillë aksidenti, me makinë në atë pozicion, me viktimën 43 metra larg saj, me pajimet e tij personale pranë trupit dhe me qenin brenda në makinë të padëmtuar dhe të pa larguar prej makinës.